يالله كان البر ذهبت وحوشه = بين الدرك والجوع والانقطاعي
بهايم قلّت عليها المعوشه = ما عاد تلقى بالمفالي متاعي
في كل فج كاثرات اولوشه = عاشت بها برق الرخم والضباعي
امر بهر ما عاد نقدر نهوشه = كلّت وملّت من غثاه السباعي
منك الفرج نرجي بشاير طروشه = نوٍ رعوده تودع النيم ياعي
الى نشى مثل الشوامخ عروشه = يبرق طهاه ويتّصل باتساعي
يقبل حقوق كل وادٍ يدوشه = ولا يركب الطامن عشير الرفاعي
ماشي يغطي بالوطا ما ينوشه = واسع يردّ ابه الخبر كل ساعي
ايشيّل فروخ الوعر من عشوشه = يملى المضيق وكل خدٍ وساعي
تضفي على حد المناهي رشوشه = وتسيل وديان السهل والتلاعي
الى انحدر له بالمحانيب هوشه = مثل البحر فيه الزبد كالسواعي
تلقى الحيا غب الشهر من رشوشه = تصبح مهازيل المواشي شباعي
فيه الزهر مثل الزوالي نقوشه = يعجب لمن دار النظر باطّلاعي
نوّه على الفيحا وباقي نطوشه = دار الحيا ذكره بالاقطار شاعي
دار السعد دار الندى والمعوشه = دار الشراحه والمبان الوساعي
لاشفت سوق العصر تعجب شبوشه = كالحشر داعيهم للاقبال داعي
بالسوق غادٍ للمخاليق شوشه = هاذاك شرّايٍ وهاذاك باعي
دار يهدّون الاصاعيب غوشه = ماصوفة مثل حنيش الافاعي
لاشنّفت حرّابها ما يهوشه = لا رازها يمشي لها بانخضاعي
دار الى مالحرب بانت نبوشه = فافعال اهلها من قديم افداعي
يوم تخالف بالنشاما نموشه = يوم يحير به الذليل الرعاعي
يوم الفشق مثل التهامي قفوشه = يردون حيضان المنايا سراعي
صاحوا وزادوا ضدّهم من غشوشه = كم ابلج تنعي عليه النواعي
هذا ذبيح وذا تقّرب نعوشه = وهذا هرب لكن له الموت داعي
يتلون مفني باللوازم كبوشه = غيث المحول ومدهل للجياعي
عبدالعزيز اللي كبار بطوشه = عن مخلبه ماللضديد ارتفاعي
ملجا الضعيف اللي خلا من قروشه = وستر الهنوف اللي رمت بالقناعي
وان سرّبت يم المعادي جيوشه = من الشر يوفي راعي المدّ صاعي
وجهه يبادر بالمروه بشوشه = لاجنّب الكايد قصير الذراعي
عدٍّ الى نشّت مغاني امشوشه = هدّاج تيما كل ما ميح فاعي
وصلوا عدد ما العين تغضي رموشه = او عد ما يمشي على الساق ساعي
على النبي والآل مادر بوشه = او عد ما قيل ارفعوا للشراعي
2007, 12:50 AM
يالله كان البر ذهبت وحوشه 
العرض العادي
المواضيع المتشابهه 
