بليّا احاسيس

[ابن الخطيب]

يا خاطري سقها بليّا احاسيس=خابر شعوري يا نديمي رضاوي
اكتب واعيد البيت واقطع قراطيس=والقاني ارجع وين ما كنت ناوي
ملعون ابو جد الحروف المفاليس=ابدا غزل واثر القصايد رثاوي
كلماتها ما فسّرتها قواميس=ما جابها غير السنع والهقاوي
لها عليّ مواصفات ومقاييس=ولها بضمير الناس سرد وحكاوي
في حال منهو عايشٍ في كوابيس=مير الشقا ما عانق الاّ الشقاوي
ثابت تحرّكني هموم وهواجيس=تشيّخت بي واصدرت بي فتاوي
كلما اقول اتزين تعوّد تخيس=ويلي عليها علمّتني الرجاوي
عايش ولكن في حياة المتاعيس=امشي ويا ليتي احسب الخطاوي
من يوم صرنا يا فؤادي مناحيس=لين انتهينا فوق جمر الغضاوي
مخنوق كنّي رابطٍ راسي في كيس=مضيوف لكن في خفوقي حفاوي
لاوجاع وحزون وحظوظٍ معاكيس=وشيٍ على كل الضلوع متلاوي
اضحك مع العالم وحولي جواسيس=ناسٍ لجل تنهيك تدفع رشاوي
مشكلتي انّي ما اصدّق ولا اقيس=من الفداوي صرت كلّي فداوي
ارقى على المرقاب فوق النواميس=واثري وصلت لراس مابه مخاوي
شاعر يهيّضني جبال وتضاريس=الارض انثى والسحاب متهاوي
كنّي انا شعب اليمن تحت بلقيس=مهما تجمّعني نتيج متساوي
في حب منهو مثل هبّة نسانيس=سافر وخلاّني رهين البلاوي
من يوم روّح كل مابي مناكيس=فاتح بداري من فراقه عزاوي
هو فوق حدّ ارادتي والوساويس=وعلاج جرحي والطبيب المداوي
ابو قذيلٍ والعيون النواعيس=حمر الشفايف والخدود الطراوي
اللي له اشواقي دروع ومتاريس=اللي له شعوري يجي له شهاوي
كنت احسب اني من رجالٍ أشاويس=ويا شينها لا صرت طفلٍ بكاوي
يكفي غيابه والليالي معابيس=تعبّست بايّام صبح ومساوي
يا ليت يرجع واذبح لشوفته عيس=رغم ان مابي للذبايح تقاوي
وآخر كلامي عوذةٍ منك يا ابليس=وابدا صلاتي واذكره بالدعاوي