محمد الصالح القاضي

لعل عذرا ما براسه نغاميش=ولا تطرّب للهوى والغواني
تعطى الحنيش اللي إلى هاش ما هيش=مذروبة النابين صقها الإذاني

عزيل ياحسن التعازيل عزيل =من سله السلال محدٍ فطن له
وعين تهل الدمع مثل الهماليل =عجلٍ تهله ذرافٍ ماتمله
مني عليكم ياهل الدار تهليل =عن عين مشفوحٍ بكم مشفحله
عنودكم تذبح بنجلٍ قواتيل =وزلفٍ تهلل له زها مفرق له
ينسف عثاكيلٍ كما سبّق الريل =يغري الى تله على مفرعٍ له
وزمة نهودٍ مثل وصف الفناجيل =في لبةٍ له توها مستقله
وبدر البها غرب لها في دجى الليل =وشمس الضحى تنماز عن غرّةٍ له
وتغري بزغروت الهوى والهلاهيل =ويمشن له كرهن ويقفن رضى له
وإلى قعد مع راجسات الخلاخيل =فالزين له كله لحافٍ وكله
ونطقٍ تسلسل منه سحرٍ أبابيل =وملحٍ يتله من عجاريف دله
يسلي الخليل بغنج دعجٍ مغازيل =يرمش ويغزِل له ومره يتله
أواااه لوهي بالصور والتماثيل =لا خذ تماثيله معي وامتثل له
أحيا بهرجه لي وحسن التعاليل =واتلف بهجرانه وانا مصخرٍ له
وش عندكم في طلب مثلي إلى قيل =من هو طريحٍ له عسى ماتشله
إن مت ياطلابة الثار تحليل =أنتم وأنا ياعزوتي فدوةٍ له
سالوا غريرٍ بالهوى مابعد سيل =قولوا على أية مذهبٍ يستحله ؟
قالوا نراك موجّلٍ , قلت ماقيل =قالوا عليلٍ , وقلت مافيه عله
قالوا علامك تالفٍ , قلت بهليل =من صارمٍ من بين عينيه سله
لو إن جرحي من عْداةٍ مقابيل =ماحل في قلبي هيامٍ يتله
لكن جرحي بالخفا من معاسيل =طفلٍ سطا وانهل صوابي وعله
لا ياطبيبي دلك الله تدليل =داي الخفي ودواي من مبسمٍ له
لكن مابيدي ولا في يدك حيل =ذا شِنْ كِتب للعبد ماهو هوى له
ياسيدي زرني تراني من الويل =وجلٍ ولي باقصى حشاي الف عله
قلبي عزب سرحه بليا محاصيل =منكم وانا لي عندكم مرتعٍ له
قالوا وصال الشوق هيلٍ بلا كيل =ويَدْهونِنِي به ليت من يتصل له
وأنا ومن نزل تبارك وتنزيل =ماشفت منه إلا العنا والمذله
شوقي بخيل وسايله مابعد نيل =إالا الهفا معه الجفا مردفٍ له
نظيف عرضٍ عن هل القول والقيل =وله البرا من واهيٍ مستحله
ياما عنوا له ملحفين المراسيل =مني وغيري قوم " رح له وقل له "
وردت طوارشهم هبايا مفاشيل =ماحصلوا غير التعب كاسبٍ له !