النظرة الأولى

[الفتى المفقود]

أنا ما تغرن يا دمي صبغة الورنيش= ولو زادت اللمعة وزانت دشادشها

الي صار يمشي بالعرب مشية الدرويش= مهرّج يخرّج كلمته ما يفتشها

ولا شاقني قصر تعلا عن التشويش= ولو كثرة أبوابه ولانت مفارشها

الي صار ما به للرجال النشا ما عيش= ولابه ظلال لكل ملفي وطارشها

ولا همني طير مقرنس وغض الريش= ولو طالت سبوقه وعينيه يرمشها

الي صار في حزة هداده بوسط الهيش = والي هد ما رد الذهيبة وهنّشها

ولا هزني زول تحرش بنا تحريش= ولو خضب كفوفه وعلق رشارشها

الي صار ما عشعش بقلب العنا تعشيش= وعيني تراعيله وكبدي معطشها

ترا النظرة الأولى يجي حكمها به طيش= قبل لا تحررها ترقّب هوامشها

سواة المهرب يكشفه آمر التفتيش= الى دقق النظره قبل ما يناوشها
ومن له نصيب مع هل الخيل وأهل الجيش= يبي يأخذه وافي وبيديه حايشها

ومن خطوته دون السبق يلتحف بالخيش = ولو خضب كفوف الليالي ونقّشها

أقوله وانا منيب مخبر ولا شاويش = لكني بوسط الناس والناس اعايشها