(( ديوان سليمان السلامه))

[ابوسحر]

ابنتظر


ابنتظر مطلـع نهـار مهما يطـول الانتظار =دامي على حبك أغـار مالي على الصبراختيار


ابتيع أدروبك وأمر لـو عمري أيـامه تمـر =لو حتى مايبقى عمـر ابنتـظر مطـلع نهـار


اللي من اعمـاقه يحب لوهو شقى لوهو تعب =يطاوع اشواقه غصب ماله على احساسه قرار


لوحاول بينسى هواه واقفى وترك عشقه وراه =لابد ماتخونه خطاه ويرجع أسير الانتظــار


ياسـاكن اعماقي أبيك بالله غيرني عليـك =إن كان مالي حظ فيك محبتك والشوق نـار


انـت بحياتي كل شي وانت بنظير العين ظي =بالله لاتبخـل على يازين في مطلع نهــار




اتصالـــك




هز اتصالك فيني الشوق وانهـار =قلبي وزادت حيرتي والتياعـي


بين الفرح والخوف والشوق والنار =ياغاليـه زاد العنــا والصراعي


تلعب بي امواج الهواجيس واحتار =مابين شوقي لك وبين الضياعـي


موجة حنين تزيدني حب واصـرار =وموجات عن شاطيك تبعد شراعي


ياحبي الخافي وياكـل الاســرار =تحطمت نفسي ولامــن يراعـي


إلى ضحك الليالي بالانــــوار =جتنا عواكيس الزمـن بنـدفاعي


مدري وش اللي بس تخفيه الاقدار =هو لـم شمل أوهو فراق وضياعي


بين الرجـا والياس قاسيت الأمرار =أكثر من اللي كان في مستطاعـي



ارحل بفكـرك



ارحل بفكـرك لـو دقايـق تذكـر=كل الوجيه اللـي تحبـك وتغليـك

تلقاني اكثر شخص وجهـه تكـرر=ماخان في حبـك ولامـل طاريـك

اغليك فوق اللـي تظـن وتصـور=لايبعـدك بالحيـل عنـي تغلـيـك

اخاف ياسـي مـن لقـاك يتطـور=واتعب ورى طرد السراب برجاويك

يمـل قلبـي صـدتـك ويتغـيـر=وتفقد غلاك بخاطري والرجا فيـك

دامك بقلبـي لـك شمـوع تنـور=لاتطفي احسـاس المـوده بياديـك

يطري عليك بوقـت منـي تعـذر=واقول ذكرانـا عـن الـود تكفيـك





أسرق النظــره


أسـرق النظره وابادله النظر =واحترس من شر حساد العيون


أدري انـك بينهم مثل القمر=ومن تبسم لك تطارده الظنون


ياحبيبٍ شوفتك خوف وحذر =وش يسوي من يحبك في جنون


إن كتمت الشوق في قلبي قهر =وان تبين حبك الناس حسدون




أنا مدري


أنا مدري أنا المخطي أوأنت اللي علي أخطيت =انا صارحتك بحب أبيك تحن أبي تــدري


ربيــع العمر يالغالي أنا ماجـا على بالــي =تضايق من حقيقة خافي احساسي ومن سري


أنا لوكنت اعـرف أنك تبي تبعـد وتنسانــي =تركـت السر في قلبي توقد ناره بصـدري


أنا بيدي عميـت عيوني اللي تسعد بشوفــك =وأنا بيدي ذبحت افراح نفسي بك وانا مدري


كتبت العـذر من دمعـي لعـلك تقبـله منـي =وتنهي هجرك اللي طال يالغالي على عمري




انت الربيع


انت الربيع وروض الازهار والسيل =بارضٍ تعـدى وسـمها ماسقـاهـا


تنظرك عيني وابتهج وإن بدا الليل=شفـتك قمر يطـرد ظـلامٍ وطاهـا


أوقد غضا واسمر معك بالتعاليـل =والصبح تاخذنـي عيونك وراهـــا


أيـام ماتنسى بذيـك المداهيـل =تـحـت النفود وبين غالي غـضـاها


أيـام تروي شف وتجدد الحـيل =وتـداوي اللي بـه جروحٍ شكاهــا


الله يعيـده بالليال المـقـابيـل =يازين نسيان الجروح وشـقـاهـــا



















محبكم
ابوسحر

[ابوسحر]

أيست من رجواك




أيست من رجواك ياناسي الحب =لو بك رجا ماضاع عمري وأنا أرجيك

أربع سنين أرجيك وأشكي لك القلب =أشكي جروحه منك ربي يجازيك

تشوفني يازين في عابر الدرب =وتصد عني كن غيري يناديك

أعطيك قلبي وانت تعلن لي الحرب =نفسك كبيرة ماتبي من يداريك

تجرحني بصدك وهجرك بلا ذنب =إلا أن قلبي ياهوى النفس يغليك




تلاقيت


تلاقيت انــا واللي ترك صورته ذكرى =بقلبي وعيني وافترقنا بــلا ميعـاد


رجيته وعد قال الوعد صعب وانت أدرى =ظروف الزمن ماهي على كيفنا تنقاد


انــا لو أبي ودي يصير الوعـد بكرى=ولا ودي انه يوم يمضي وحنا ابعاد


رحل ببتسامه والتفت قــال مـايدرى =يجوز اللقا اللي صار صدفه لنا ينعاد


تـرك للـرجـا قلبي جريحٍ ولا تـبرى =جروحه ولـو حاولت نسيانها مافاد


عسى الله يعيد بشوف مـن شوفته تشرى =وينهي فراقٍ منه انـا والزمن بجهاد








تونـا


تونـا ويـن يانـاوي تــروح =خلنـا نـفرح بشوفـك تونـا


شوفتك لي هي دواء كل الجروح =لاتسافر فيك قلبي ما اهتـنـا


من يلوم اللي على خلـه ينـوح =توي أدري ويش حبك ويش انا


دمعتي ماهيب مـن قلبٍ مزوح =دمـعتـي فيها المعاني والعنـا


لاذكرت أنك عن الديره نزوح =ضـاقت الدنيا الوسيعه بالهنـا


أنت لي كـل المحبـه والطـموح =وانت لي كل السعاده والمـني





جاني مـن الماضي



جاني مـن الماضي وفـايت لياليـه =ينـشد عن جروحٍ دفنهـا زمانـي


وقـفت محتـارٍ عيوني تراعـيـه =أبكي فـرح وأبكي نـدم من حناني


مديت كفـي وارتعش بين أيـاديه =رديـت لسنيـنٍ مضـت في ثواني


بالله وش جابك لقلبـي وطاريــه =وش لك بتـجديد العنا اللي طواني


لاتجرح اللي طاب مافات كافيــه =عطـني جديد الحب وأغلى الأماني


عطني حنانٍ ضاع عمري وانا أرجيه =اللي مضى من هـم حبك كفاني





حبي اللي في خيالي



حبي اللي في خيالي لـه وصـوف =مالقيتـه غيـر بعيونك أبـــد


دايمٍ بالنـاس بالغالي أشـــوف =من كمل زينـه ولا شـدن أحـد


لين جابتـك الليالي والظـروف =كنهـا تـوعدك في قلبي وعــد


بالغلا كنه على القلب محـلوف =مايحب الا انـت وأعطيك العهـد


صابني رمشك وسلمت الكفوف= خـابرٍ مابـي على اللوعه جهـد


صابني سـحرالنواظر ياهنـوف =والحنـان اللي بنظراتـك بعـد








حيرتني


حيـرتني يـاموقدٍ فيني النــار مـابين نظراتك وبين المعــاذير


لاقلت أبي شوفك تعذرت باعذار =وإن قلت كيفك قلت يافاهمٍ غير


يتعبني التفكير يازيـن واحتـار =ولكثرة الأعـذار ماشـوف تبرير


مدري بحبك وش تبي مني اختار =البعد والا القرب أبي منك تبصير


تزاحمت بي من تصرفك الافكار =في نظرتك هجر ومـوده وتقدير


يازين ريحني بجيه ومسيـــار =والا قل ابعد وانتفارق على خير

















محبكم
ابوسحر

[ابوسحر]

داوني بالصبـر


داوني بالصبر والا بالوصال =داوني ياكـل حبي والرجا


لاتقطع في يدي كل الحبال =يابعد من حبــه بقلبي لجا


أنوني بالوصل والا قل تعال =وارحم اللي من همومك مانجا


شمس حبك مالها عندي زوال =وطيف زولك مايغطيه الدجا


أرتجيك الوصل ياحلو الدلال =بالنهار وكـل ماليلي سجا


لـو لقلبي عن محبتك احتيال =ماتعذب فـي هواك ولارجا






سواد الليـل




هو سواد الليـل مني فيـك غـار =يوم عجلٍ بينـنـا وقته يسير


أو مثل شوقي لك اشتاق النهــار =انجرح من غيبتك وقـتٍ قصير


ليـه حتى الوقـت يالمحبوب صـار =بـك يحاسدني ومني بك يغيـر


مادرى وش كـثر قاسيت انتظـار =مادرى عن دامـي الجرح الخطير


درب وصلك يحسـبونه لي عمـار =مادرو أنـه على مثلي عـسيـر


مادرو بالحظ فـي شوفتك جـار =وإن قـلبي في رجا الصدفه أسير





سيرة الشعر




سيرة الشعر لولا سحر عينك حبيبي =ماطرت لي ولاجا بالمشاعر قصيده


قبل أشوفك وانا لامن بعيد أو قريبي =بين الأوراق مابه من قصيده جديده


ساليٍ بعد جرحٍ كـان فيني عطيبي =طـاب لكن عيونك ناوياتٍ تعيده


كم شقيت بحياتي مـاذكرني نصيبي =غير في جرح شوق وفي همومٍ نكيده


أرجي الله حظي بــالغلا مايخيبي =امسح احزان قلبي من سنينٍ عديده







شمس المحبه


شمس المحبه قربت للزوالــي =جـاك البديـل اللي لشوفته تشتاق


نويت هجري يابعد كـل غالي =وين الزمان اللي مضى وين الاشواق


هانت عـليك ايامـنا والليالي =وانهيـت ذاك الحـب يازين بفراق


نسيت جرحي ماطرى لك وصالي =وانا لهيب الشـوق بالقلـب وقاد


انت بحياتـي كل حبٍ طرالـي =وانت بظلام الوقت لي شمس واشراق





عد الزمن




عـد الزمن عد بغلاك الليالـي =كم جرح مني جاك وبحقك اخطيت


وإذكرني بخير إن طرى لي مجالـي =والا بنفسك يوم بالفكر مريــت


مانت أول همومي ولا أظن تالـي =دنيـاي ياما لوعتني وعانيــت


ومانت أول انسانٍ على القلب غالي =جابك زمان وراح بك مثل ماجيت


علمني الوقـت وزمــانٍ مضالي =أعـز نفسي لومن الهـم قاسيـت













عطني مثل قلبـك



عطني مثل قلبـك ولا أقول وينك =لاغبت عنـي ياهوى البال وأبطيت


حبك بقلـبي لوتشـوفه بعينـك =عذرتنـي من غـيبتك لوتشكيـت


أحن لـك واشتاق لك ولحنينـك =ويضيـق بالي كل ماشفتك أقفيـت


كم ودي آخـذ في يميـني يمينـك =وأعيش في عمر الغلا وين حبيــت


ماتبتعـد بك عن عيوني سنـينـك =ولا تبعـدك سود الليالي إلى جيـت


أجرح ظروف الشك بي في يقينـك =مالـي بغـيرك عزوةٍ لوتعـنيـت


ياسلوتي قـلب المعنـا ظنـينـك =لاتجرحه بالبعـد دامـك تـوليت
















محبكم
ابوسحر

[ابوسحر]

عـنـــادك


عنـادك يالمهاديـب الدقاقه =أحبـه لويجـي في غير حينـه


أحب اللي نظر عينـه سراقه =يشـوق بالغـلا خافي حنينه


إلى جت عيني بعين اشتياقـه =تبستم ثم سلهم رمش عينـه


يعاندني عنادٍ لـه مذاقــه= أحبه منه لونفسي حزينــه


يعاند قلبي بشـوق ورفاقـه =ومن زود الغلا بينـي وبينـه










عين الغــــلا



عين الغلا لوشافتـك جفن واهــداب =ماتشبعك نظـرة ولاترتـوي شوف


اشتاق لك لحظات لارحت بغيـــاب =ويصيـر شوف العين بالعين مخطوف


يشدني لك بالغلا واجــد اسبـــاب =وكل سبب أقـوى من الثاني ظروف


اشوف غيرك بس ياكل الاحبــــاب =مافيهـم اللي فيك من حس ووصوف


دامـك معي ما احسب لغيـرك احساب =كلي وفا لـك واطرد الشك والخوف




غابت الشمس



غابت الشمس ياويل العيون =آه ياطول ليلي والسهــــر


كل ماغبت عني يافتــون =كني مفارقٍ كـل البشــــر


أدفن الضيق بالقلب الحنون =والتناهيد في عمر القهــــر


أقضي الليل هاجوس وظنون =ضايق البال مجروح النظـــر


كل ماقلـت هونها وتهون =عانق الدمـع رمشي وانتثــر


مايعوضك غيرك لو يكون =من يكون وغيابك لي كــدر







غلطة عمر



محبتك غلطة عمـر في حيــاتي =ابعتذر عنها لعمري والايـــــام


اشقيت نفسي فيك من حسن ذاتي =أزرع لك رياض الغلا وأرسم أحلام


حتى بنفسك مـاتسوي سـواتي =كلي وفاء وأنت الوفاء عندك أوهام


خذ حبـك المجروح مع ذكرياتي =مـابي بقايـا منــك ياغالي العام


لاني غنــاة لك ولانتب غناتي =عشنا الغلا بس الغلا عـاد مـادام


أقولــها ماعض سني شفـاتي= مابــي حسايف يكفي عيوني تنام





قرب يطيب الجرح



قرب يطيب الجرح لولاي مريت =عـلـى دروبٍ ذكرتني بخلـي


وقفت حاير بين شوق وتناهيـت =قلبي ينوح ودمع عينـي يهلـي


أبكي حبيب راح أقفى وانا أقفيت =يومه على ذا الدرب فينـي يهلي


يوم الليالي لي علــى ماتمنـيت =يوم العذول اللي يلومـن مولـي


واليوم والله من هوانـا تشكيت =غـاب الذي لايام عمري يحلـي


غاب وتركني غارقٍ بالتناهيـت= مابعده أحــدٍ في حياتي يسلـي



كذبة وفاء



مـا دفعنـي للغيـاب إلا لقـاك=وماندمت من الفراق الا عليـك

صورتك في عيني إنسانه ملاك=وصورتي (كذبة وفاء) ماتهتويك

صعب تجمعنا المسافة في غلاك=والمشاعر تختلف فيني وفيـك

كان غيري ماصدق يوم بهواك=الأصابع ماتساوى فـي يديـك

صار شوفك جرح واتعبني لقاك=راحتي بالبعد لـو قلبـي يبيـك

ابعدي وابعد مادام إنه رضـاك=الفراق أرحـم لقلـبٍ يرتجيـك













محبكم
ابوسحر

[ابوسحر]

قصيدة في رثاء الشاعر عبدالله عبدالعزيز العليوي





ماعابني دمعي على الخـد لو جبت =عليـك دمـع وسم بخدي أحدود


ياللي عليك الدمع لو فاض ماعبت =عيـني ولكـن الصـبر طبع محمود


الموت مـاغيبك عنا ولـو غبـت =ذكرك على صفحات الابداع موجود


أرجي عسى ربي كثـر مـاتعذبت =يرحمـك بالجنـة عن ايـامك السود


مـاطابت الدنيا بعينـك ولا طبت =مايوم في ساعـة فرح كنت محسـود


اول حياتـك في همومـك تغربت =واخـر حيـاتك مـابقى للعنـا زود


دنيا الشقا ودعتـها مـاتطـربت =منهـا بغير الهـم والحـزن مـردود


صديت عن قاصي وداني وجنبـت =وقتـك معزة مـاهو برغبـة صدود


وتركـت هالدنيا لغيرك وغـربت =مـالك محـاسيفٍ ولا شـئ مفقود


عسى العوض ياللي من الهم شيبت =في جنـة الرحمـن وبظـل ممـدود






محبكم
ابوسحر

[ابوسحر]

كلمة في خاطري



كلمة في خاطري دايم تجـــول =كلمــةٍ لوقلتـها لـه مـاشقيـت


ودك أن الحـب مايبلى خجـول =أنقضـى بالصمـت عمري ماحكيت


إن تلاقينـا وإلى صمتى يطــول =وإن رحـل قلت آه ليتي له شكيـت


حايرٍ بالصمت مفقـود الحلــول =حيلتي ترديد كلمة ليـت ليـــت


كلما حاولت اعبر له وأقـــول =ضاع تعبيرالكـلام وماقـويــت


شوق يدفعني وخـوفٍ بي يحـول =لين ضاع الوقت مني مادريت


يازمان الصمت بي شوقٍ يهــول =وانقضى عمري ولا أدري وش نويت











لاتذكرني



لاتذكرني رحيلـك والغيـــاب =لاتعـجـل في دمـوعٍ مقـبـلات


لاتعـذبني قبل وقـت العــذاب =لك دمـوع العيـن مافيها فـوات


خلنـي مرتاح لاتطـري غيــاب =لاتخاف اعتـاد ضحكات الشفـات


حاسب للهـم في بالـي حســاب =مانسيت أيامـي اللي مقبـــلات


عارف ان أفراحنـا هذي ســراب =تنهتـي بكرى وتبقـي ذكريـات


مانسيت أني جريحـك لاتهـــاب =سلوتي يانور عينــي بالحيــاة







لاتلتفت


لاتلتفت مثلك على الصد نقوى =والجرح يامــا غير حبك يداويـــه


يـامـا بخلق الله مجاريح رجوى =كم خاطرٍ مجروح والوقــت مشقيــه


بالناس أبلقى عن رجاويك سلوى =مافـات شي ومنك انا الحب مابيــه


جاملتك التجريح من غير شكوى =صبـرت لين القلـب ضاقت محانيــه


يازين ماني لك على منت تهـوى =يـومٍ تبــي حبــي ويوم تخليـــه


بارق سحابك مالنا فيه رجـوى =مسكين قلـبٍ من لياليـك يرجيـــه




لاتوهــم



لاتوهـم رجـعـتي يمـك ذليــل=ينقضي عمرك بوهـم الانتـظـــار

كل جرح لعـزتي عـندي جميــل=وكل بسمـة ذل بيـن اشــفاي نـار

لونهـاري صــار من فرقاك ليـل=مابكـت عيني على شـوف النهــار

ولو نسيت النوم من هـم ثـقــيل=ماشكـا جفـن السهر لك وين صـار

طبعي العـزه وراسي مايـميـل=غـير للـه في مذلــه وانكســار

كان عـندك بي امل لوهو قليــل=أمسحـه مانيب راجــع باختصــار




لاقلت شفته


لاقلت شفته وارتوت منـه عيني =جت لحظة الفرقا للاشواق ترمين


لا جـا يفارقني تفجر حنينـي =وأحس كن الشوق مافارق العين


صوتي يضيع ويختـنق في يميـني =لاصافحت يمناه بوداعه الشيـن


أحس صوت اخطاه تجريح فينـي =وأحاول ألمح منته ماكان يمدين






لحظة التوديع




لحظة التوديع فيها ويش أقـول=كل مابالقلـب قالتـه الدمـوع


أعذرن يازين لوصمتي يطـول=لاتلومن حسرة الفرقـا تلـوع


ودي أوادعك والعبـره تحـول=موقفي صعبٍ وفرقاكم تـروع


أنتصر حزني وضاعن الحلـول=وانطفت من لوعتي كل الشموع


في خفا قلبـي تعابيـرٍ تجـول=في وداعك وانتهت بين الظلوع

[ابوسحر]

للأسف


للأسف وبكل مراره لك أقول =انتهينا واذكر ايـامي بخيــر


مابقى لي غيـر فرقانـا حلول =عن هوانا جرحك ابعدني كثير


كم تمنيـت المحبــه لوتطول =وللاسف ماكل مانرجي يصير


وردة الأشواق لاجاها ذبول =صعب ترجع مثل ماكانت عبير


لاتزيد اعذار وتعيـد وتقول =من غلاك احساس قلبي مستخير


فات وقت وراحت ايام القبول =الفراق ارحم ولا به حل غيـر









للسالفـه باقــي


للسالفه باقـي وللوقت كلمه =تقولها لك عـني احوال الايــام


اللي ذرف لك تالي الدمع دمه =بكرى تشوفه حب ويشوفك اوهام


لو للغلا ياجارح القلب ذمـه =ماكنت انا اسهر وانت في ليلك تـنام


ياللي تعشق الجرح ماذقت همه =ولا شكـيت الحزن ليلـه من العـام


غير الوفـا ماشفت فينا مذمه =واكبر عيوب الورد تعطيـر الانسـام


ماعاد قلبي فيك شـي يهمـه =بينـي وبينك دارت ايــام وايـام


مات الغلا في قلبي اللي يضمـه =واليوم ذق من صدنا موت الاحـلام











لو تبادلني سلامـي


لوتبادلنـي سلامـي بالسـلام =واضـحٍ فيك الزعل ماهو قليـل


باختصارك ياحبيبـي للكـلام =والتفات عيونك بسرعه دليــل


واضح أنه ماكفى عذري مـلام =تلتفت يمـي وفي لحظه تميـــل


كم علي أخطيت وتمـر بسـلام =ارتضي عذرك وقلبـي مايشيـل


عنك اسامح والتفت لك باهتمام =وابتسم لاجيت ماكني عليـــل


انسى جرحي من غلاك ومن هيام =نفسي اللي فيـك ماترضى بديـل


لاتذللني سبب زلـه حـــرام =ماهقيتك يوم ترضى اني ذليـــل


لك شرحت الوضع في كل احترام =وش تبي أكثر من العذر بدليــل


كان قلبك حب غيري ماتــلام =مالـي الا انسـاك في صبرٍ جميـل








لو ماتشوف الود


لوماتشوف الود عيني بعينـك =صدقت هجرانك وكذبت عيني


ولو ماتحس أيدي برعشة يدينك =لاجيت اسلم قلت مانتب تبيني


جمعت مع صدك بعينك حنينك =حيرتني واحترت لك في حنينـي


بالله قلـي ويش بيني وبينـك =يغريك صد ويبعدك ماتجينــي


ماشفت شخصٍ مثل طيبك ولينك =وماشفت انا أقسى منك أبد في سنيني







ما اقول لك مخطي


ما اقول لك مخطي ولا اقول غلطان =أقول انا فـيك الظروف اخذلتني


مانت اول اجروحي ولا أول انسان =غالي ومن شوفته ظروف احرمتني


في قلبي جروح وتباريح واحــزان =وعلى الصبـر دنيا الشقا علمتني


الله معك وانس الذي بينـنا كـان =غلطه عليك اشواق نفسي رمتني








ماغيّرك غيري


ماغيّرك غيري حقيقه وأنا أخطيـت =غريتـك بكثر الغلا واحترامـي


أسرفت لك بالود لين أني احييـت =فيـك الغرور بلهفتـي وبهيامي


ماتدري أنك بالجفا لو تمـاديــت =تفقـد غلاك وبك يقل اهتمامي


أعتاد من صدك على الصد إلى أبطيت =ويصير مالك عندي الا السلامي


طرد السراب ورجوة الحي للميــت =ماتخدع إلا معه قلـب عامـي













محبكم
ابوسحر

[ابوسحر]

ماكنت في بالي


ماكنت في بالي ولاكنت هاويـك =وماكنـت يالغالـي تثير اهتمامـي


وماكان يعنيني إلا جيب طاريـك =اسم وسمـعتـه مثل كل الاسامـي


لين اجمعتني في عيونك لياليــك =وحسيت لي عندك مكان ومقامـي


شديتني في طيبـةٍ شفتها فيـك =وكسبت تقديري وكل احتـرامـي





مالـي أسف


مالـي أسف مالي بعمري محاسيـف =إلا عليهــا يازمانـي عليهـــــا


وجدي عليها يافراق المواليـــف =تحت الثـرى قلبـي خذته بيديهـــا


كانت حياتي كانت الحـب ياكيف =أدله بعمري مثـل وقـتٍ نسيـاهــا


بالقلب له حبٍ وبالعين له طيـف =وبخاطري كـل الهموم احتويهـــا












مالي ومال الوقـت


مالي ومال الوقـت مادمت وأياك =أنت الزمــن لي وانـت كل المواعيد


خذ من زمانـي كل وقتي ويفداك =مافي حياتـي لك من الوقت تحـديـد


أنت الذي في بسمـة من شفايـاك =أنسى همومـي والسعـاده لي تزيــد


وأنت الذي يااعـز غالي بيمنـاك =أخذتـني من بحـر الأحزان للعيــد


أقدر على نسيان قلبي ولا أنسـاك =غيرك أنــا يافرحة العمـر ما أريد





مستحيل أسلوبك بيـوم يتغيـر




لوصبرت أكثر تعبت أكثر وأكثر=ماورى رجوا غلاك إلا السـراب

مستحيل أسلوبك بيـوم يتغيـر =لاضما شفتك ولا شفتك سحـاب

غصن حبك لاهشيم ولاهو اخضر =فيك شوق وفيك رغبـه للغيـاب

أن طلبتك وصل خطواتك تعـذر =وان عطيتك صد كثرت العتـاب

صار همي كل يوم منـك يكبـر =والأمل لامن بنيته فيـك خـاب

خلنا نرتاح من اقدر ومـا اقـدر =وحيرة تملى شعـوري بالعـذاب

قلبي اللي لـو بنسيانـك تأخـر =مالقى لاسلوبك الغامض جـواب

أنس عرفي مرة أبعـد لاتذكـر =خاطري بالحيل من رجواك طاب




من سنه



من سنه وأكثر عيوني بالعيـون =تلتقي وتشوف نظرات اهتمـام


من سنه عيا الخجل فينا يهـون =ماتبـادلنا ولا حتى الســـلام


مشكلتنا دايـم الشوفه تكـون =لحظـة ماهيب تسمح بالكــلام


كـل ماناظرت بعيون الفتـون =زادني في نظرته شـوق وهيــام


امتاه الصبر يالقلب الحنــون =السنـه درات وعيني ماتنـــام


طالت الرجوى ومليت الظنـون =وش بعد صبري على رجواه عـام












نار المحبه



انطفت نــار المحبه بيننــا =وأحسب أنـه مابقى غير الرماد


يـوم هبت ذكريـات سنين =والتقينا صــار للجمر اتقـاد


من تـلاقت بالسـلام ايديننا =احترق من بينـنا ستـر البعاد


صار جرح الشوق يسأل ويننا =واعتلى وجه الجفا لون السواد


اشرقت شمس الحنــان بليلنا =وعادت ايــام المحبه والوداد















محبكم
ابوسحر

[ابوسحر]

نسيانك أرحم





نسيانك أرحم من رجاوي سرابــك =يامن قضى عمري وأنا في رجاويـك


حسيبك الله كم شكيـت من عذابـك =نفسي وجرح القلب ماهوب خافيـك


يمطـر لغيري من حنانــك سحابـك =ويمـوت قلبي ضاميٍ بيـن اياديـك


ياللي بحبـك مارحمــني غيابـــك =أعطيك قلبي وانت تبعـد خطاويـك


رجيت حبك بس طال الرجا بـــك =ليـن انقطـع بالياس كل الرجا فيك














نصف الشهر




نصف الشهر مر وتعدت لياليـه =ماشفت زول مريـح العين والبـال


اللي على غيره من الناس مغليـه =واظن هو مثلي بعد نفسه الحــال


يغيب عن عيني ويبعد خطاويــه =خايـف يثقلنـا بجيات ووصــال


وانا اتسلـي عن غيابه واخليــه =أخشـى يصيبه كثر الالحاح بجفـال


كم مرة يطري على بالي أدعيــه =واصير أنا والنفس والقلب بجـدال


الوصل إلى ماصار من رغبة فيــه =ماهوب ينفـع في دواء جرح الآمال


إن كــان ماجا رغبـةٍ منه ما أبيه =يجي يجاملنـي بحـال من الاحـوال






ودي أشرح لك




ودي اشرح لك احاسيسي وخايف =والحيا يمنع لســـاني لايقول


تستحي منـك المعاني والشفايـف =كـل ماحاولت اعبر لك واقول


الحروف بخـاطري كلـه ولايف =بس إلى شفتك من الخاطر تزول


كـل مـابانت لي البيض الرهايف =في شفاتك صار بي صمتي يطول


لامتى بينـي وبينك هـالكلايف =ليتنا يـاصاحبي نلقى حلـول














ياسيد احبابي





ياسيد احبابي على غيرك اغليـت =قلبـي وعن غيرك تعذر حنيني


ويش انت بي ياسيد الكل سويـت =أعميت عن كل المخاليق عينـي


لعيونك بكل المحبيـن ضحيــت =واهديت لك قلبي وباقي سنينـي


مدري لو انك يوم عني تخليــت =وشلون ابنسى الود بينك وبينـي


بالحيل في حبـك بقلبي تمـاديـت =وابعدتني عن حب نـاسٍ تبينـي


زرعت نبت الشوق بالقلب واسقيت =من دمي غصون الغلا في يدينـي








ياغالي الـود





ياغالي الود قلبي فيك شديتــه =ولعتني فـيك يــالغالي وحبيتـك


ماقبلك أحدٍ من أول شوفه اغليته =وشلون مدري هواك القلب واغليتك


وماقبلك احدٍ تولعت وتمنيتــه =أكثـر من أني تولعـت وتمنيتــك


ملكت قلبي لك لحالك ونسيتـه =ماكن بالناس غيرك يـوم لاقيتـك


محبتك غير يا أغلى انسان حبيت =ما اذكر ترجيت كثر اني ترجيتـك


الله يقود النصيب اللي ترجيتـه =تعطيني اشواق قلبك مثل ما اعطيتك











ياقصيده





ياقصيده بيـن الاوراق القديمـــه =ياحبيب صار حبك ذكريــــات


مابحبك لو تذكرتــه غنيمــــه =أسأل الوقـت الذي بالحـب فـات


كان حبـك في سمـا دنياي غيمــه =حاجبـه عن عينـي افراح الحيــات


أرتجيك الحب وتزيـد الظليمـــه =ماحصل حتى ولامنـك ألتفـــات


بايـعٍ لك فرحتـي من غير قيمــه =السعاده لـك وانا هـم وشمــات


ذابـت الرغبـه بقلبي والعزيمـــه =لونويـت الحب لـي ماقلـت هات


















محبكم
ابوسحر

[ابوسحر]

يامجاريح السهر




يامجاريح السهر يامجاريح النظــــر =مثلكم ليلـي كـدر مثلكم مانيب أنام


كل قلب به جروح يشكي الوقت وينوح =لو يعاتبـه النصوح مانفع فيـه المـلام


من فقد شوفة حبيبه من به جروحٍ عطيبه =دمعته ماهي غريبـه عيشته كله سقـام


الغلا حظ ونصيب به يصيب وبه يخيـب =كل قلب له حبيب يرتجـي منه اهتمـام







يامراسيل العيون



يامراسيل العيون الحايــرات =أنثري فوق الهـدب مـوج الحنين


رجعي شوقٍ مع الأيـام فات =لاتقولين انتهــت هــاك السنين


تو حبي مابعد بالقلب مــات =في عيونـي لوتشوفينــه يبيــن


حافظٍ عندي بقايا الذكريـات =أذكر اللي فات وأنتي تذكريـــن


في عواطف خافقي باقي حيـاة =والوفــا والـود باعماقـي دفيـن


واتمنى ايامنا اللـي ماضيـات =يالعيـون الحايــره لاتبخليـــن







ياهـــــــم




ياهم ساعدني قضى العمــر ياهــم =خـل ابتسـم بالعمــر لوهي دقيقــه


ياهم تامـرني وأنــا اقـول لك سم =أرخــص لـك الدنيـا واعيش بحريقـه


ياهم انا كم مرةٍ قـلت لـك تـــم =وسلمت لـك قلبـي توليـه ضيقــه


ياهم منك بمجلـس الناس مـاالتــم =والناس كلٍ مجـلســي مايطيقـــه


ياهم تسري بي مثل سريـة الـــدم =ولاشي ياهمي مسيـرك يتعيـقـــه


ياهم صادقتـك من الصغر ياكـــم =بيني وبينك من عهودٍ وثيـقــــه


ياهم صادقتك وقلبـي تعــلـــم =واليوم أنا روحي بروحـك غريقــه









يايمين الخير





يـايمين الخـير يـايمنى فهـد =فــي ظلالك مستظـلـن هالبلد


تزرعين الخـير لاولاد الولــد =وطايــلٍ خيـرك جميع المسلميــن


يـايمين الخير في ليـل ونهـار =تنصرين الدين في كل اقـتـــدار


في حرم مكه وطيبـه لك عمـار =ومسجد الصخره لقى منك الحنيـن


يـايمين الخير خيرك للجميــع =عم خيـرك كل موطنا الوسيــع


الصحاري الضاميه صارت ربيـع =وأزهرت بالخير رغــم الحاسـدين


يـايمين الخير واصلتي العـمـل =سكـة التعليم حاربتـي الجهـــل


السعودي عانق الغيـم ووصــل =للكواكب للفضـا باقـصر سنيــن













يبقـى الغـلا




يبقـى الغـلا لوفرقتنــا المشاريـه =والشرهـة اللي بالخـواطـر تروحــي


كـلٍ يعاتب بعض الاحيان غاليــه =والحـب يبقـى فـوق كل الجروحـي


الحب لوشانـت علينـا لياليـــه =نصبـر وفــى سـر الغـلا مانبوحي


طبع الوفـا بقلوبنـا مانخليـــه =يسري بروحه مثل ماهو بروحـــي


حبي على باله ولـوكنت جافيــه =وهو على بالي وحبـه طموحـــي


قلبي ولو صديت وابعدت بيديــه =وبنظـرتي شوق اللقا له وضوحــي









يقول وش زودي




يقول وش زودي علـي الناس عنـدك =وأقول كلـك ياهـوى خاطـري زود


يقول وش بي للمحبـه يشــــدك =وأقـول مدري أنشـد عيونك السود


كل الحلا بالناس ماهـوب قـــدك =ياللي مع اخـلاقك بك الحسن موجود


كل الزهر ماشاقـني مثـل خــدك =ماشاقنـي بغصونها نامـي العــود


نفسي مشت بركابهـا ليـن حـدك =ماعـاقها زيـنٍ مع الناس موجــود


أغليـك يالغالي ورجـــواي ودك =لاتجـرح اللي لك من القلـب مشدود

















محبكم
ابوسحر

[ابوسحر]

لاتقطع اسباب الرجا




لاتقطع اسباب الرجا فيك مرة =خل الرجـا لو ماصدق فيك يبقى


ترى السراب اللي خداع ومغره =ينعش رجا الضامي وهو ويش يلقى


حبك عسى ربي يكـافيني شره =عجـزت عنـه بكـل شئ اتوقى


أجي لدربك كـل يومِ وأمره =مشتـاق أدور شوفتـك واتهقى


ضامي حنان وشوفتك لي مبره =ومن الجـروح القلب ياما تلقى


ماأحدِ حداني للشقى والمضرة =إلا أنت ياللي وجنتي منك زرقا



اشره وعاتبني





اشره وعاتبني عتـاب المواليـف=ماشوف للتجريح يازيـن داعـي

من قبل تجرحك بهوايا المحاسيف=اسمـع وقـدر ياحبيبـي دفاعـي

يمكن تقول المخطيات الصواديـف=للجرح مثلـك لا تزيـد اندفاعـي

جرح الغلا في خاطري منك ماشيف=ماشفت لوعة خافقـي واللتياعـي

كلي على صادق هوانا المخاويـف=لا ينتهـي مـن بيننـا لضياعـي

اكتم معاناتي وأجيلك على الكيـف=واخاف من صدك يزيد التساعـي

يامـا التقينـا بالمـوده ملاهيـف=عمر العتب ماصار حكـمٍ قطاعـي

وقتي معك ماغير شتاه والصيـف=حبك بقلبي لـو طويتـه شراعـي


غبت




غبت وبدالك جابه الله على الـذوق=قلـب لقيتـه فيـه نسيـان مافـات

قلب سرقني من رجاويـك برفـوق=وانهى بقلبي مـن هـواك المعنـاة

بادلته الإحسـاس بالـود والشـوق=وداويت فيه اجروحي اللي خفيـات

وارتاح قلب كان يرجيـك مشفـوق=رهنتـه لحبـك ولاسـج لحظـات

ضيعت قلب كـان بيديـك موثـوق=وأهديتـه لغيـرك بليـا حسافـات

صبح الغلا بين بعيني لـه أشـروق=وانهيت من ليل الرجا فيك الآهـات

مابي لك أعذار ومابي لـك حقـوق=عن وقتي اللي ضاع شوق ومدارات




يقـول وشلونك




يقـول وشلونك يبي يجرحــن زود =كلمة عطـوف وجرح قلبي وراهـا


يقولـها والقصـد بعيونـه السـود =الكلمــة اللي قالهــا ماعنـاها


بسلوب طيب القلب والعطف والجود =يجرح ويدرك غايـةٍ ماحكاهـــا


والمشكل أني لـه من القلب مشدود =تغـار روحي من غلاه ونساهــا


يدري بحبي لـه ولامـنه مـردود =إلا ان نفسي للمذله حـداهــا


يذلني لاقلت ياناعـم العـــود =وإلى ابتعـد زود على الروح داها


الصبر قالوا لويطول له حــدود =وانا لعينه صبر قلبي عــداهـا



غمضي عينك



غمضي كـودك تشوفينـي خيال=لاعجز ناظرك يلمحنـي بشـوف

لوصدوق الحب يعطـى بالسـؤال=قلت سوي بي جميلـه ومعـروف

كيف ابرجي منك للخطوه وصـال=وانتي اعند في نظرك من الظروف

اتركيني للأمـل فـي كـل حـال=يكفي ان جيت بخيالك بالصـدوف

المحبـه شـف مافيهـا جــدال=والغلا ماتصنعه بعض الوصـوف

كـل هالدنيـا مــرده لـلـزوال=وش نفع من ضاعت ايامه حسوف




















محبكم
ابوسحر

[ابوسحر]

آخر آهاتي




يا آخــر الآهـــات هـز الرجا فيـــــــــك=غيـابــك االلي صـرت انا منـــه محتــار



غايـب وانا أشوفـك بعينـي واراعيــــك= من غير ماتدري وأدور لـــك اعــــــذار



اشـتـاق لمصـافحـك وابعـد واخليـــــــك= في راحـتـــك مادمــت للبـعد مختـــــــار



مادام غـيري في حـياتـك مـسـليــــــــك= ياقــرب يــوم خاطــري عنــك يـنـــــدار



خذ راحتــك دور على من يهنيـــــــــك= أيـــامـنــــا كلــه صـواديـــف واقـــــــدار



حـتى العتـب ماني معاتـب لياليــــــك= عاتبتهـا من قبلـك بغــيــر وش صــــــار؟



عـنـدي قـناعـه أن شخـص يجـافيـك= مامــن رجــاه الا 00 يولــــع بك النـــــار



أضحـك وصدق ضحـكتـك لين ينسيك= وقـتـك غــلاه وبادله صـد وانكــــــــــار



كذبة أيامي



ياكذبة أيامي سراب الأماني =يوم انكشفت للنفس قلبي تناساك
عاتب ضميرك لاتعتب زماني =وش فيه نساني غرامك ودنياك
ناظر جروحي أنت تلقي معاني=سعادتي بك يوم أنا أغليك وأهواك
صديت بي عن كل قاصي وداني=صرت الزمن لي .. والمخاليق ذكراك
أكثر من اللازم وأنا منك أعاني =من عرفتي بك ماتهنّيت وياك
لين انتهت بالياس كا الأماني =حررت نفسي من عذابك ورجواك
ابعد بعيد ولاتمنى حناني=ساير غرور يوم أنا أرجيك قسّاك





بيني وبينك







بيني وبينك مابقي غير مافات =ياللي لغير الجرح مايوم حبيت

سامحت مرات وتغاضيت مرات=للعذر ويش من المعاذير خليت

ماكان حلمي ضعف لو طول اسكات=نفسي على كثر الخطا كل ما أخطيت

كررت غلطاتك وكثرت زلات=نفسك وانا غريتك بكثر ما أغضيت

مافاد بك صبري وكثر المدارات=ضاقت سعة حلمي وبالحيل مليت

اليوم أنا مقفي ولابه مراوات=ولعزتي معذور لوفيك ضحيت

حاولت اعلمك الوفاطول الاوقات=وقبلك تعملت الجفا منك وأقفيت











محبكم
ابوسحر

[ابوسحر]

من سألته عنــــــك




من سألته عنـك في وجهي تبســــــم= قال هي تسـأل بعــد نفـس الســؤال



ابتسمـت وصرت في صمـت أتعـشــم= واتذكـر طيفـك اللي بالخيــــــــــال



اعتصـر قلبـي من الشوق وتــــــألم= منوتـي تكرار شوفـــك والوصـــال



ما اقدر اشكي شوق قلبي واتكلـم= صابــرٍ ومـطـــولٍ للهــــــم بـــــــال



ياعذابــي كان أنـا فيـك أتوهــم= والغـلـى مالــه عـلـى بالك مجـــال





رحــلـــت مع ذكـــــراي





رحلت مع ذكراي وأبعـدت بالحيـل=فـوق النفـود لذكـريـات قديـمـة


ذكـرت ماضـي وقتنـا بالمداهيـل=وقت الربيع وربعي أهـل الحشيمـة


ذكرنـي أمسيـان وأقبالـة اللـيـل=نار الغضا ووجـار وأرواق خيمـة


واعناق دخان الغضا لريحـة الهيـل=ونور القمر مشرق على اطراف غيمة


الارض رطبه توهـا مرهـا سيـل=ريح الندى وازهورهـا فـي نسيمـه


بين الرجال اللـي تزيـن التعاليـل=معهـم وتلقـى للسواليـف قيـمـة


قلوب اصفى مـن قـراح الهماليـل=من كـل حقـد وكـل كـره سليمـة


ربعٍ على الشـدات مثـل التساهيـل=معرفة الواحـد مـن أكبـر غنيمـة


رغم الظروف ورغم كـل الغرابيـل=نفوس طيب وفـي بعضهـا رحيمـة


مافيـه فـرقٍ بينـنـا بالمكايـيـل=لاذا ولـد نعـمـة ولاذا حطيـمـة


ولافيه فرق في عـروق المجاهيـل=هـذا ولـد حصـه وهـذا فطيمـه


وصار التعامل بيننـا اليـوم تمثيـل=وخـداع ونفـوسٍ رديـة سقيـمـة


والدين قـل وقـل حلـم الرجاجيـل=سهل تحليـل الشـي والا تحريمـه


نركض ورا الدنيـا سـواة المهابيـل=سهمٍ نزل وأسهم لهـا صـار قيمـة


نعمـة ولكـن مالقينـا محاصـيـل=نعمـة ولكـن مانـحـس بنعيـمـه


والله يسـتـر حالـنـا بالمقابـيـل=مافيـه نعمـة للبـشـر مستديـمـة







عندك زهور العطر صارت كذوبه





عذبــه ياكل الذوق بالحيـل عـذبه=ماظــن بين الناس مثلــك عـذوبــه

البارحه حســن القمر صار كذبـــه= وعندك زهور العطر صــارت كذوبـه

حتى الفراش احتار من وين دربـــه= بينـك وبين الـورد ضيــع دروبـه

واللي بسحر الزيـن حسنه يشـبــه= لوناظــروك الناس ماشبهــو بــه

وصفـك على كل المخاليــق صعبــه= وان ابتسمتي زاد وصــفـك صعـوبه

رقـه وحنيـه وعـطـــف ومحـبـــه= وعـنـد الجميع الله عليـك محبــوبه




غـبــت جـــــســم





غـبــت جســم وفـي مـشاعـرنا حيـيـت= رحمـة الله لــك يافيصــل بــن فهـــــــــــــد

في بلدنـا والشبــاب اللي بـنيــــــــــــت= باقي ذكــرك ولـــك مـنــــــا وعـــــــــــــد

بالشبــاب لعالــي الفكــــر أرتـقـيــــت= ليـن واكــب كل نهضــات الـبـلــــــــــــــد

بيـدك البيضــا عطيت وما اكـتـفـيـــت= منشــآت ومــدن وكــــل لـــك شهــــــــــد

وفي محافــل عــالمـــــة أعــتلـيـــــت= في شــبــاب بلا دنــــــا عــز وسـنــــــــد

صرت والد للشبـــاب وما عطيـــــت= أحــدٍ أكــــــثــر بالمحــبــــه من أحــــــــد

وللأمانـــه رحمــة الله لك وفيــــــــت= من ولاة الأمــــر واتمـمـــت العهــــــــــد

وللشباب المسلم أوفيـت ورعــــيــت= في قيــاده صــادقـــه وبكــل جهـــــــــــد

ياعسى مسكنك بالجنـــــات بيــــــت= الجـواهـــر والــزمــرد لــــــه عـمــــــــد

وأخلـفـك سلطــان يكمــل مابديــــت= يســنده نــواف شـبلـــــك يا الأســـــــــــد

من نظـر نــواف قـال انــك بقــيـت= بينـنـــا ماغـــبــت عـنـــــا باللحـــــــــــد

انتهــج نـــواف نهـــج به مشيــت= من نـظــره يقــول فيصـــل بن فهـــــــــد








أعـمـت الغـيره عـيونـــك للأســـف






خـاب ظني فـيـك والوضع واخـتلف= بعـــــد ماظـنـــيتــك انســـانــه مــــلاك



أعمـت الغـيره عـيونـــك للأســــف= واندفـعـتــي مع ظنـونـــك من قـسـاك



ماكـفــاك اللي بربـه لـــك حـلـــف= ماخـدعـك وخـان لحـظـه في غـــــلاك



وان قـلبه بالمحـبـــه ماعـــــــرف= غـير حـبك ياشقــا النـفــس وهــــواك



قـلبي المجـروح من ظلمـك نـزف= كل ذرة حــــب ســـاقــتـــه لـرضـــاك



ابعـدي وابعـد كـفايــه ماوصـف= قـبلــك اخـلاص وشـوقــي في رجاك



بيـننـا أيام وتـشوفيـن الصـدف= كل ماجـــــت بــي تذكـرك بخــطـــاك















محبكم
ابوسحر

[ابوسحر]

تسرقـــني اللحظات






تسرقـــني اللحظات لاصرت وايــاك =كن الزمن غـــير الزمــــن في حضــورك



من كـثر ما أحبك ومن كثرما أهواك= ومن كـثر ما عـينـي تـشفــــق ظهـورك



حـتى مكانـك لاتـركـتـه تمـنـــــــاك=مـثـــلى ولا يبـقـى لنـــــا الا عــطـورك



نبكـي غـيابـك ونـتـمـنـى مـلاقـاك =ياللـــي يعـــلمـنا المــحـبــه شعـــورك



عطوف قـلب وطيب والله أعطاك= من كل حسـن وماطــرى لك غــــرورك



ماترتويك العـين ياللي مراعـــاك= يــرد روحـي في مهـاديـــب حـــــورك



أغليـك فوق اللي تصور ويهـواك=قـلبـي ويطـرد وحـشـتي صبح نـــورك



لو ما تسلـي قـلب الأشواق ذكراك= لاغـبــت ذاب مـــن الحـنيــن لمــرورك



الله يحفـظك ياحبـيــبي ويرعـــاك= ويـديــم في دنـيــا السعــادة سـرورك



ياللي لقـيـت الحـب كلـه بدنيــاك=وزرعـت عـمري في شواطي بحـــورك




أوعـديـني لـو زمـانــــك غـيـــرك









اكتبينـــي حـــرف عشـق بـدفـتـــــرك= يجـرح النسيــان وظـروف الزمــــــــــان



وارسمينـي قــلــب عـشــقٍ ينـظـــرك = يبتسـم لــك حــب وأشـواقـــــه تـبــــان



واوعـديني لـــو زمـانـــــك غـيــــرك = أني ألقـــى بذكـرياتـــــك لـــي مكـــــان



مثـل مانـي بأعذب الشعــــر أذكــرك=واذكـر إني شفـت مـنــك أصـدق حـنان



أدري أن الشـوق مـثــلي سهــــــرك =لـكـــن الأيــــــام مـا منـهـــــا أمــــان



أوعــدك مايــوم قـلبـــي يهجــــــرك =لو أخـــذك الـوقــت والا الحـــظ خـــان



ياللي بقـلبـي وعــينــــي كـبـــــرك =مالـقـيتــه فـيـك من عـطــــف وليـــان




محبكم
ابوسحر

[ابوسحر]

( لاتـســألـيـنـــي )



لاتسألينــي ليـــه طـــال ابـتـــعادي=هــذا قـــرارك وانتـي اللي اخـذتــيه



ولاتــرسليــن ولاتقــوليــن عـــــادي=ماينـتـداوى جرحــك اللــي جرحـتـيه



راسي رفــيع وفـي حياتــي مبادي=مانيـــب شخـــص ماتهمـــه مباديـــه



ولاني رخيص العشق سهل أنقيادي=بالشــــوق وإلا بالتغـــلي تــذليــــه



ياللي فهمتي في غلاك أجتهادي=شخــص تـذلــينه علـــى مابغـــتــيه



غـــرك لــعــذال المحبـــة عنــادي=ودرب الوصال اللي تعب قلبي أبنيه



اليــــوم مانـــتي بالمحبـــه مرادي=جـــواب واضــح عن غيابي عرفتيه




( موسم الغفران )




سيد الأشهر هلاله عـن قريـب=موسمٍ للخيـر وتطهيـر القلـوب


لاحرمـك الله فضلـه يالحبيـب=موسم الغفران وتكفيـر الذنـوب


كل نفسٍ فيـه ترتـاح وتطيـب=وكل غافل فرصته يرجع يتـوب


فيه فضل الله يزيـد ويستجيـب=كل داعي في شروقه والغـروب


خذ من احسانه مثل غيرك نصيب=واغتنم ياذاري العيـش الهبـوب


شمس عمرك يوم يسرقها المغيب=تعتري ويصير ستـر الله ثـوب


موسمٍ من ضيـع أيامـه يخيـب=وكل خير وشر بالعمر محسـوب




( قصيدة العامرية ورد الشاعر عليها )




العامرية سيدة فاضلة وشاعرة من أهالي الرس قام أحد الزملاء بإرسال

قصيدة لها على موقعي قال انه سمعها في أحد البرامج الشعبية وعرفت

فيما بعد أنها سيدة جليلة تقيم بالرس ولها أبناء وبنات إجلاء

وتأثرت بالقصيدة كثيرا وقمت بالرد عليها 0 وسأحاول البحث عن قصائدها

اليكم القصيدتين


قصيدة العامرية :




رحت اتمشـى للرضيمـة ومريـت=على مكـانٍ دمـر الوقـت مبنـاه



هذا مكان البيت وين انـت يالبيـت=طول الدهر دمه وبـالأرض سـاواه


وين القليب وويـن ذيـك المنابيـت=وين الغريس اللي على جال منحـاه


وين الكرم والطيب والجود والصيت=وين الذي لاجا له الضيـف حيـاه


وقفت انا عنده وانـا اقـول ياليـت=ليـت الزمـان يعـود لاواحـلالاة


أرضٍ بها بـاول حياتـي تربيـت=لو طالـت الأيـام والله مـا انسـاه


وحار القدم عنده وغمضت واغضيت=كنه حلـوم وبـدد الصبـح مسـراه


وجضيت بالعبرات هن والتناهيـت=وعيني تحير ناظـره وانتثـر مـاه


ياموت ياليتك إلـى جيـت ياليـت=ماتاخـذ الطيـب ومثلـه وشـرواه


ويالله لطيفه هـي وعامـر تمنيـت=أمـي وابـوي بجنـة الخـلـد يالله


والله ماقصدي طرب يـوم غنيـت=لاشك من حكـم الدهـر والمعانـاة


ويارب يالله رحمتـك كـان زليـت=يارب تغفـر زلتـي مـع خطايـاه





وكان رد الشاعر لها :






يالعامرية هاضني منك ما أوحيـت=وجضيت بالعبره وانا الحزن ما اقواه


كني عنيـت وبالرضيمـه تمشيـت=وشفت المكان اللـي زمانـه تعـداه


في حالتك عشت المشاعر وحسيـت=كيف الغلى لامن عصر قلب وابكـاه


واللـي يلومـك بالبكـا والتناهيـت=عزالله انه عايش بقلب مـا اقسـاه


يالعامريـة طبـع الايـام تشتيـت=لم الشمل والوقـت هـذي سوايـاه


دنيا كفـى الله شرهـا دون توقيـت=يسبق قدرها من نـوى فـي نوايـاه


إن كان عامر قيل مرحـوم ياميـت=واخذ لطيفه ساطـي المـوت وايـاه


فالله عليك أنعم ولـك نـور البيـت=بنـات ورجـالٍ تشـرف بطريـاه


الله يحفظـك يـاذراهـم بتثبـيـت=ويطول بعمرك بمرضات وارضـاة


ويجيرهم من شر سـود المباخيـت=وفي برهم يسعـدك ربـي بحسنـاه


اقولهـا وانـا مـن الدمـع بليـت=خدي على أمـي يرحـم الله مثـواه


راحت ولـو قالـوا يكفيـك بريـت=فيها ونشهد قلـت حـق ونقصنـاه




( حــل ثـانــــــــي )




اعذريني لو على الفرقا قويـت=ماتركتي باختياري حـل ثانـي


كل شي فيه ضحيت ورضيـت=وللاسف قلبك باحاسيسه أنانـي


عشتك أيـام وحقيقـه مالقيـت=في مشاعرك المحبه والحنانـي


جيت لك غيمه من الحب وهقيت=اني القى بوسط قلبك لي مكاني


وكل مابينت ضيقي واشتكيـت=منك لك حسيت في ذل وهواني


والله انـي يعلـم الله مانويـت=غير كل الخير ولك قلبي دعاني


اعذريني لو عن ايامك سليـت=ويش قلبك لو بغيت اندم عطاني

[ابوسحر]

( لاتـبعـد بظـنــك )


هذه المشاركة تحتوي على محتوى مخفي






( بين البرد والمطر وعشق عنيزة )









ماكتبت المحبه لجـل عينـك قصيـدة=جيت كلي قصيد وجيت كلي حـروف


الغلى جابني لـك مـن دروب بعيـدة=سطوة الشوق ماهي تعترف بالظروف


دامس الليل دونك والظـروف العنيـده=ولو يزيد المطر في مظلم الدرب اشوف


وبارد الجسم يدفا من لهايـب وريـده=والغلى لك يهون مايجي من صـدوف


من عشق مثل حسنك لو ظروفه شديده=ياعنيزة يجي لـك ماتـرده حسـوف


نفسي اللي على درب الكلافـه سعيـده=ماشكت من طريق ولاثنتهـا حتـوف


لاذكرت الغضا والنفد صارت زهيـده=نفسي بحب غيرك من بـلاد التـروف


والله اني مـن اللهفـه بـروحٍ مريـده=ماتحمل على دربـي ثوانـي وقـوف


قلبي اللي بشوفة ( ساعتك )يوم عيـده=ياغلانا بحبك طبـع أهلـك معـروف







( جايز غلطت )





جايز غلطت وجايز انتي غلطتـي=ماهو مهم الحين من كان غلطـان

اللي مهـم الحيـن لامـن ذكرتـي=قصة غلانا فاذكرينـي بالاحسـان

دامك على هجران حبـي قدرتـي=وانا بعـد مثلـك نويتـه بهجـران

نصيبنـا مكتـوب لانـا ولا أنتـي=نختار في درب السعادة والأحـزان

هـذا قدرنـا مايفيـد أن ندمـتـى=على الفراق أو صرت أنا يوم ندمان


كل الحياة فـراق مهمـا حزنتـى=وإلا حزنت الأمـر لمدبـر الشـان


اللي مهم الحين أبي لـو سمحتـى=ذكرك بخير لماضـيٍ بيننـا كـان






( شكرا على لطفك )






شكرا على لطفك وشكرا على الذوق=وشكراً على وقتٍ سمح فيه وقتـك

ظنيت لي باقي من أيامـك حقـوق=خدعت نفسي وأحسب أني فهمتـك


جاملتني بالود ليـن أبلـج شـروق=شمس الحقيقة واعتذرت وعذرتـك

كلي أسف عن كل ذرة من الشـوق=حملتها لك وآسـف أنـي جهلتـك







( فرحتـى غيـر )






كل معيـد بـس أنـا فرحتـى غيـر=لعيون من حبه لـي أفـراح وأعيـاد


ياللي صباح العيـد عـذب التعابيـر=مع صوتك الدافـي للافـراح ميـلاد


كل عام وانتي يا أعذب الناس في خير=عسى الفرح لك طول الاوقات يـزداد


يامن زرعتي عيـدي زهـور نويـر=وطير السعد غرد مع الصبح بانشـاد


انتي لي الفرحـه وصبـح التباشيـر=وانتي نهار العيد لـي نشـوة اسعـاد


فداك انـا مامنـك بالحـب تقصيـر=وعليك عيـد الخيـر بالخيـر ينعـاد







محبكم
ابوسحر

[ابوسحر]

( المواســــــــاه )




ياشقيق الروح روحك لوتطيـح=كان طاحت من همومك من سنين


يامروض هـم وقتـك ماتريـح=وللأسى والضيم راسـك مايليـن


شامخ بالصبـر عينـك ماتبيـح=دمعهـا للهم لـو قلبـك حزيـن


حظك اللي بالسعادة لك شحيـح=علمـك تصبـر وبالله تستعيـن

صرت من همك بهمك تستريـح=مثل نبت بلافح الصحـرا متيـن


شامخٍ في وجه شمس ولفح ريح=ماثناه القيظ مع طـول السنيـن






( التسلية بالمشاعر )






للتسلية تلقين غيري من الناس = ناس تحب التسلية بالمشاعر

الله خلقني طيب القلب حساس = مشاعري ماهي خداع ومظاهر

ما أقدر على جرح المشاعر والأحساس = يصعب علي أكسر للاحباب خاطر

وانت تعرفين المحبة على أساس = اليوم لك غالي ولك غير باكر

يشد قلبك كل طاري وهوجاس = وأنا على هالوضع مانيب قادر

أحب أن اللي عشرته ترفع الراس = وتبيض الوجه بنقي السراير










( مـردك للـنــــــدم )





مردك 00 للندم 00 وأدري

مثـل قلبـي فـلا تلقـيـن

وإلـى دارت بـك الدنـيـا

عرفتـى بالوفـا قــدري

وعرفتـي أنـي انـسـان

صدقـت وماخدعتـك يـوم

ولايــوم 00 تناسيـتـك

ولا يوم 00جرحتـك فيـه

ولا فـي يــوم ذ ليـتـك

وبالـتـالـي تركتـيـنـي

ومردك 00 للندم 00 وأدري

0000000

بعمري كم تعبـت أرجيـك

وكـم عانيـت لوعـاتـي

اجاملك الزعـل وأرضيـك

وأنسـى كــل ضيقـاتـي

أدري خاطـرك وأصـبـر

وأخفـي حزنـي بـذاتـي

وبالـتـالـي تركتـيـنـي

ومردك 00 للندم 00 وأدري

0000

خلاص اليـوم مالـي بـك

انـا مليـت مـن دنـيـاك

كثـر ماكنـت أهلـى بـك

يهلـي قلـبـي بفـرقـاك

ماعاد الشوق يطـري بـك

أنـا مليـت مـن دنـيـاك

ومرد 00 للندم 00 وأدري
000000




( خسارة فـضيعــة )






مر الزمان وراحت أيـام وأيـام=بيني وبينك في غياب وقطيعـه

ومريت أطالع مابنينا من أحـلام=لقيتها في حال صارت مريعـه

فيها الأمل متحول كلـه أوهـام=وفيها الغلى ميت وهو في ربيعه

وفيها زهر ذابل وأثرموضع أقدام=وقلوب مرسومه وأماني صريعه

ياقسينا باصدارنا بعض الاحكام=على الغلى اللي لجل غلطه نبيعه

مدري على اللوم والا أنت تنلام=بس الوكاد أن الخسارة فضيعـه
0










( قـرار البعـــد عـنــــي )








لوعرفتـي وش بقلبـي والنوايـا=ماتعجلتـي قـرار البعـد عنـي

لوصبرتي تعرفي ويش الخفايـا=غير موتك ماقدر ياخـذك منـي

جيت أنور في نواحيـك الزوايـا=واستردك من زمن حزنك واهني

جيت ابدل في لياليـك الحكايـا=لين اخلى كل نجمه لـك تغنـي

جيت من ربي بقلبي لك وصايـا=ازرع البسمه على شفاتك واحني

لين مايبقى مـن احزانـك بقايـا=واني احسن فيك طول العمر ظني

وللاسف رديت في كـل الهدايـا=يوم عجلتي قـرار البعـد عنـي







محبكم
ابوسحر

[ابوسحر]

(أوعـديـني لـو زمـانــــك غـيـــرك )




اكتبينـــي حـــرف عشـق بـدفـتـــــرك= يجـرح النسيــان وظـروف الزمــــــــــان



وارسمينـي قــلــب عـشــقٍ ينـظـــرك = يبتسـم لــك حــب وأشـواقـــــه تـبــــان



واوعـديني لـــو زمـانـــــك غـيــــرك = أني ألقـــى بذكـرياتـــــك لـــي مكـــــان



مثـل مانـي بأعذب الشعــــر أذكــرك=واذكـر إني شفـت مـنــك أصـدق حـنان



أدري أن الشـوق مـثــلي سهــــــرك =لـكـــن الأيــــــام مـا منـهـــــا أمــــان



أوعــدك مايــوم قـلبـــي يهجــــــرك =لو أخـــذك الـوقــت والا الحـــظ خـــان



ياللي بقـلبـي وعــينــــي كـبـــــرك =مالـقـيتــه فـيـك من عـطــــف وليـــان








(أكــذب عـلـيــــــــك )






أكذب عليك أن قلت مانتى على البال=وأكذب عليك ان قلت قلبي بياديـك

أعتز في نفسي على كـل الأحـوال=ما أذلها وأرضى غرورك وأداريـك

أن كان في صدك هقيتنـي أحتـال=لرضـاك لاوالله خابـت هقاويـك

تموت أماني خاطري بك والآمـال=ولايموت بنفسـي العـز وأرجيـك

مانيب قاسـي لكـن الحـق ينقـال=مثل الذي ناخذ من الحـب نعطيـك

ماني من اللي في تعاملهـم أنـذال=ولاني ذليـلٍ تزعلينـه ويرضيـك

لي حق مثلك بالمحبه وإلـى مـال=قلبك بعيـد أميـل مثلـه واخليـك






( طـيـبتـى لا تغــرك )







طيـب ولكـن طيبتـى لاتغـرك=لايخدعك حلمى ولا طـول بالـي

كم خفت من يوم يجى مايعـذرك=قلبى وينسف سيرتك مـن خيالـى

ماشفتـى الا كـل شـى يسـرك=منى ولا في يوم جرحك طرالـى

عن غيرك من الناس قلبي يبـرك=وغيرك إلى جا مالقى له مجالـي

لين اهتمامى فيك بالحيـل غـرك=وقلتى تولـع بـي ولالـه بدالـي

غريتـك انــى قـلـت لله درك=وكبرتك بعينى على كـل حالـى

ظنيتى أن الشـوق فينـى تحـرك=ومالى غناة عنك طـول الليالـي

ضاع السلام وصار عنى يجـرك=للكبر خاطى ظنـك اللـى بدالـي

لكن بمـان الله بخيـرك وشـرك=وعسى الزمن لك طول الأيام حالى

ان كان به شى واخافـه يضـرك=فهو غـرورك والكبـر والتعالـى










محبكم
ابوسحر

[ابوسحر]

غـيـــــــــرة



بدل قناعاتك وحـاول عـن الشـك=تبعد ولو لحظـة تعـرف الحقيقـة

صعبٍ على ولو حلفت أقدر أقنعـك=أنك تظـن أشيـاء ماهـي دقيقـة

أحلف لك أنك مخطيٍ في تصـورك=وأن العهود أللـى عطيتـك وثيقـة

وتخطى وأنا ماودى أجرح مشاعرك=أسكت00إلى حسيت بالصدر ضيقة

متأكد أن الغلطة أللى تجـي منـك=مردهـا غيـرة مشاعـر رقيـقـة

لو كنت أحس أنك تبي عذر يبعـدك=والله فلا أتحمـل وجـودك دقيقـة

المشكل أنى عارفٍ ويـش يدفعـك=على الكلام ومشعـلٍ بـك حريقـة

ياصاحبي قلى وش الحل؟ وأسعدك=أللـي يحبـك ليـه نشفـت ريقـه









يـزول باســـــــك









يزول باسـك ياهـواي وغرامـي=ويردك الله بالسلامة عـن العـوق

يفداك ياعمري من أعـذب كلامـي=قصيد ماقلبك دفعنـى لـه الشـوق

ياللي جديـره بالوفـا واحترامـي=ياغاليه يامنبـع الطيـب والـذوق

عذر القمر لوتـاه نـوره وهامـي=إنه ظهر نورك على الليل بشـروق

وعذر الزهر لوهو خجل مايلامـي=تاه بعبيرك والنظر عنـه مفهـوق

وعذري أنا لو تاخذيـن اهتمامـي=إني بطيبك مابعـد شفـت مخلـوق

شوفي زهر قلبي من الشوق ظامـي=شوق الصحاري لاسطع لامع أبروق

عن غيرك من الناس لي قلب عامي=حتى النظر بعدك من العين مسروق

الله يــردك سالـمـه يامـرمـي=ويشفيك يامظنونـة القلـب يـاذوق







عـيا الشعــر





عيا الشعر عيت علـى المعانـي=قالت غلاك أجمل من أجمل قصيدة

حاولت اعبر عن شعور دعانـي=واكتب عن الأشواق صورة جديدة

كـل الشعـر ياغاليـه ماكفانـي=كل القوافي مـن خجلهـا عنيـدة

لاجيت أبوصف لك معانى حنانى=كل الحروف بوصف حبي زهيدة

لوشفتـى الأوراق تملـى مكانـي=أكتب قصيدة ثـم أغيـر وأعيـده

يضيق بحساسى وشرحه زمانـي=وقناعتى ماوصلت اللـي تريـده






محبكم
ابوسحر

[ابوسحر]

أرفـقـــــــي





أرفقـي بالقلـب بالله أرفـقـي=لاتردينـه لحـبـك والـفـراق

لاتردينه علـى الشـوق أتقـي=فيه ربك توه من الحـزن فـاق

لجل وجه الله من الهـم أعتقـي=قلبي اللي ذاب رجوى وأشتياق

لونسيتـك ماتناسـى مفـرقـي=شيبي اللي لاح من مر المـذاق

قلبـك لغيـري بشوقـه يلتقـي=وش لك بقلبي تشدين الوثـاق ؟

لاتسليـن بتعـب قلـبٍ نقـي=يوم قلبك من ظروف الوقت راق

مايسرك ينقضى عمرى شقـي=في رجاك وقلبك لغيري يسـاق

ومايفيدك لو أعيش اللـي بقـي=من حياتي في تعاسه ماتطـاق

أسألـك بالله قولـى وأصدقـي=ليه رديتى بعد طول الفـراق ؟





تغـيـير الأســـم








إن عرفتـك أو جهلتـك مايهـم=كلها عندي على أية حـال واحـد

مايغيـر شـي تغييـر الأســم=دام قلبك صار ناسينـي وجاحـد

بـس ودي بالجفـا مـا تتـهـم=قلبي اللي لـك وفـا والله شاهـد

والقصيـدة منـوتـى ماتنفـهـم=أنهـا ذل أو ترجـى أو معـانـد

أو تظـن أنـى أكايـد وانتـقـم=وأن قلبي من غيابك صار حاقـد

يوم جانـي علـم حبيـت اتعلـم=كان غبت أو جيت كله صار واحد







أعـــلان الرحـيــــــــــــــل







لويصير البعد وأعلان الرحيـل=لايهمك ضيقي من البعد عـادي

يكفي أنه في نظر غيري جميـل=ويكفي أنه ينتهى معك اجتهـادي

لاتظنـي همـي بفقـدك ثقيـل=ولاتظني أعلن بفقـدك حـدادي

كم عطيت من الوفا شخص بخيل=وكم جحود زاد في طيبي عنادي

غايتي وأمنـاي تلقيـن البديـل=مثل قلبي مايخذلـك بالشـدادي

وأن ذكرتيني لـو بخيـر قليـل=كثر الله خيرك وهـذا مـرادي

الحياة فراق والـدرب الطويـل=ينتهي ممشاه لو بالوقـت زادي

سامحيني كان قلت وكـان قيـل=كلمة عني على جرحك تنـادي

وانـت بألفيـن حـل ولايشيـل=قلبي الا الخير وأمر البعد عادي




محبكم
ابوسحر

[ابوسحر]

ماعشت همك




ماعشت همك لكن أعيشه أحسـاس=أقرأ وفيك أفهم مشاعر وأحاسيـس

أنا أدرى إنك عايشه بيـن هالنـاس=والضيق في نفسك بحاجـه لتنفيـس

لكـن أقـول الله كريـمٍ ولابــاس=لو كان في نفسك من الهـم تكديـس

لاشفتي الله وش عطا ناس عن ناس=لايلعـب بقلبـك بوسواسـه أبليـس

ياخذك للأحـزان والهـم وسـواس=ويضيق صدرك مثل حال المتاعيس

تخشين من همزن ولمز من الانجاس=أهل الحسد وأهل القلوب المناحيـس

مـن السعـاده عاشيـنٍ بالافـلاس=ويحاولـون يخادعونـك بتحسيـس

كوني حكيمه شامخـه رافعـة راس=ولاتهمـك ذا القلـوب المفالـيـس

تبسمـي بعيونهـم ليـن تنـحـاس=عقولهـم وقلوبهـم بالشقـا تخيـس

الله عطاك من النعم كـل الاجنـاس=وش عاد لو يتأخـرون المعاريـس

وأجرك على الله مايقـدر بمقيـاس=يامبعده لرضاه عـن سكـة بليـس





لله تركتك





لله تركتك 00ماورى طرد صيفـك=إلا السراب ونشفة الحلق والريـق

جيتك عتب00 جيتك مطوعة بكيفك=نزلت قاع 00 وبك رقيت الشواهيق

تعبت مدرى وين صدقـك وزيفـك=أهيم فـي ليلـك وأدور مشاريـق

لامن حيا فيني أمـل حـد سيفـك=جذه وقطـع فيـه كـل المعاليـق

اليوم أنا مليـت 0 مانـي وليفـك=إلى متى وأنا فرح وأنت لي ضيق

لابد ماتدري إلـى أقبـل خريفـك=أن التغلي بعض الأحيان00 توهيق

سافر بعيد وخذ من العيـن طيفـك=يغنيني اللي فـي يديـه التوافيـق





جـنون القـصيـــد (( جديد ))







كل ما قلت أحبك صاح شعري وغرق=وإن تسائلت صبري ذاب شوق وقضى

يا00000 احبك مـن هنـا لـلأرق=شوف حتى المشاعر أصبحت بي فضا

فيك حتى القصايد مثـل غيـم بـرًق=طاري أسمك بقلبي مثل نـار اللضـا

جيت لجلك وقلبي في يديـك أنسـرق=أنثر الحب عطر وفيك قلبـي حظـى

0000000000000
ياهلا فيك يا أغلى من بقلبـي طـرق=باب ألاشواق بالحاضر وفيما مضـى

كل شوق بنفسي في غـلاك احتـرق=غير أحاسيس قلبك خاطرى ما ارتضا

يابعد مـن تلاقـا بالغلـى وافتـرق=لهفتي لك بروحي مثل نـار الغضـا

سحر عينك تمكن بالحشى واختـرق=والله اللي قسم حبـك علـى وقضـى

الله اللـي بعينـي ياحياتـي فــرق=طيفك اللي تحت رمشى بكل الغضـا







مليت من ظلمك




http://www.hdrmut.net/ufiles/1163264011.jpg