سيحان من بيديه يجرن الأقدار

[حمد البادي]

في العام الماضي تمت دعوة فرقة الأفراح بالدمام من قبل الأخوه الكرام في دار التراث والفنون بعنيزه واستضافوهم وأقاموا لهم حفل إستقبال رائع وبرنامج متكامل لزيارتهم اللتي استغرقت يومين وفي هذا العام دعتهم فرقة الأفراح لزيارة الدمام وطلبوا مني الأخوه الإعزاء بدار التراث مرافقتهم للدمام وإلقاء قصيده هناك فتشرفت بمرافقتهم وإلقاء القصيده في الحفل الذى اقامته فرقة الأفراح بالدمام في 15/11/1429


(( الساحل الشرقي ))




سبحان من بيديـه يجـرن الأقـدار=اللـي خضـع كونـه لعـزة جلالـه

ربٍ عظيـمٍ مقتـدر نافـعٍ ضــار=جـل وتعالـى ونفـرد فـي كمالـه

ارجيه يدمح لي خطأ بعض الامـرار=لزلـة اقدامـي لـدرب الجهـالـه

ويارب حرّم والدينـي علـى النـار=اللي شررها مثـل صفـر الجمالـه

ومن بعدها ياهاجسـي دكّ الأفكـار=واللي معقّل منهـن اطلـق عقالـه

حتـى يجنـي طـوع وردٍ وصـدار=واختـار منهـن مدركـات الجمالـه

عاداتهـن ينومسنـي بالأشـاعـر=كـل فكـرةٍ تقبـل وتقفـي لحالـه

يجننـي مثـل الهماليـل مــدرار=واشرب صفاهن شرب حتى الثمالـه

ومن يوم جاء ماجوب ربعي هل الدار=دار التـراث مترجميـن الأصـالـه

ممثليـن عنيـزه بكـل محـضـار=تمثيـل عـز ورفـع رأس وبسالـه

مادون واجبهـم إلـى حـلّ معـذار=هم عز رأسي عزوتـه رأس مالـه

وياربعنا ياللي علـى نـوّ مشـوار=بالله خوذوا مـن ضميـري رسالـه

رسالـةٍ مضمونهـا شوقـي الحـار=للسّيـف واللـي ساكنيـنٍ قبـالـه

سلام ياشرق الوطـن يابنـه البـار=حيّ الوطن وابنـه وحـيّ إنتمالـه

وسلام ياحقـول المعـادن والأبـار=يامنبـع الخيـر الكثيـر ومـدالـه

يالساحل الشرقـي يلـدّن الأنظـار=يمـك وكـلٍ عاقـدٍ فيـك آمـالـه

يحماك رب الكون من شر الأشـرار=ياجزئنا الغالـي علـى كـل حالـه

وسـلام يالدمـام يامهـد الأحـرار=وسلام يارجـال الوفـاء والشكالـه

سلامٍ احلى مـن هماليـل الأمطـار=لساقـه الرحمـن واردف خيـالـه

مزْجى ومتولّـف ومتْراكـم اطـوار=والودق بأمره خـارجٍ مـن خلالـه

وبشر نباته بأول الوسـم مخضـار=وستاق لـه راع المواشـي حلالـه

لعيون من بصدورنـا لهـم مقـدار=يزيـد مـع مـر الزمـان وليالـه

جينـا لكـم يـادار الأفـراح زوار=إخـوان عنـد إخواننـا لامحـالـه

جينا لكم نطـوي الفيافـي والأقفـار=يسوقنـا شـوقٍ يمـاتـل حبـالـه

لوإن له جنحـان يمديـه قـد طـار=قدامنـا واضفـى عليكـم ضلاالـه

مشاعـرٍ يعلـم بهـا وآل الأقــدر=اللـي خضـع كونـه لعـزة جلالـه





والحقيقه انها كانت رحله ممتعه جداً حيث ان مضيفينا ( معازيبنا )


استقبلونا استقبالاً رائعاً وأكرمونا كرما منقطع النظير ولا يستغرب الفضل


من أهله ونقول لهم أكرمكم الله يامعازيبنا وبيض الله وجيهكم ورايتكم بيضاء


وهذه الأبيات ارتجلتها على عجل لفقرة العرضه في تلك الليله




ياهجوس المعاني هجرسي ساعه=لين أميّز بيوت الشعر وافرقها

ياسلامي سلامٍ يطرخ اشراعـه=عد ما دقّت الساعـه دقايقهـا

حشمة اللي بدرب الطيب فزاعه=مع تناهي كرمها حلو منطقهـا

يوم جينا لقينا الطيب بانواعـه=عند من تنشد العليا وتعشقهـا

ضيفهم لا تنشدني عن اوضاعه=داخلٍ جنـةٍ صفّـت نمارقهـا

[حمد البادي]

وعند ما نزلت القصيد اعلاه في مجلس عنيزه رد عليها حبيب قلبي واخي

الكريم (( رووح )) الذي لن أوفيه حقه مهما حاولت أو اجتهدت فأفضاله علي لا

تعد ولا تحصى جزاه الله عني خير الجزا



****************************************



هذا رد وتعليق حبيبي (( رووح ))



لا يا مال العافية يا بو عزيّز ..


أنشهد إنك خير سفير لعنيزة .. وياليتهم وغيرهم كل يوم يدعونك حتى تطلع لنا من هالقصيد الزين ..


وترانا ما نبيك تصير قليب يابوعزيز ما تطلع الما إلا بزعابة ..


نبيك وأنخوك تصير نبع يتفجر وأنت نبع بس تدفن روحك .. وهات إذنك أبقرّ به


اسمع يابوعزيز نبي من الشعر الناعم من نمونة (كدني بمشي الدلع) ترانا ولهين على هالزين


ولا تصير حساس وتقول خلاص راحت علينا .. ترى توّك صغيّر وبعين الزبون


والحياة مهيب تقاس بالأعمار الزمنية , لكنه تقاس بحياة القلوب , وأنت ما شاالله عليك قلبك حي وخضر


ولا يغرونك اللي ماتت مشاعرهم , وتهدمت احلامهم حتى لو هم كبرك وإلا اكبر وأصغر ..


ترى ما يلومك على الغزل إلا دحش محروم من تذوق الجمال ..


معليش نشرنا الخاص بالعام .. لكن أنت وأمثالك يابوعزيز من شعرائنا الكبار لنا حق عليكم


وأنا هنا نيابة عن كل أحبابك وأصدقائك اللي يحبونك ويحبون قصيدك ..



*****************************************



فأحببت ممازحته بهذه الأبيات


الله الله يا : رووح




ياسلام الله على اللـوّام أبـو نظـره حديـده=نظرةٍ من عين روح وشزرها ما هوب عـادي

مالـكٍ روحـي بمعروفـه وقيدنـي بقـيـده=لو بغيت ادفع قـدم رجلـي يهيدهـا القيـادي

ما يريد إلا الغزل والحب ينبض فـي وريـده=رأس مطنوخٍ يتـل السبـق بأيـام الهـدادي

والغـزل لصارمالـه دافـعٍ يدفـع قصـيـده=تأتـي ابياتـه هـزالٍ لاتسـاق ولاتـقـادي

ما ركبت إلا الشـداد اللـي يجملنـي فديـده=والكلام الهـزل ماتلقـاه مـع راع الشـدادي

ما غويت الـدرب ودري بالقريبـه والبعيـده=لاتعلمني ونا رأسي علـى الـزور امتهـادي

عشت بالدنيـا ليـال اطـوال وايـامٍ مديـده=واكتسبت إبها علوم إقـدام وعلـومٍ جـدادي

والشعر متعدد الأغـراض ووجوهـه عديـده=واقتحمت أغراضه الشتى وساعفنـي مـدادي

ما اعتبرت الشعر عندي رأس مال أرفع رصيده=الشعر عندي هجوس يترجمن نبض الفـوادي

والغزل نوعٍ من انواعه لكن ماهـوب سيـده=لو تقول إنه بعينـك ياطويـل العمـر سـادي

كل شخص وله مـزاج وكـل ذوق ومايريـده=واختلاف الأمزجه سـاس التـوازن للعبـادي

فطرة اللي فاطـرٍ سبـع الأراضيـن لعبيـده=كون عامر فيه مـدّل الطريـق وفيـه غـادي