مشاهدة النسخة كاملة : خـطـيـبـيـّـات
يا عمّتي مات الذرى في مماتك=عسى القبر برد وسلامه يا موضي
من رحلتي فاتت عليّه صلاتك=استغفر الله كنّها من فروضي
..
يبقى لنا ورث الحيا والمواجيب=يوم الردي لاموال الاجداد وارث
اللّي يشوف الكارثه بنشر الجيب=وحنّا جيوب ثيابنا في كوارث
..
كل يوم زينك زاد عن زينكم امس=ياخي ترفّق كيف ابكتب قصيده؟
..
هذه الصفحة تتجدّد دائما ,,,
يا كبتن ابياتي تلالى ذهبها=تشرح قلوب اللي قراها وتاسر
لان الهزيله بالشعر مجتنبها=فايز وخلفي يركضون الف خاسر
صحيح اميّز سهلها من صعبها=لكنّ ضعت اليوم في وصف ياسر
رجّال كل خصلة حميده كسبها=ومكسّر قلوب العذارى مكاسر
حتّى خذته الفاتنه واصطحبها=ردفٍ ليا منّه تيامن .. تياسر
ولسان حالك قال في رحلة ابها=يا ليت رحلتنا لوادِ الدواسر!
ما حدٍ بالحب مثلك مستريح=لا خذاك الوقت ولاّ راح بك
لا خطيت تكون في عيني صحيح= والدموع اليا انزلت ما تعاتبك
انت غير الناس بالمعنى الصريح=حتى حرفي لا كتبتك طار بك
شوفني من عقب حبّي لك طريح=والطبيب من العلاج احتار بك
لا عاد ترسل .. مير ما نيب راسل=قصيدتك ما جات جمله مفيده
بعض القذارة تنغسل في المغاسل=وبعض القذاره تنرسل في قصيده
تكلّم مثل ما تشتهي ما عليك حقوق=تظلّ بنظر حكّامنا يا حليلك ورع
تجرّدت في خطابك من المرجله والذوق=واظنّك جعلت ابن اليهودي علينا درع
خسارة بإسم فاروق يا نعلة الفاروق=ويكرم بإسمْك الشرع يا مخالفٍ للشرع
شرّفتنا يا كامل الطيب والذوق=هذا وحنّا بالتخرّج سمعنا
من يوم عرفك كلّ ما ترتفع فوق=تشوفنا حنّا معاك ارتفعنا
افرح جعل ما انته من الناس مسبوق=استغفر الله لو تهاونت ضعنا
بدعي ليا امسكت وابتلّت عروق=انّي اشوفك ذخر في مجتمعنا
ونعيش ما نطلب من العالم حقوق=ونضحك على اللي بالصداقه خدعنا
ابشتكي لله واصلّ استخاره=ازين من اللي للاوادم تلقّى
سوّوبنا سيناريو في مهاره=والمخرج بكفّ الخيانه تنقّى
كنت احسب ان الترقية بالجداره=واثره وليد مديرنا اللي ترقّى
وانا على كثر الاسى بالعباره=يا كم مشقّى مثل حالي مشقّى
ازريت عدّ عيوب هذي الاداره=من كثرها ما همّني كم تبقّى
ناس اشربت كاس العنا والمراره=وناسٍ على ما تشتهيه إتسقّى
متّ .. محدٍ ورثني .. منّحس=يا عيالي .. خذوا صيغة سعاد
لانّ انا من قبلها ملّحس=ولانّها زادت ابعاد في بعاد
كثر ما اسأل: متى قلبك يحسّ=كثر ما جاوبتني: يالله عااااد!!
تبقين في قلبي ولو ضاق صدري=تحضنك عروق وتضمّك معاليق
مشتاق لك من لهفتي لين مدري=ومشتاق من مدري الين اروي الريق
انا احبّك جعل من مات يدري=يا ودّي ارقد فوق صدرك ولا افيق
عقب البعاد الطويل بخاطري حاجه=ودّي على رجعتي لك يا اشقر الغرّه
نعيد شهر العسل من يوم نتواجه=معك انت ما سدّني شهر العسل مرّه
بسم الله .. الله يحفظك .. والله الرايد=يا وليدي امر الله إنّا نقبل ونرضى
منته مريضٍ لو اللي فيك يتزايد=عزّ الله امّك وانا من طيحتك مرضى
لي صاحبٍ ربّي عطى له بنيّه=ونشدت يا اهل الخير روحوا جبوها
عساه تطلع بالطبايع عليّه=مابي طبايعها تجي مثل ابوها
ارخي لك اطراف الحيا لا تبيّنت=لا صار مدحي من عظيم الرثاوي
يا صاحبي لا شفتني ثم تمعّنت=تلقاني اشهر من روته الحكاوي
وصل خبر عنّي قبل ما تكوّنت=ومن بعد موتي مجتهد الف راوي
شاعر ولا منّي تغزّلت في بنت=فزّوا لها خطّاب صبح ومساوي
اللي خذاني للهواجيس الالآم=واللي جرحني قلت ودّي اوفّر
والله لولا الله ثم دين الاسلام=لا اقول بالدنيا حوادث تكفّر
البارحة جفني من الضيق ما نام=وقلبي شكى حاله ووجهي مصفّر
بعت الدفاتر والمحابر والاقلام=غير المبايل والجهاز المشفّر
من مدّة لحافي على قد الاقدام=استشعر المعنى بكلمة مطفّر!
جاني خبر موتك وانا في فرنسا=لا يا محمّد كن موتتك موتي
كل ما اقول اني بسولف وبانسى=يمرّني طاريك حزة سكوتي
يا مسلمين الله على نايف يعين=لو ملعبه صدري وقلبي كورته
لي اتصل به شهر كود مسافرين=ولاّ الزمن في الناس ماخذ دورته
امرين لا ثالث لو ان عذره سمين=يتغلّى ولاّ خاف من فاتورته!
يبو حسن في كل ديره مهابيل=والمستريح اللي بعقله تهنّا
جانا بعض الإشكال والقال والقيل=والله يبعد بعض الأشكال عنّا
يبو حسن .. مرحبا بك والشطاره=في الاسم شاطر .. وهمّ بالطرق شطّور
الحال في مجلس ( ........) ... عباره=عن ناس تجهل فنون الشعر وتخور!!
والضيف لو ما حشم نفسه وقاره؟=عزّ الله انّه .. ثلاث ايّام .. معذور
من بعدها ما يشوف الاّ حقاره!!=بنعدّ له طلعته ... ون تو ثري فور
انا اذكر انّي بديت الشعر شاره=والحين .. احمد الله انّي زدته بحور
نقد ونصيحه .. ولا تهون استشاره=تسوّي انسان .. معْه احساس وشعور
صاحبي كيف ابرّر تفسيري=والدروب العظيمه منغلقه
انت مهما تحاول تغييري=مير ذا طبعي وهذي خلقه
رح عسى تحبّ غيري يا غيري=منّة الله ولا منّة خلقه
( خلّو الشعر لاهله تراكم مجانين=خلّو الشعر للي يعرفون وزنه )
واللي يخالف جاهلٍ بالقوانين؟=يا ويله! إلاّ بالقصيمي يا حزنه
والمزنه اللي تمطر الحقّ بالصين=هي نفسها في جوّ ( .... ) مزنه
لو غيثها يبلي ملاعب بزارين=يضيع فيه اللي تثاقلْه وزنه
وان دمّر انظمة البنوك الملاعين=ما دمّر الاسهم ولا باب خزنه
الله يرحم مزنه اللّي من سْنين=بالله شوفوا منهم احفاد مزنه؟
واثوبي اللي من الدمعات يتبلّل=فقد محمّد وصوت محمّد النوري
ما جيت احلّله لكن جيت ابتحلّل=من ذنب بعدي ومن سيّات بقصوري
كلٍ وقف حول قبره كبّر وهلّل=وانا بعيد آتأمّل منتظر دوري!
يقول ابو محمّد لو القول ناقص=افضل ولا بعض الكلام المهذرا
قيل العذارى كلّهم بالمراقص=وانا اتحدّى كان فيذاك عذرا
ولد الخال:
ودّي اوجّه شكر للاتصالات=حيث ان ما عنده بشغله تحيّز
الى لقت مثلك وشرواك بالذات=رقمٍ مميّز للعميل المميّز
علي الخطيب:
حيّاك يا مرسل بيوتٍ جزيلات=كنّك سفاره والاوادم تفيّز
من عقب صوتك ما نبي بعض الاصوات=يوم ان صوتك هو اساس التميّز
لولا ( الحيا ) .. ما للعيون التغضّي=لي ( نفس أمّاره ) ولي ( قلب سوّام)
تعبت من قولة : ( يالاسنان عضّي )=داخل على ( السبّابه ) ان راح الابهام
لانّي ... من السوق البعيد مْتقضّي=وغيري ... يدوّر سلعته وسط الاحلام
قم يا ( حمد ) بالناس .. لا طاح حظّي=يا نعنبوه الحظّ .. ( لا طاح ما قام )
انا ( الحميدي ) وانت ( علْي المفضّي )=لو يكثر بوسط الــ ( مدارات ) الاقلام
ما كل من ( صلّى ) وراك ( مْتوضّي )=بعض العرب يركع .. ولا يْعرف الاسلام
ليت يا كبتن تشوف اللي ما اظنّك شايف=جرحي اللي بخاطري ما عالجته اللزقه
الوكاد انّك على ذا الحال ما انت بْكايف=لو يقول الناس بالاسباب تقطع رزقه
آه لو تدري يا كبتن وش تجيب الطايف=جابت الحجّاج والبرشومي وذا البزقه
من سمعت ان قلعته والهبيّل خايف=كن روحه واقفه في حنجره منعزقه
مير صار يدوّر الشرهه ورى بن نايف=حاسد نفوس الخلايق بالخفا منرزقه
والمصيبة يدعمه معيوف مثل العايف=مبتلش به والحقيقه فكّه من الخزقه
ليت يا كبتن تشوته في شهار الطايف=صرت احسّ انّه على الكرسي ملزّق لزقه
يهمّك الشعر ولا همّك اللهجه؟=العنصريّه تبي تذبحك يالمنجي!
صحيح ما اقدر اغيّر درب منتهجه=انا لساني حجازي بسّ قصمنجي
شاعر واغنّي لحالي وازرع البهجه=في وجيه تقل انّها محقونةٍ بنجي
ادوّر اللي يزيد الرجل في وهجه=رح علّم اللي تمنّى طارة الرنجي
ولا انت ودّك تعكّر ليلة المُهجه=طبعك دني! والأَمرّ اسلوبك اسفنجي
الله يرحمك يا بوي الذي نهجه=لا يمكن يفرّق الابيض من الزنجي!!
مسيرة البادي اللي انت قايدها=رفرف علمها على عنيزه وكلّ اهلك
قل للهنوف البنات اليوم تحسدها=ورح قول يا ريم لا بعدك ولا قبلك
يا حظّ منهي فنيت العمر والدها=حتّى تقلّط رجاجيلٍ مع المملك
وتشوف كل بنت مع رجّال يسعدها=ماهوب واحد يعلّ كبودهن مثلك
مع احترامي للمشاعر والاصوات=وثقافةٍ من نوع اهلاً وسهلاً
لا عاد تطرون الخيانة بالابيات=يا جيل ما يعرف وش الحبّ اصلاً
يا بنت ياللي فارقن فيك الجمال
وفيك الوصايف بالشعر متآلفه
انا رهين عيونك السود الثقال
اللي على ضيقي وحزني حالفه
منتب بشر والله قطعة من خيال
كنك مع نجوم السما متوالفه
انتي خصالك غير عن كل الخصال
ولا ردوفك .. سالفتها سالفه
أثر القمر يمشي على الأرض يا سعود
ما عاده اللي تلمحه في سمانا
كنت أحسب انه في دجى الليل محدود
لكن طلع بالنور يضحك معانا
vBulletin® v4.2.0, Copyright ©2000-2025, vBulletin