رثاء الشيخ عبدالعزيز المساعد

وَجْــه الله البــاقـي ولا فيــه غيــره=هو ذا الجلال بْشَان خلقه والاكْرَام
من عاش يَلْقى خَتْم عمره مصيره=عمــره وفَــا والا تــقَـاصــر بــالاعْــوَام
يــارب نــور اهْــدَايتـك نـستشيـــره=نصبر ونرضَى بالقدر منــك باسْــلاَم
مصــايب الدنيــا علينـــا كثيــــره=فــقَــايـِـدٍ بـــيــن الــلــيــــالـي والايـــَّــــام
كله قدَر لو هي علينــا كبيــره=دام المــنَــايــــا للـمـخــــالـيــــق بــالـــزَّام
من حَرَّك الخُطْوَه يِكَمِّل مسيره=له بـاخِـر الخُطْــوَه علامــه ومِرْسَـــام
مـن قـبلنــا روس الهدايــه نــذيــــره=والخير تبشيــره بْتَطبيــق الاحـكـام
واليـوم لاتبحث خفايـا السـريــــره=للحــزن شــاهــد مايـحَدَّد بــالارْقَــام
فــات المساعَــد يالله انك تجِيــــره=شيخ السِّوِيطي وقت مشوار الاقدام
عبدالعزيــز اللي حيـــاته قصيـــره=في حِسْبــة الحـاجــه لمثـلــه بالاعــلام
شيخ القلــوب اللي تحب السِّتيــره=يفتي مــع الرحمــه بْتَقــريب الافهَــام
قلبــه نـشَـا بــالعلــم شعْلــه مِنيــــره=والـديـــن كِنِّــه بــالغــريــزه والالهــام
الله كتــب له صفحــةٍ مستنيـــره=من جملة الاصحاب وافِـين الاحْــلاَم
نور البصَر عَاضِه بنُــور البصيــره=وقــلــبــه يــوَرِّيــه الــتــفــاصيــل قــدَّام
رمز الامـام اللي ترك خيـر سِيــره=في مــاعــرفــنـــا عــنــه صــوَّام قــــوَّام
امْضَى شبـابــه بالعلــوم الشِّهيـــره=والعــلـم حَــظٍ ســاقِــه الله الــى قَـــام
بــالمعهــد العلـمــي ربِـينــا بْــخِيـــــره=من فيض علمه نِشْتِهي نَفْح الانْسَام
مايرتضي بالدين نقـص اومعيــره=ايـــــضـــا ولازود يــــذوره بــالاوهــــام
الله خــلــق بِـــقْـلُوبنــا لــه جـــزِيـــره=ماشاركِـه مِثْلـه امْنَافــس ولا حَــام
كــل المــزايــا الـطيِّبــه لــه وِفيــره=تــشهــد معِــه دنْيَــاه عــامٍ بَعَــد عــام
يــارب بــالــرَّحــمــه وزُود البــرِيــره=في جنة الفــردوس ترفــع لــه اَعْــلام
وَسِّــع لـه المـلْـفَــى ومَتـِّـع نـِـظِــيـــــره=في حُفْــرةٍ فـيـهــا السعــاده والاِيــلاَم
صــلاة ربــي مــع ســلامــه ذِخِيــره=علــي نـبـيٍّ هَــدّ مــيـــدان الاصْــنَــام