عسى الحيا يسقي جوانب بلادي / عبدالله العرفج

[روح التميمي]

قصيدة الشاعر الأستاذ : عبد الله بن عبدالرحمن بن محمد العرفج :


" وطني عنيزة "


عسى الحيا يسقي جوانب بلادي=ماكفّـت الخرما إلى بير شقران

آمين جعله للسحاب الغـــــوادي=من اقصى صعافيق الى حزم فيحان

يرتع بها طرش الحضر والبوادي=وتغرّد اطياره بزينات الالحان

زمرّدة نجــــــــدٍ , ونصر الجهادي=عـزّ النشاما عند روغات الاذهان

ياما حــمـــوها يوم هي بالايـــادي=وياما بهم عـزّه على كلّ الاوطـان

وياما صفت للي صفا بالودادي =وياما تكدّر وردهــا خـاين خــــــان

وياما سقت عدوانها سمّ صـادي=ماذلّــــت الفيحـــــا ولاعزّهــــا هان

وياماحلت مثل العســـل للا جوادي=وصارت على الأنذال حنظل وقطران

من دونها روس النمش والهنادي=وعن جالها برجالها صار له شان

ايامها بيض لاهــــــلهـــــا جدادي=وخضـر على الاصحاب في كل الازمان

لكنها حـمــرا عليهـــــا سـوادي=على عـدوّ الدار نــار ودخّــان

حريبها مايهتني بالرقــــــــــــادي=بالليل مذعـور وبالصبح بلشـــان

كنّـه يقلّـب فوق شوك القتادي=تضيق فيه فجوجها حيث ماكان

حنّــا هل العادات من عصـر عاد =بالشر نجزي شر واحسان باحسان

نجهل الى صار الجهل به سدادي = ونصير عند الحلم للحلم ميزان

وقت الجهل نجهل ووقت الرشادي=من رشدنا ترشد لبيبات الاذهان

حنا هل الهدّات يوم الجلاد =نِعـنى بها لا قـيـل : هـدّات قصمــان

حنا هل الفيحـا كعـــام المعادي=نموت دونه مانبيعه بالاثمــــان

خضره ونضره صيفها والبرادي =في نجد مثل الغرّه بجبهة حصان

أم لـــــنا ياطـيـبـهـا لـلـتّـــلادي =من طيبها طبنا مساكن وسكّــــان

دارٍ لــــنـــــا كلٍ بطيبــه ينادي =ربعه عزيــــز , وسـاكنـــــه تقل سلطان

[زايد الضيف]

تسلم يمناااك لاعدمناا علوومك الغاانمة