قالوا انت بمجلس القاضي ولالك غيره

[حمد البادي]

قالوا أنت بمجلس القاضي ولا لك غيره=وش تبي بالخربشات وسيرة الأسطوره
قلت . هذا مجلسٍ لي وابرمه واديره=ماهو الغيري ولا رجلي عنه مقصوره
أتنقل بين موضوعاته المثيره=مثل طيرٍ ينقر اللي يشتهي منقوره
واعشق الفن الجميل برسمه وتصويره= الأدب يجري بدمي شعره ومنثوره
انسجم مع لحن كلثومي وصوت أميره=واطرب إلفيروز واسترسل مع الشحروره
والنوايا ما تجي رأسي ولا تفكيره=أعرف احدودي واقيس اليمّ قبل اعبوره
بيض الله وجه ( بنت ) معطرين السيره=ماهناه اروح وانا خاطري مكسوره
أكرمتني وجبرت كسري وكثر خيره=عاجزٍٍ عن شكرها لو قلت له مشكوره
من يكيل الحب يعرف حنطته وِشْعِيره=والحبوب انواع وسط أكياسها المصروره
كل من قدّر عباد الله فرض تقديره=قالها الأول وهذي كلمةٍ مخبوره
ربما بعض الضرر ينفع وفيه الخيره=والغلط مرجوع ودروب الوفاء ماثوره