عساه يذّن ديككم يابو منصور ..!

[روح التميمي]

قال روح التميمي :
هاتان قصيدتان متبادلتان (بدع ورد) تنتميان إلى الشعر الرمزي
ونحن ننشرهما هنا لأول مرة توثيقا للتراث وحفظا له من الضياع ..


* * *


أرسل الشاعر الكبير علي البراهيم القري رحمه الله من مدينة جدة
إلى صديقه الشاعر عبدالعزيز المنصور الخنيني في مدينة عنيزة
متعه الله بالصحة والعافيه هذه القصيدة :




عــســاه يذّن ديككم يابو منصور=ماهو مثل ديكي تحول دجاجه
منوَّلٍ الى بـــــغيته على الفـور=أذَّن ونومسني بصوتٍ يواجـــه
على المثاعب والزرانيق بالدور=ولا على أية شي إلى صار حاجه
واليوم حتى القطقطه وصلها الدور=تْكــــلِّفُه ولا دَرَى وش علاجــــه
وتعبت منه وقال لي كم دكتور=اترك قليل الفود على مزاجــــــه
وش أنت شايف وأنت بالخير مذكور=تراي من هالحال تقل بزجاجـــه


فأجابه أبومنصور , حفظه الله قائلا :


لولاه يذّن مارقيت أشرف القور=ولا ركضت وطرت مثل العجاجه
لو كان حسه مايعدّي ورا السور=بس العميل السمح غير الغلاجـه
جدد مبات الليل كانك تبي الشور=واقدم على مثل الخطيه أو واجـه
تراك الى منك تسببت ماجور=يُمَّا تخيب أو تنتهي بانفراجـــــه
هذى وصاة العود والعبد مامور=انــــــه يميز دخلته من خراجــــه
وابرا الى الله كان أنا شرت بالزور=أو إني أنوي بالسوالف احراجــه
لكن علي أمشي على حروة النور=عســــاه تثمر ســفرة وابتهاجــــه

حقوق النشر محفوظة