إعزفوا لي موسيقى حزن . لين اصيح

[حمد البادي]

إعزفوا لي موسيقى حزن . لين اصيح=دمعتـي رايبـه والجفـن حابسهـا

ليتها تنفلت مـن قبضتـه وتسيـح=بعـد قامـت قنـاة الدمـع تندسهـا

كودي اركد وثقل الصدر عنّ ايزيـح=واسحب النسمه اللـي ودي انفسهـا

العواطف تدفّـق والزمـان اشحيـح=كـم اساليـب وِضْغـوطٍ يمارسهـا

فوق قلبٍ تجاويفـه صهرهـا الفيـح=فيـح نـارٍ شـرار الوجـد يقبسهـا

من هوى اللي هواها جاء لقلبي تيـح=بنـت قـومٍ بعـيـداتٍ مرامسـهـا

نقوة المنتقي من مرضعـات الضيـح=ماغويـت الفراسـه فـي تفرّسهـا

ودعتنـي ولانـي ناقـصٍ تبـريـح=واظلم الكون في عينـي وغطلسهـا

أبعدوهـا ونـا قلبـي عليهـا ميـح=تربتـه بكـر مـابـلا مغارسـهـا

كِنّه الريشه اللي فـي مهـب الريـح=ماتدانـي هبـوب الريـح تلمسـهـا

نوب يشتالها عالي ونـوب اتطيـح=ونوب يذرا لهـا الـذاري ويرمسهـا

واعذابـي وياويحـي عليهـا ويـح=كل مـا عاكسـت قلبـي وعاكسهـا