توبة القاضي

يا محل العفو عفوك يا عظيم=ولطفك اللي كافل كل الآثام
يا سميع ويابصير يا عليـــــم=يا قوي ويا متين ويا سلام
يا حميد يا مجيد يا حكيـــــــم=يا عزيز ذو الجلال والإكرام
يا عطوف يا رؤوف يا رحيم=جلَّ شانه ما يهام ولا يــــرام
بنورك اللي يوم ناجاك الكليم=دك سينا خرّ موسى ثم قــــام
مـُوحد ٌ يدعيك بالليل البَهيــم=وبالتخضع والتضرع بالظلام
خاشع لك خاضع لك مـُستقيم=اسألك وادعيك بأسماءك العظام
أن تـَروف بحال من جسمه سقيم=عِلته تبراه له خمسة أعوام
داوني بدواك مـِن داءٍ أليــــم=واشفني بشفاك يا من لا يضام
من انتحالي دوك حالي حام حيم=والمرض رض الأعضاء والعظام
مدله نفسي بتدليه العظيـــم=عن لذيذ النوم مع طيب الطعام
ولا لي مشكى غير للرب الرحيم=بحق السبع السماوات العظام
ذا ومع ذا لو تمادوا بالنعيم=فإن عمر المرء مرده للعدام
كل ابن انثى ولو طال سليم=لا زم ٍ يشرب بكاسات الحِمام
من عميم إحسانك ارحم يا رحيم=يوم نزع الروح وإن جاها حمام
قام يصعدها ويحدرها غريم=في عضاه من الدماغ إلى البهام
شاخص طرفه وريقه ريق هيم=كل عرق بالعرق يرشح شمام
يوم نزع الروح لجنَّ الحريم=وجضوا أهل البيت واشتغل الغلام
والشفيق اللي يوده والرحيم=يستشين بشان تجهيزه قوام
والخشب دن مع الخام الرخيم=وفصلوله وزره فوقه حزام
ثم شاله كل شغموم حشيم=مرجلين معجلين بالهمام
ووضعوه بمُوحش قبر ٍ ظليم=ووسدوه اللِبنَ عن ريش النَعام
وكشفوا عنه الغطا قبل الهديم=وفككوا عنه العصايب والحزام
ورصفوا فوقه من اللِبن ِ الضخيم=وادخلوه وودعوه بلا كلام
وحدوه بموحش ماله نديم=غير ما قدم من أعمال قِــدام
عند خلق ٍ بارزين في صَميم=صامتين ما يردون السلام
حال ما خلوه بالبرزخ مقيم=جاه من ناجاه عن خمس ٍ تَمام
اسأله يلهمك رشدك يا غريم=في ثباتك للملائكة الكــــرام
وعقب هذا البعث والهول العظيم=يوم حشره يوم نشره للأنام
يوم يبعث كل ذي عظم رميم=في صعيد للحساب والخصام
يوم نـَصبه للسراط المستقيم=لنسل يافث ثم حام ثم سام
حاسرين عابرين به نظيم=ذا يصيح وذا يطيح من الزحام
وذا جريح وذا عطيب وذا سليم=وذا يمر مرور برق ٍ في غمام
وذا يُسرُ وذا يُجَرُ إلى الجحيم=وذا إلى الفردوس من باب السلام
وذا يُخلدُ بالنعيم اللي مُقيم=وذا مسيم في لظى دوم الدوام
كيف من ييقن بهذا يا غشيم=يفنى الدنيا ويغرى بالحطام
وين ابوك وين جدك؟ يا عديم=وين خالك وين خِلك والعمام؟!
وين شُبان يهدون العديم=وين شيبان ٍ شغاميم كـــرام
صُيروا في قبورهم مثل الهشيم=خامدين هامدين في هدام
تبرم الدنيا وينقض للبريم=واخيرها منقضية مثل الاحلام
يا (أحد) يا (واحد) شانه عظيم=يا (صمد) يا عالم كل العلام
سامع في غِبة البحر البهيم=صوت يونس يوم نادى بالظلام
يا إلهي خذ بيد قلب ٍ سليم=عن عذابك يوم للخلق ازدحام
من بحر مجدك وجودك يا كريم=نفحة نـَسعـَد بها دوم الدوام
أنا دُست الخطايا من قـَديم=طالبك صفحك وعفوك لي ختام
الهوى والنفس أغواها الرجيم=ونشر فضلك واسع ذا والسلام
ذا وصلى الله على طه اليتيم=وآله والصَحب ما هل الغـَمام
عدد من طاف بالبيت القديم=بين زمزم والحجر هو والمقام