عبدالله العير

إن مت عزّوا لي مرامي ووجدان=وابكوا على قبري ليالٍ طويله
ابكوا وبكّوا لي معاكم كحيلان=خليف شيّال الحمول الثقيله (*)

خلوني أرقد في مداليه جرّاح=واحط لي وسط الطريق استراحه
اذني ادله باقي الوقت وارتاح=لو كان مافي جور الأيام راحه

البسي ياساحة الشعر ملبوس الحداد=واعلني هجري عن الملعبه ستين يوم
صمت عن خوض الملاعب ونزلت الشداد=كود اضنه يدله القلب وتخف الهموم
هم من فرقاه حشت معاليق الفواد=تاج راسي عزوتي كل ماجت للزوم
والعزا لمطير ماهوب ليّه بانفراد=يامطير الله يحسن عزاكم به عموم
وكل جمهوره بعد في جميع انحا البلاد=عظم الله اجركم في الفقيد اغلى النجوم
والله اني كل ماجيت اكف الدمع زاد=مير هذي قسمة الله وترضينا القسوم
ياكريم الوجه يالله يارب العباد=طالبك ياواحدٍ غير وجهك مايدوم
ارحمه واغفر ذنوبه ياعلاّم العاد=انت ملجأ من لجابك وغفّارٍ رحوم

مرحوم ياللي بأسفل القبر حطوه=هلّوا ترابه ثم جابوا نصايب
نبكيه واللي يعرفونه بيبكوه=الشاعر ابن عبيد حاظر وغايب
الشعر بعده ياهل الشعر عزوه=جرحه عميق ولاتفيد الطبايب
لو الفقيد يرده الدمع ردوه=كل القبايل بالبكاء والقرايب
لوحاولوا ينسون فعله مينسوه=يشهد صغير السن فعله وشايب
سجله التاريخ والكل زكوه=بالفعل مامثله عطيب الضرايب
اعزي الاخوان واعزي ابوه=واعزي الاقراب هو والنسايب
واعزي اللي كلبوهم يحبوه=واهل عنيزه متعبين الركايب

جتني تهل الدمع وتقوم وتطيح=مريم حشاشة جوف عبدالله العير
قامت تلج بعالي الصوت وتصيح=مريم حشاشة جوف عبدالله العير
الموت مايحتاج ياعم تصريح=امر الولي ماشي على كبار وصغير
جعل السحايب فوق قبره مراويح=وبنبت عليه من القب والنواوير
الله يوسع له بقبره تباريح=ويغفر له الله يوم صف الطوابير
ويجبر عزانا في العيال المجاريح=وتغفر ذنوب اللي رفع راية مطير

يابيوت القصايد اكتسي بالسواد=ونكسّي كل حرفٍ ياحروف القصايد
وزعي الهم بمطير الوفيه بداد=وارثي العير عبدالله وسيع البنايد
جعل منزلك جنه في سلام وبراد=جعل ماتشوف عينه الردى والنكايد
جاني العلم يوم ان الخلايق رقاد=فجر يوم الخميس العلم عسرٍ وكايد
علم منّه حمار النار عوّد رماد=وكل شئٍ جديد منّه يعود بايد
عزتي للشعر بعده قليل المراد=عزتي للمواقف والنبا واللهايد
عزتي للمعاني والسيوف الحداد=ول شب الخبر في وسط صدري وقايد
اذكره بالمجابه والحروف الشداد=راح ماخلّف الا بيت يبني الشدايد
وخلّف علوم عزٍ كلبوها وكاد=وعقّب بوسط قلبي جرح جرح ونكايد

يالله ياللي كلنا منّك وإليك=ياللي بذكرك تستلذ ألسنتنا
وقلوبنا بين اصبعينٍ من ايديك=وان كان ماثبتها ماثبتنا
نهار تلفضنا المقابر ونآتيك=من خشيةٍ فينا نظرنا تحتنا
عريا وزريا خاضعينٍ مداريك=صكة علينا ذلةٍ غاشيتنا
وان ماتهيّت رحمةٍ من مناشيك=والا ترا ما اعمالنامنجيتنا
منك الرجاء وانت الرجاء والرجاء فيك=تستر على خلاتنا فآخرتنا
وترحم جنازة مسلمٍ في حراويك=اغلى جنازة مؤمنٍ فارقتنا
وتغسل ذنوبه بالبرد من حسانيك=وترفع مقامه مع مقام انبيتنا
عبدٍ خجول ومقفيٍ عن معاصيك=متذكرٍ له ساعةٍ قافيتنا
(سامي) عسى اعمالك بقبرك تسليك=وتونسك في وحشةٍ موحشتنا
ويمدلك بالقبر نورٍ يباريك=في جاه من يعلم بغيب افئدتنا
ويلطف ببوك اللي لسانه بطاريك=اللي قضى وقته يربّي ويتنا
وتجبر عزا امٍ ترجي الله وترجيك=اللي عليك من الحزن حزنتنا
وحنّا ترانا من غلا ابوك نغليك=وان مادعينا لك ظلمنا بختنا
اللي على درب المراجل مربيك=مديرنا اللي رافعٍ منزلتنا
يكفيه من جور الزمن فجعته فيك=اللي نبي نبطي وهي موجعتنا
جينا يابوسامي (بسامي) نعزيك=وانته تعزينا على فاجعتنا
مير استعن بالله عسى الله يقويك=على مقاديرٍ خذت ماعطتنا