يـا عـلـي مـن جـدّك ؟

[ابن الخطيب]

يا وسع بالي وانا بالي معه بمرادّه=حاورتني فيه روحي والهجوس الهادّه

لين وصّلني لشارع بيته اللي جيته=مدري كم مرّه ولكن ويلكم يالعادّه

كثر ماني ناشبٍ له من تحت شبّاكه=كثر ماني عاشقٍ قلبه وكثر موادّه

سبّته فصّلت ثوب مدبّلٍ في كمّه=لانّ دمعي لا تحدّر منه ماني برادّه

قرّبوني له خذوني له بغيت اشوفه=والله ان عيني على شوف العذارى صادّه

استباح القلب واضلاعه وجا من بيني=وقامت عروقي تثنّى له وهي متوادّه

كل ما جيت اوصفه في قافيه ضيّعني=مير كنّه في القصيدة ذي قايل سادّه

الشعَر مثل الشمس حزّة صلاة المغرب=ما يتمشّط والهبايب لا الفحت به كادّه

والثغر من فوق مثل هلال مثله تحته=والنحر كن بينه وبين الرشوش مشادّه

والعيون اللي على العالم تجي منفرجه=البلا لا شفاني تقلب زوايا حادّه

والصدر ما فيه حاجة تنذكر لكنّه=وين ما روّح تلاحق به عيون اللادّه

والخصر لا من تيامن كل شي تيامن=وان تياسر يسّر الدنيا وما الله حادّه

بنت ابوها لكن ان فيها ملامح منّه=هذا ما راجع تفاكيري وجت متضادّه

ناظرت فيني وقالت يا علي من جدّك؟=وانا نفسي في تردّدها ولو هي جادّه

استخرت الله لو ان الذنب ربحه بيّن=وآتذكّر غربلة ديني ونقص المادّه

قمت باقرا ما تيسّر والتحف واتعوّذ=واتبيعد من شياطيني وبابي رادّه