عيدك مبارك

[روح التميمي]

عيدك مبارك .. قلتها من هوى الروح = والزين جاوبني .. من العايديني
لعل عيدك يابعد كل مملوح = ربي يعيده بالهنا كل حيني
انت الذي لك باب الاشواق مفتوح = ما همني غيرك ولا شاق عيني
روحي تودك لو على غير مصلوح = راضيك وارضى اللي بحبك يجيني
صوت على قلب ٍ من الشوق مجروح = مثل الدوا يبري صويب الحنيني
عطني معك مره سواليف وامزوح = خـلّـه على عسر الليالي تعيني
يا ما لعينك طاولت عيني النوح = ترعى خيالك والملا نايميني
اسهر على رجوى يجي منك منضوح = واصبح بهمّي والعنا مقتفيني
اعطيك قلب ٍ من هوى الغير ممسوح = لا شك ما يـمـّي تمد اليديني
انا وحيد ٍ في عنا الحب مطروح = فزعتك خل الود بينك وبيني
وين النـِّصَف ياللي بك القلب مشفوح = وشلون قلبك للرجا مايليني
طاول جفاك وضرني وانت مسموح = تخطي وساياتك بعيني تزيني