هيضت ما بالقلب

[ماجدونا]

هيّضت ما بالقلب من غير تعنيف = من كثر هرج نسمعه بالقهاوي
ناس تساوى عندها العدل والحيف = قاموا يعدّون المحاسن مساوي
الله يسامحهم بعفو وتخفيف = ويعيننا بالصبر عند البلاوي
الدرب شابك به صعوبات ومخيف = واللي وضعها يتّقي بالملاوي
اقول قول اهل المثل والتواصيف = ماخوذ من قولٍ عزيز سماوي
اصلاح ذات البين بالمجتمع ريف = يقضي على الشحنا وكثر الدعاوي
وتحمّل الزلات ما به تحاسيف = يفوز به من هو على النفس قاوي
وصبر على الجاهل وحسب التصاريف = من يفعله يسلم وقوع المهاوي
اقولها لاهل القلوب العواريف = وانا على حسن العلاقه شفاوي
تكريم لاهل العرف منّي وتشريف = ونصيحة للي عن الحق غاوي
اللي على الماضي كثير التحاسيف = قاصر عن الواجب ردي الهقاوي
واللي على ربعه كثير الزعانيف = بالهرج معروف كثير الشناوي
ليا جا حزم كلاب صارت سواليف = ما غير في المجلس كثير النخاوي
وياما حلا جمع الربوع المواليف = في مجلس ما به حسود شقاوي
مستانسين بظل غرس مناصيف = لو كان ما ينفع كثير المناوي