مدير الصيانة

[ابن الخطيب]

ارعد يا فكري واترك الفاتن الترف=وخذ زمام الشعر واطلق عنانه
في وقت جاير عالمه ما بها عرف=بيّحت كبت الخاطر بعنفوانه
وكتبت مرسالك وقطّيته بظرف=للي يسمّونه مدير الصيانه
عن شيء لا يعرب مع النحو والصرف=ولا لقى له بالادب اي خانه
وعن شوكه وملاّس والفرق بالغرف=تقول رزقه جايبه قبل اوانه؟
وعن عمر يجري مثل ماهو جرى العرف=خوفه يجي واحد وياخذ مكانه
وعن دمعةٍ بالعين بس خلفها ذرف=مثل الرئيس اللي تحدّه بطانه
وعن العنا عن حرّ عن برد عن كرف=وعن رجل وسط المجتمع ضاع شانه
ترى لو ان نفسيّته مرّت بظرف=لا يحسبون المسأله بس لعانه!
شوفوا حلاله لا تباطى عن الصرف=مأخّرينه مثل راتب اعانه
خارج دوام الرجل ماهو من السرف=والله يعلم من بيده الخزانه!!
لا يا مديري كيف يغفى لكم طرف=وروح الموظّف في رقبتك امانه
ما انته بجاهل حال واظنّك إتعرف=دنياه ما بين السلف واستدانه
وماضيه دحديره ومستقبله جرف=وكلٍ يعيبه لا تعثّر حصانه
ارسلت كلمه وان وصل منها حرف=تقنع ضميري لين يقضي زمانه
زمان شفت الضيم والغدر والزرف=والحين اشوف المهزله والمهانه