يا وقت

[روح التميمي]

كتب صديقنا الشاعر المعروف عبدالرجمن العريفي (من أهل القويعية) الأبيات التالية ,

وأرسلها بالجوال إلى صديقنا الآخر الشاعر سليمان العليان :


ياوقت قل للي نسى الهم قل لـه=واصبح بعد حزنه حياته سعيـده
قل له ترى الايام لو هن صفن له=دوراتهن للـي وُمَنْهـن شديـده
وقل له تراني بالوفا مخلص لـه=واطلب له الله بالسعـاده يزيـده
وقل له حبست الدمع ماعاد اهلـه=إلا لرجوى اللـي ينجـي عبيـده
وقل له هجرت الحرف والشعر كله=مادامها رخصت حروف القصيـده
أطوي كتاب العام وارجـع وافلـه=واقرا جميع اجزاه وارجع واعيده
بغيت احل اللغز واخطيـت حلـه=جف القلم والفكر غلـق رصيـده
مدري دروب الصدق صارت ممله=والا ظروف الوقت صارت عنيـده
وقل له ترى قدره بقلبـي محلـه=هو سيده هو قايده هـو عميـده
ياوقت هـذا دق علمـي وجلـه=إحرص ووده لين ياصـل بريـده


فكتب سليمان الأبيات التالية معارضة لقصيدة أبي راكان :


ياوقت انـا مليـت عـد الاهلـه=لا قلت هانت جت علـوم جديـده
امشـي وادوّر بالطريـق الاظلـه=واشوفها حولي ولو هـي بعيـده
واخفي جروح بالضمايـر مغلـه=واسعـد واردد للسعـاده نشيـده
ياوقت قل للـي قصدنـي بزلـه=والله ترى الدنيـا بعينـي زهيـده
قل له خبرت ان الوفا عـادة لـه=وانا على خبـره احبـه واجيـده
وقل له ترى دربه اعرفـه وادلـه=ودربي يعرفه والمواقـف شهيـده
وقل له ترى بعض المجالس مذله=إلى صفت مابيـن عبـد وسيـده
مدري دروب الصدق صارت مضله=والا علوم الطيب صـارت مكيـده
ومدري احل اللغـز والا استزلـه=لاهل العقـول الخاليـه والبليـده
وقل له تراني له زهـاب وحلـه=إلى نوى المسفار واعلن شديـده
وقل له ترى الماضي بقلبي سجله=خطـه بنانـه بالعلـوم الحميـده
ياوقت هذا العلـم لا تستقله=بلغ بـه الـلازم بختمـي وقيـده



سليمان العليان
الاثنين 24/8/1429هـ