وجيه التعاسه !

[ياسر التميمي]

حزين واضحك في وجيه التعاسه=عايش على فل الحجاج ومرفّه
دمعي تناثر مزنته بالدساسه=وادعي ولاني في حظوظي مسفّه
لو زار همّي اشعره بالتماسه=يا دفّني للموت ولاّ بدفّه
عموماً احزاني تعرف النجاسه=وتعكّر اوقات الهوى المستعفّه
من عام الأوّل صابني التباسه=ذكي ولكن يحسبوني مخفّه
للناس حكي وللعواذل خساسه=وللرد أشعاري وللوجه ضفّه
خلهم على تفكيرهم في عماسه=وخلني على تفكيرهم آتأفّه
ما همّني وانا اعيش بسلاسه=اعبر من كهوف الهقاوي بخفّه
وان صادفتني في طريقي نحاسه=القى بدرب النحس عشرين لفّه
كذا من الله لايقٍ لي لباسه=ثوب البخت ما يشبه لثوب دفّه
عندي باساليب الصراحة سياسه=وعندي حبيبٍ صورتي فوق رفّه
من يوم ما لبّست بيديه ماسه=حسّيت كنّي شايله وسط زفّه
قرّبت ناسي للرحم حول ناسه=ورسمت للبسمات مليون شفّه
وزيّنت له بالقلب بيت وحراسه=وصارت ضلوعي في يدينه مهفّه
وغيّرت ميزان العرب في قياسه=يكفي لميزان المعاشيق كفّه
هذا وانا مشهود لي بالفراسه=لقيت نفسي واقف براس حفّه
مبايعينه يستلم للرئاسه=عروق جسمي يوم تاقف بصفّه
جفّ البحر من مشيته في خلاسه=وشلون عيني عاجزه ما تجفّه
يا كود باسي ماخذ اليوم باسه=والشوق فيني يا عسى يتستشفّه
مشتاق له من راسه ايلين ساسه=يا ليت في منّه حبوبٍ واسفّه
واستطعمه ثم استطير بشراسه=من لذّته ماظن روحي تكفّه
في الوجه نور ومن كثير احتباسه=كنّه يقول ان شفت لك نور طفّه
ورموش فيها من الثقل والنعاسه=تعجز هبوب المغربيّة تهفّه
طاهر واذا ودّي اشوف انعكاسه=عفّه تقابلها من الخلف عفّه
راعي وفا ولا الوفا هو اساسه=يا قلب لا تخونه ويا شعر وفّه
ويا صاحبي من قبل وقت الدراسه=اللي سمعته طنّشه ثم قفّه
شاعرك لا هذرا عليك بحماسه=حطّه على صدرك وضمّه وغفّه