وصف القهوة

[روح التميمي]

وصف القهوة


هاج الغرام بجاش جهاش منظوم=نظمٍ جهش من جاش درك الغرامي
جهاش جاهوش من الجاش مرسوم=يهل من جاشي هليل الغمامي
بحر تلاكم والتطم طامي الطوم=طام غزير من غزار الطوامي
قيلٍ نحط في لاجي القلب مرسوم=يفر من قلب بعيد المرامي
سامع ندا الداعي بشكواه مظلوم=علام ما بالغيب محيى العظامي
حلال وسر العسر باليسر مهزوم=فكاك عوق اللي زواه الحزامي
لك أشتكي من جور الأيام مجرور=في حبس طمس ذا لي اليوم عامي
في وسر حسر دايم الدوم مهموم=ما لي عوين غير منشي الغمامي
أصبحت في حبس من الطمس مختوم=ما لي نديم غير ورق الحمامي
ما أصبرك يا قلب على الضيم مضيوم=حملك ثقيل وقاعد بالمضامي
لومي على خل من البيض معلوم=اللي رماني في سهوم الغرامي
وردية الخدين والنهد مزموم=مدموجة الساقين خمص القدامي
وصدر كما البلور بالنور موسوم=شمس الضحى بالليل بدر التمامي
عقد من اللول ثناياه منظوم=أدعج غنج مقبول عذب الكلامي
شهد بشف شفاه بالمسك مخدوم=أخنّ وأنوَج من عبير البشامي
فإلى صفا لك صافي الود لو يوم=فاقطف زهر ما طاب قبل العدامي
يغنيك يا راع الهوى دايم الدوم=بنٍّ يعيض بكاس صافي المدامي
فإلى اتفق هذا بتيفاق معلوم=وغرّد على راسي فريد الحمامي
دنّيت من بنّ اليمن غالي السوم=وقرّبت محماس على النار حامي
وحمست ما يكفي من البن ملزوم= ريحه ينوج بعرف مسك الأرامي
لا روح لا ريحان لا عنبر الروم=لا ند لا خنّة عبير البشامي
أخنّ وأنوج من زباد ومشموم=وأزكى وأذكى من عنابير شامي
صفرا تنوج برايج المسك مختوم=كاسه يصح الراس هو والعظامي
دقه بنجر يشعب القلب من يوم=حسُّه ينادي نازحات المرامي
ولقّم بدلة مغرم دايم الدوم=بيضا كما الفضة بياضه تمامي
قمورها كنه على النار منظوم=عقد من اللولو بطوق الحمامي
زله على هيل مع المسك مضموم=والعنبر الغالي تمام النظامي
فإلى اتفق هذا بتيفاقنا اليوم=فصبّه اكفِيت الموت تسعين عامي
بفنجال صينٍ شعشع النور مرسوم=فيه الزمرد والذهب له حزامي
لا خمر لا ترياق ريحه ومطعوم=خمر النشامى والكرام الحشامي
أنا أشهد إن الكيف ما هوب معدوم=إلى أولمت لك عند عجل الولامي
تنفى الكسل والعجز والغم وهموم=تشفي من أمراض الوهن والوهامي
حصن عن الأكدار والشوم واللوم=يا ما أبهجت له من رفيع المقامي
نطفي لهيب القلب والهم وغموم=فوايده ما تنحصي بالتمامي
ابهارها بالهيل والمسك مختوم=والعنبر الغالي ختام النظامي
وغيره فلا والله ما هوب ملزوم=الزود إخو النقص افهم كلامي
ذا قول ابن بسام بالقيل منظوم=أحمد ولد صالح عريب العمامي
طلاب علم مجتهد دايم الدوم=عرّاف عرفٍ عارف بالنظامي
عمر قضاه بدرس الأحكام محكوم=في نادي التدريس عشرين عامي
ختمي صلاة عد ما هل مسجوم=على النبي والآل دوم الدوامي