قصيدة رائعة للشاعر سليمان ابن شريم رحمه الله تعالى
يالله من مدات جـودك يبـا الجـود === ياعـالـم بمغـيـبـات اللـيـالـي
تفرج لقلـب عـن مناويـه مـردود === عليـه مـن غـارات بقعـا ميالـي
على عشير بـدل الولـف بصـدود === والولف حنت لـه قلـوب الجمالـي
انا له اشفـق مـن خلـوج لمفـرود === وهـو وسيـع خاطـره مايبـالـي
جحدت حبه يوم انـا اقـواه بركـود === امسي بذ كره واصبح الصبح خالـي
كني صحيح وخاطري منـه ملهـود === والناس مايدرون انا ابخص بحالـي
وشلون اطيب وخزنة القلب ماجـود === لاصـار ماماجـود شـي بغـالـي
عليـه اجـدد سنـة العبـد مسعـود === لين اشتهـر بيـن الخلايـق هبالـي
ماذاق من ضيم الليالي على السـود === ذقته على اللي مثل عنـق الغزالـي
اصفر عفر خلاني امشي بـلا قـود === بامـره تقدينـي سمـارة ظـلا لـي
الى ذكرت اشقر على الردف مرجود === مثل الد ويرع فوق حسـن الدلالـي
ولجلج بصقرات محاجيرهـن سـود === واهنف وضيـع حيلتـي واحتوالـي
بيني وبينـه حبـل الادراك ممـدود === والهـرج بابـه مـدفـع مايكـالـي
ياعود ريحان علـى جـال راقـود === من حيث مامالت بـه الريـح مالـي
بغيـت منـه بغفلـة النـذل عنقـود === يبرد لهيب القلـب عقـب الهمالـي
اشفق عليه وكـل ماجيـت مـردود === دربه وحل ماهـوب دربـه عدالـي
يسعى بفرقى صاحبي كـل مقـرود === اما حكى له فـي والا حكـى لـي
وشاهدت مما قـال حمـاد لحمـود === من غاب عن عيني سلا عنـه بالـي
يابو حمـد لاتقطـع الهـون بالكـود === عساه مايجري لك اللي جـرى لـي
ان مت ماحصلت لي منـه مقصـود === تـراي عنـده خبـروا بـي عيالـي
وصلاة ربـي عـد ماشـدوا القـود === او ماهمل وامطر حقـوق الخيالـي
والأل والاصحاب ياصاحب الجـود === ياعـالـم بمغـيـبـات اللـيـالـي