مدارسها تجاربها

[روح التميمي]

مدارسها تجاربها


ألا ياشايل همك على راسك بقيل وقال=سبب وقتٍ تعرض لك ومنك الحال صوبها

ترفق وامسح أحزانك بطول البال وطيب الفال=ترى دنياك ماتسوى دموعٍ صرت ساكبها

دخيلك لاتعنيني تراني نازلٍ رحال=من أيام تولجني .. تحاربني واحاربها

أنا مانيب لا كامل ولا من حسبة الجهال=أنا مثلي مثل ناسٍ مدارسها تجاربها

شريت وبعت بأحلامي بلا مكتب ولا دلال=ولا حسبت كلفتها ولا أدري وش مكاسبها

وإلى مالت بي الدنيا وحالي من سببها مال =بديت أستجمع أفكاري .. وأعاجيها وارتبها

وأشوف النور قدامي لو إني بالدجى نزال=وأرد النفس عن ياسٍ يضيعها ويغلبها

أعيش اليوم وأسعد به وأردد للسعد موال=حياتي بسمتي لحظه قبل تركب عقاربها

واشوف الناس من حولي أحد ناقض وأحد فتال=وأحد يبني وأحد يهدم وأحد رجليه متعبها

وأحد يشقى بمصروفه وأحد يشقى بجمع المال=وأحد يشقى على غيره وأحد نفسه مطربها

حرام أعمارنا تمضي بهم وضيق مع غربال=مع أوهامٍ تحاصرنا بذل أنفس نخاطبها

نجي ونعالج أخطانا بشور التايه العذال=ونبقى في يد الحيره ضمايرنا نعذبها

نقول الكلمة العوجا ونسمع هرجة القوال=وحاكمنا عواطفنا .. تسيرنا مطالبها

نسير الدرب ونخطي به ونضرب في بعضنا أمثال=ونصدر حكمنا الجاير على ناس نشاربها

وننسى حالي المشرب ونذكر فاضي الفنجال=ونذكر ليلةً غدرا ولا نذكر كواكبها

كثير الناس من وقته شكى لو هو مريح البال=ألا ياليت من يدري من أيامه مصاحبها