قصائد ابن جابر .. ادخل وأضف قصيدة

يامل قلب من هوى البيض منعاق = في سجن دين عند الاحباب ماسوق
صادف لهن صدف بصرف بتيفاق= غبات غي البيض غيا لها العوق
في وسر حر حاضنن غير ما طاق= زفرات عبرات تكسر بصندوق
ضيق نحط بصدر منه الحشا ضاق = سعاير تصلي الضماير بحاروق
غرو شغف قلبي على العمر لحاق = دوبه يسل الحال سلال ساروق
جاش الغرام بجاش من كض ترياق= خمر الهوى واختل علقي على الشوق
يا يوسفي الزين حوري الارناق = يا جادل سلف من الريم بفروق
ما حق ياغض النهد قتل مشتاق = له ونت ماتنطح له الخسر والسوق
وارد دليق كن بطرافه حلاق = عن البريم النابي الردف مفهوق
باهر جمال كل ما منه لي لاق = جيد وصدر ضيع الدرك ملوق
زاهي نهود بينهن تقل براق = تشبه كما وصف الزبيدي برقروق
وشافي حم بسلسال الارياق = مثل الرعاف بداير الخصر مفروق
ياعنق ريم شاف له زول دراق = عواتقه تزهي الخنانيق والطوق
وعيون نجل لتغانج لعشاق = ميز سهوم السحر في حاجر الموق
والخد براق الدجا نوره انساق = يدني صفاه لصافي التبر بلهوق
ورهاف غر كنهن ضيق الاوداق = كالحص والا قحويان بصعفوق
وترايب كالون مطوي الاوراق = والا فجمار بلذلاق مفلوق
والوسط به شبر من الريش ما ضاق = يسوج من صخف الحشا تقل مسيوق
هاف الخواصر نابي الردف والساق = به ضاق منقوش من الشاخ مدقوق
يا غلة المرجان يا شمس الاشراق = يا نور شمع صافي يقمر الموق
خوتم على قلبي من الطمس شبراق = في كاس سحر يدعي العقل مدفوق
والله لو يمشي شقاق بالاسواق = بين الملا ما يطمخ الخمس مخلوق
من غر واغري ما رجا منه الاعتاق = بملاعب ومزاح غي ومنطوق
ياعد ولا يعطي للقوال مصداق = لاهل الهوا هرجه من المطل مملوق
دوبه يواعدني بواف الوعد باق = توعيد عرقوب قريب ومفهوق
يوريك يا راع الهوا كتب دقاق= مع كل مرسول على السد ماثوق
ولا كتب لي للمفاهم بما راق = في بروة فيها جواب من الشوق
الى صفا لك ساعة مدمج الساق = اقطف زهر بستان صاحبك لو بوق
من قبل يسعى نبا البين بفراق = دنياك لو فيها تماديت ملحوق
انهب ولا يغديك في طيب الاوفاق = عصر الطرب والعمر تاليه ملحوق
واخلاف ذا من فوق كالقوس سراق = يطوي طواريق الفيافي بلا عوق
اضراب تيه تو نابه نبا شاق = مدورم البرجوم كالقوس نقنوق
شاحوف شط فاج الامواج وانساق = في وسط غبات للازوار طاروق
كن اجتذا به وان حدا الخف بالساق = اخوع يجدع جلمده تقل زاروق
سهم الى جا الخوف راعيه وثاق = يصدف ولا يصدف ولو كان مدروق
تلقى حجا ملجا فلك كل منعاق = عبدالعزيز مبادر العجل بوفوق
ما سار له نضوي بمطوي الاوراق = الا وهوعندي على الناس مفروق
حر شجاع شاع صيته با لافاق = بابه على شحصات الاعناق مدلوق
من جالهن هود من الليل يشتاق = كاس يصح الراس مع حسن منطوق
له ماكل يعرض على كل مراق = ماهوب عن دير هل السوق مفهوق
احق واندى من طها بارق حاق = ما يوم استقصر عن الضيف مسبوق
مطفي لظى الهيجا الى غطى الافاق = قبو المحبب نزح الربع مسيوق
لاسترهق التفاق وانساه الالحاق = حامي التوالي وان عثر كل سابوق
افتن من الضاري عديم وحماق = يارد ويروي من دما الضد مذلوق
افتن من المفتون بالشوق الى ذاق = ليعه شفيق حل في قلبه خفوق
متحير بالحيل من قهر الاعواق = والقلب من حبه بالامراس مخنوق
عزن برد يا حجا كل منعاق = ان كان لك بسواق مدن الهوى سوق
صلاة ربي ما مشى سيل الاسحاق = غب الحقوق وما نشا المزن ببروق
اوعد من بالارض يمشي على ساق = او زبر الذاري شفا راس شاهوق
على النبي الي توافوه الاصداق = مني عدد ما رفرف الطير بسبوق

نح يالقميري على المرصوف = غينٍ عن الشمس مكتنه
يالورق صفن صف وصفوف = واصف وانوح معكنه
تنوح طربٍ وانا مشغوف = شواطن القلب شعلنه
تبونن اشهد على ماشوف = وبلغ المبتلى ظنه
لعل جو العلي لخسوف = عسى الصواعق يهدمنه
حفايره ينشفن نشوف = بالقيظ ما يرتوي شنه
وراه ما ظلل الغطروف = راعيه الاشواب يشونه
هنوف ما تنوصف بوصوف = وان قضت الراس وش كنه
منه مهاة تقود خشوف = على ثلاث تعدنه
رواعب يصفقن بكفوف = أنسنه الفرض والسنه
والا فـ ونة قليل الشوف = مد العصا صار به منه
او ونة اللي على الشاحوف = وازوار الامواج شالنه
او ونة اللي على الجلحوف = وخيل المعادي توطنه
والا فهي ونة المصروف = أسقنه السحر واغونه
ومن لامني في صخيف الجوف = جعل الهنادي تدالنه
يعصره البين عصر قروف = عن صبغ الاسلاب ينفنه
في ديرة بابها مسقوف = على نصارى وكرجنه

قلت قولٍ يوم مانيب الصحيح = والعقل والراس ماهنب الصحاح
العجب لله لولا اني متيح = كيف أسب الجو وارضا بافتضاح
جوّنا ما يستحق الا المديح = هو ربيع قلوبنا لو هو متاح
عايزٍ لولاه شرهٍ بالسريح = والحداير قطعن زين الصفاح
به ( هلاله ) كل ما منها مليح = حلوة المشروب شهلولٍ قراح
قتّها والى رسا مثل السليح = والذره وان حوربت مثل الرماح
ظل غينه منوة للمستريح = مع تفافيح تهزعه الرياح
كم جدعنا دون جاله من طريح = بالملاقا يوم توريد السلاح

يالورق غرد وجر الصوت = ياما لعجل التلاحيقي
غرد على غرغدٍ نبوت = ما عفجوه المراريقي
هيضت مني نبا مكموت = فكك لياح الصناديقي
كل بطرد الهوى مبخوت = بوصال حبل الاصاديقي
وانا بطرد الهوى مشموت = الا وغبر توافيقي
يا من زوا للحشا ببتوت = خنٍ بوسطه ملابيقي
يا زين ما تاصل المبتوت = يوم تحلي به الريقي
ما تنعش الروح قبل الموت = من سلسل ما بعد ذيقي
مثل المطر ناقع بخبوت = في ظل بعض الشخاقيقي
واحذر عن الطاغي الطاغوت = ضحاك بالوجه مليقي
الى ولى سدك العكروت = شلقك بالحكي تشليقي
راع الهوى دايم ممقوت = يشمت بليا تحاقيقي
من لامني في بحور الحوت = تزل عنه الدوانيقي
والى قعد بالقرى بربوت = والى ضرب نية عيقي

يا حمام بيسر الظاهر يروج = ساجع بالغين ولحونه تلاج
وان نبض عدل اللحن بين البروج = فجّع المبلي وهو بالصوت ساج
يا غزال مرتعه خال الفجوج = من حذاره ما يرتع بالهباج
آمنٍ ما حوله الرامي يدوج = ما قعد له بالمتاقي والزراج
قمت أفزز واجتلد كني خلوج = ضيعت ضيره تحت قبو العجاج
واتوجد وجد عبار بموج = من مخافة يصطفق به لوح ساج
ليت صاف الخد يحتاج مخروج = جبت انا داعيه واعجل بالنهاج
بوٍ ثليلٍ يوم قضه ذيل غوج = أشقر فصم عنانه بالعلاج
والجبين ومبسمه برق لعوج = والفنر بين المقارن والحجاج
والثنايا بينهن مثل البلوج = او كما در الاباكير العساج
بونهودٍ حلفن بالثوب سوج = مزعنه كنهن حقين عاج
جيدات بس برسال الدروج = للهواوي مع مصاليت اللهاج