قصيدة ورد .. مع الشاعر سعود بجاد الكريزي البقمي

[روح التميمي]

وهذه القصيده وجهها شاعرنا ابو محمد وعمدة شعٌارنا
الى الشاعر/ سعود بن بجاد الكريزي البقمي*



عجزت انام امن الهواجيس ياسعود=لا جيت ابرقد طار عن الرقادي

ما همني دنيا ولا ناعم العود=بلاي من بعض الهروج الدوادي

هرجٍ من البهتان والزور مقصود=من واحدٍ يعميه نفخ الرمادي

ينشر بحقده بين الأصحاب منقود=كنه يحصل مرتبه بانتقادي

واهل العقول تميز النقص والزود=يرمون بالخيبه خبيث المرادي

ميت الضمير معقد النفس مقرود=من نقص روحه ضاريٍ للنكادي

واهل المعرفه عندهم ميز وسدود=يثنون لدروب السنع كل غادي

والسوق ميزان الشرف ياهل القود=لا صاح في شرع المراجل منادي

لي سيرةٍ ما تجمع البيض والسود=الوجه الأبيض ما يجيه السوادي

إنبيض الأعمال في كل مجهود=سلمٍ لنا في كل عصرٍ وكادي

عندي ثقه وموثق العلم بشهود=راس الشرف منبع شرابي وزادي

ما هيب زهقة من ملى القلب بارود= اللي بهرجه ما يهز اعتقادي

احدٍ على المرواس واحدٍ على العود=واحدٍ يحذف في كبار الهوادي

والله يالولا الحبل مثني ومردود=اني لولعها بخشم الزنادي

ان عودة للحق فالحق مريود=اخذت حقي في طويل الأيادي

لكن ابصبر حيث للصبر محمود=واطا علي شوك السلم والعرادي


وهذا رد الشاعر سعود بن بجاد الكريزي البقمي



يابو محمد ياسند كل مضهود=يامزبن اللي حاديته الحوادي

زيزوم قومٍ للمواجيب معهود=ما لك حليٌ بحضرهم والبوادي

والله واثنبها ولانيب محدود=انك مثل نجمٍ على الكون بادي

غصبٍ على اللي مرجلتهم بلا فود=تباعة السفره كبار الثنادي

بالنم تفرق بين والد ومولود=مير اشوهم بالنارشوي الجرادي

لا تسمع الأنذال والرب معبود=وإدعس عليهم بالقدم ولأيادي

واهبدهم برجلك ليا هبت النود=هبد الجمل لونس دبيب القرادي

واصبر على الزلاٌت والحبل ممدود=واعرض عن اللي بالطريق امتحادي

حيث انك اللي تاخذ الطيب وتزود=من عاندك يخسر نهار العنادي

والعله الصرما لها الطب موجود=والصقر ما يشبه لطير الحنادي

راع الوفاء والمرجله دوم محسود=والحقد من هجرة ثمودٍ وعادي

واعرف ترى الناقد للأجواد منقود=واليا حرم روحه من النقد غادي

احدٍ يجيب الهرج من غير مقصود=على قدا ولا على عير قادي

واحدٍ يجي هرجه مثل ريحة العود=ومخالطه مسكٍ وعنبر زبادي

كلٍ بطبعه ينظر الناس ياعود=هذا حسب ضني وحسب اعتقادي




* نقلا عن الشاعر حمد البادي