سلام ياللي لجدّات الهوى خذها وذب سموله = ترحيبة عد ما جرّ القنيب الذيب بالمشرافي
بديت طرق على اللي ما يعرفه يستغرب اقفوله = سكه غريبه ولا تخفى على اللي للهوى صرافي
وسم الهوى كالدحل ما كل ورّاد يدل اسبوله = يموت عنده ولو هو ما يغيّض جمه الغرافي
لي صاحب شد عني في رجب واليوم هذا حوله = اقفى وانا خايف عقلي يجي به من هواه خلافي
يابو عزيز عشيري كلما كزيت له مرسوله = لو كان هو مقبل يميّ عطاني بالمودّه قافي
يالله ياللي تجون الترف من معروفكم قولوا له = من حسن ذاته يداوي جرحي اللي بالضماير خافي
الجادل اللي يحط المسك والريحان في مجدوله = ونهود ما فرّص العيّل ثمرهن والثمان رهافي
سيد العذارى الى منّه مشى توحي دنين حجوله = شروى دنين الجرس بالمهره اللي لبّست مزغافي
لو اتمنى قلت ليتي مثل درويش نقل كشكوله = ازور بابه واطقه وان تعذر قلت يا خلاّفي
الصاحب اللي يمنيني بهرج اولا يثّبت قوله = ابنفخ الكير مير الكير ما ينفخ وجمره طافي
من حب طاري فرج راسي غشاه الشيب قبل حوله = شفته معه نافعي او صفرة يلعب بها العجرافي
وش فايده يوم اطالع حمل عنقود وانا ما طوله = انا متيح المذكرّ مير قلبي للهوى ميلافي
من عود ورد على الساحل غشاه الحمل في غملوله = من لين عوده تلاعبه النسيم ومطرقه غريافي
قفّا وقفّيت لاكني قريب الوصف من بهلوله = تمشي بخد سوا رجلي وانا كني على ميهافي
خايلت نوّ سديد ولا سقاني بالحيا هملوله = خلّب بعد ما سرت فيه الرعود وبارقه كشافي
ياليت ياليت يوم انه تروّس واهملن ثعوله = اني على جال ريضان تسن الريح ماها الصافي
وردت عدّ ثلاث سنين ما صكّت عليه نزوله = ما خضّ ماه المدّوه للرعايا حزّة المهدافي
باطراف ضلعه عليه النفس لو ما ودّها مجبوله = شهلول برود واحلى من حليب البكره المشعافي
لا واهني بالهنا من شرب قبل الموت من شهلوله = ان ما حصل من غديره شربة درب الهوى ينعافي
بالعين عقب ورد العد كن مغلّب سملوله = تاره تعبّر وتاره دمعها فوق الوطا ذرافي
انا بوقت كفا الله شرّه الخافي ظهر له دوله = صارت نواميسهم بامر التجاره والحساب الوافي
كل يعذي ملابيسه وعابي للدهر ماكوله = ما يدري ان العمر كالفخ يتنا لمسة المطرافي
وكنايح ما تبي الا ثور هور ما تعد فعوله = مثل المحرول الى جا الليل عند وروكها زحّافي
ما تكرهه لو ذوايب لحيته تبتل من سعبوله = كنّه بعينه ولد باشة حلب لو كان هو هريافي
عند المداخيل شافت مشيته واستالفت مخيوله = مشلح وساعه وسبحه في يمينه والهدوم نظافي
من كثر ماله ولو هو غيسلي لابد يعطى سوله = وانا ومثلي محونا من كتاب اهل النسب يا كافي
هم ناس واجناس لكن المروه عندهم مقلوله = واللي بكور المطيّه راكب ما يلتفت للحافي
هيهات وين الجمال اللي من العاده تشيل حموله = بالعزم توصل علايقها ولو كان الزمول ضعافي
والعلم ما ينتفتش والهوى في وقتنا وشو له = واللي زرع بالتمنّي بالفلس من ديّنه يستافي
وصلوا على المصطفى ما فتّق النوّار عقب محوله = وآله والاصحاب ما لبى الملبي بالحرم وطافي
2007, 01:39 AM
قصيدة موجهه لسليمان بن شريم 
العرض العادي
المواضيع المتشابهه 
