عديت مرقاب على جال صوحي

[ماجدونا]

عديت مرقاب على جال صوحي = شرق عن الديره شمالٍ موالي
اشرف واطالع من بعيد شبوحي = واقول يا روحي بعد من غدالي
تعطين روحك وانا اعطيك روحي = انا اتريح وانت تشقى بدالي
من شان توجس علتي من جروحي = وتشيل حملٍ بالهوى ما يشالي
حتى الى منك توهقت اروحي = واقول جرب وذكرن وش جرالي
يا عنق ريم قايد للسروحي = له بين جيان الغمايس مفالي
ما دوره خطو الظريف الذبوحي = مستامن قلبه من الخوف خالي
عليه روحي والضماير شروحي = واسهر عليه من الليالي ليالي
حبه يجوح اقصى المعاليق جوحي = ليته صفالي يوم برّق بحالي
يا زين ليتك مثل غيرك سموحي = لك بالموده والهوى مثل مالي
ما دمت في بعض الحكايا شحوحي = ترخص الى صرت بجمالك تغالي
لو كان لعوب عجّاب مزوحي = بيديه ختم اهل الهوى والجمالي
ماهيب نفسي للمقفي لحوحي = اقفي عن المقفي واصرم حبالي