الضرس غالب

[روح التميمي]

الضرس غالب

ياضِرْس ياللِّي لَجِّتِك ماتِهُوني=حَرَمْتني من لَذِّةَ النوم والزَّاد

ياضِرْس قل لي كِيف تِسْهِر عيوني=أَشْغَلْت بالي وَاْكَثَر النَّاس رِقَّاد

ماانْت بْسَهَر عيني بْلِيلي تِمُوني=لاعاد حَشْوِك تَالِيَ الوَقْت لاعاد

يالَجِّةٍ بالليل تَبْعَث جنُوني=كِنِّه يِقَلِّبْنِي على الكِير حَدَّاد

الضِّرس غالب وِان شِكيت اعْذِرُوني=يَجْدَع ابوزيد اِن صِطَا وِابِن شَدَّاد

لو يِهْتِني بالنوم رَاعَ الدِّيُوني=ماظَنِّتِي يَرْجِع ليَ النُّوم عَوَّاد

ياضِرس ياللي سَكَّرَ النوم دُوني=خَلاَّ الهَواجِس ماصِدَر عاد وَرَّاد

عندَ الطَّعام يْغَيِّرَ الضِّرس لُوني=أنَا اشْهَدِ انه ماسَلَك دَرْبَ الاَجْوَاد

إن مَرِّه الشَّاهي عَرَفْتَ الغْبُوني=والبَرْد عِقْبِه كلَّ الاَوْجَاع تِزْدَاد

دَوَّرْت له من لَيِّنَ الأكل تُوني=حِتَّى طَحَنْتَ الشُّورِبِه لاَجْل يِنْقَاد

لو شَاهَد الكُوسِه بْقَاعَ الصِّحُوني=قَامَتْ مِعِه صَكَّات بَقْعَا بَالاَرْصَاد

أَرْهِي له القِشَطِْه وَاخَالِف ظْنُوني=وَاتْبَع مِعِه لِينَ المْعَاشَر بْمَارَاد

وَاسْمَعْتِه الليله غَرَايِب لْحُوني=والرَّايِةَ البِيضَا على رُوسَ الاَشْهَاد

لكِنْ رُمَاني من جْنُونِه فْنُوني=مابَاقِيِ الاَّ وَاجِه اعْنَاد بِاعْنَاد

الضِّرس لَجُّ او تَابَعَنِّه سْنُوني=والصَّبْر مالِه عِنْدِيَ اليوم مِقْعَاد

اللي يِريِدَ الله بْعَبْدِه يِكوُني=غِيَر العْيَاده مابِقَى راَيْ نَشَّاد

عنيزه-16/3/1428هـ