رثاء عبدالعزيز بن حمد البادي رحمه الله

[أبو زياد]

بسم الله الرحمن الرحيم
هذه القصيدة في رثاء شاعر عنيزه الكبير في الرد والمساجلات (القلطه)
عبدالعزيز بن حمد البادي رحمه الله :





الشِّعر نَشَّتْ بالشِّفايا حْرُوفِه=الشِّعر صَابِه سَكْتِةٍ بالفُوَادي
الشِّعر يَرْثِى حالتِه من يِحُوفِه=يِقول وِيِنك يالزِّعيمَ الرِّيادي
اليوم حالِه تِسْتِحِقَّ المْرُوفِه=حادِيه عن مَلْعَب نَواديه حادي
مِثْلَ الشَّلَل صَابه وبَعْثَر كْشُوفِه=النَّاس في وادي وهَمِّه بْوَادي
مَحافِلَ الشِّعَّار تِقْلِ امْعَيُوفِه=عِقْبه عنيزه غارِقِه بالسَّوادي
علمٍ فِجَاني كَدَّرَتْنِي ظْرُوفِه=بَعْدَ الزَّعامِه والفَرح بالنَّوادي
علم ولا بالحلم تِذْهِل وْصُوِفه=ياشِينِ الى جَتْكَ المصِيبه تْنَادي
بينَ المْصَدِّق والمْكَذِّب ألُوفِه=بِدِيتَ اجَاهِد فيه نفسي جْهَادي
أحِسّ من كَبْدِي بْرِيقي نِشُوفِه=حتى تَرَاجَع لي صوابي وعادي
قالوا رَحَل من جَنِّةَ الشِّعر شُوِفه=ابوحَمد عبدالعزيز ابن بادي
في حادِثٍ تَفْجَع نَوايِب صْدُوفِه=وِمْسَاعَدَ الغِزِّي حكيمٍ سيادي
ابوحَمد مالِه عن الحَقّ شُُوفِه=للدِّين فيِ كلَّ الظُّروفِ انْقِيادي
مِكَانِتِه عند الجِميع امْعَرُوفِه=شاعِر عنيزه ثابِتَ الإعْتِقادي
مِثْلِه تْطَاوِلْنا عليهَ الحْسُوفه=هو في صِمِيمَ المِجْتِمَع غِير عادي
أيَّام شِدَّاتَ الزِّمانِ امْخَلوفِه=عنده لْفَنَّ الشِّعر عَقْلٍ حِيادي
الى بِدا القَلْطِه وقامَت صْفُوفِه=تَلْقَى عنيزه بالمشاعِر تْرَادي
مرحوم يامن عِزِّنا في وُقُوفِه=في ليلةٍ بالشِّعر فيها عْنَادي
مرحوم ياشيخٍ تِعِزِّه ضْيُوفِه=الى قِصَر عنهم رِدِيَّ المِبادي
في جَنِّةٍ مادُون شُوفَه كِلُوفِه=من رَحْمِةَ المُولَى مَعَ اهْلَ الرَّشَادي
صَلُّوا عَدَد من سَبَّحَ الله بْخُوفِه=على نِبٍّي لامِّةَ الخير هَادي




ابوزياد
عنيزه -1402هـ

[حمد البادي]

صح لسانك ولا هنت .. ياشاعرنا وأديبنا واستاذنا

والوفاء ما يصدر الا من وفي







حي الجواب وحي نفسٍ عروفه=وحي البيوت اللي بناها الستادي

وحي الوفاء اللي واجبه ما يطوفه=ما يسهج الماجوب غير الربادي

وحي الثقافه والأدب والأنوفه=وحي الشداد وحي راع الشدادي

حيه عدد وبلٍ تساوق قنوفه=متداخلٍ لونه بياض وسوادي

ترحبةٍ مثنيةٍ ومعطوفه=تقبٌل الراس وتبوس الأيادي

من هاجسٍ ينبض غلاكم بجوفه=من يوم هو قطعة لحم بالمهادي

الوقت ذا وضعه وهذي صروفه=ما تم من زرع اقتفاه الحصادي

ومن لا ذكر بالخير تربت كفوفه=هذا الكلام اللي عليه الوكادي

والحمد لله ما قطعنا شفوفه=الجمر حي ولا تحول رمادي

وحنا لنا جلسة قصيد امحفوفه=جلسة رجالٍ ماتجيب الدوادي

فيها النفوس مروضه ومعسوفه=مابه تنعصر بين حضر وبوادي

ذي دعوةٍ لك باللحون امعزوفه=ان كان لك شفٍ ياغاية مرادي

تشريفكم يضفي علينا كنوفه=المسك والعنبر وريح الزبادي

ويسلم لنا راسك وتسلم كتوفه=ياخال يابن الخال يابو زيادي