قصته مع عجوز

البارحه شفت العنا والتناكيد = وانهل دمع العين تن وتفاريد
من شد ما جاني من الهجر حنيت = حنـّة خلوج تلتفت للمفاريد
بلوى بليت من الزمان بسواميح = واسقان مر الغيظ عقب التفاريح
غيظ يجرّح ثومة القلب تجريح = صبر على اللي قدر الله ومريد
وقت تغير واستدارت سنينه = وانا ومثلي شايف منه عينه
بير الهوى يا اهل الهوى دافنينه = ذهبت رسومه واسملن الاجاديد
بعض المساري يوم اميزّ مضره = وصدفات خيره ما تجي ربع شره
لو انت تجني به مشاخص ودره = تقول ليت الله سعى له بتلديد
سيـّرت لا عادت عليّ المسايير = ماهيب عاده مير هذي مقادير
وانا وقلبي بين عذال ومشير = بس الروابع صادرات مواريد
ليل سريته يمة السوق لاعاد = ومجنـّبٍ عن يمة الواش من غاد
والاي انا والفال كنا بميعاد = ما لي منع عن قدرة الله ولا حيد
قلت ولّ يا حظ قليل المحاصيل = يوم انتهيت بعاير السوق بالليل
ولا تعارضني خبيث الازاويل = حدبا تحوبي كنها دارق الصيد
قالت وش انت وقلت انا يالمرضـّاه = قالت مقادي للمثل قلت انا اياه
قالت هلا باللي تجينا حكاياه = هيّا معي ما لك بهذا مقاعيد
اقفت امامي تقل تلعب حويدا = تقصر خطاها كن بالرجل قيدا
وانا وراها مشيتي بالتوني = ابي عساها تقطع الياس مني
مابا المره تشرف على مستكني = بالهرج اوريها كلاله وتصديد
يوم اتفقنا يم سوق المبيعه = من شوفها ضاقت علي الوسيعه
محنونيه من خاربات الطبيعه = كالقوس والا مدبحات العراجيد
الله يخربها ويخرب وطنها = قامت تلفت بي وذلـّيت منها
واعجلت بالممشى ابا هج عنها = وهي تغذ بساقتي كن به قيد
وقفت وقالت يا فتى الجود ماذا = هيـّا معي ناصل محل بهذا
بيت عن الدايج مصد ملاذا = ان كان شفـّك بالهنوف اتلع الجيد
له قلت انا مما تريدين جايز = وادري واعرف بكيدكن يالعجايز
الله جعلكن لاخو مرّه خزايز = ياما رميتن مسلم بالمناقيد
قالت حشا ما جيت ادور فضيحه = والعلم هذا يوم اقوله نصيحه
ان كان ودك بالهروج المليحه = هيـّا نوريك الطرب قلت ماريد
واقفت وانا قفيت احسب ذنوبي = واقول لعل العرب ما دروا بي
وانا نجي العرض ماني خنوبي = لاشك اداري من هروج المقاريد
ظهرت من سوق الخطر وانطحتني = مانيب اعرفه والعجوز عرفتني
ولا دريت الا تجرّن بمتني = تقول ريـّض قلت لاعدت من فيد
وقفت وقلت الها الخبروش تبيني = قالت معي لك سالفه يا جنيني
لاشك خل العلم بينك وبيني = هيـّا ترا بالسوق هذا رواصيد
قالت مشينا قلت نمشي الى وين = ماشوف عندي لك مطالب ولا دين
قالت تبلـّغ حامض العلم بعدين = الى وصلت البيت فانشد وانا افيد
شاورت روحي قلت ابا روح معها = لو كان ما لي لازم في طعمها
لاشك ابمحض خاطري وش سنعها = واصبر ولو تكلف علي التراديد
جينا المحل ووقالت العرقليه = اهرج ترا الدنيا علينا فضيه
قلت ابشري ورضاك حق عليه = مملوك والمملوك في خدمة السيد
قالت تفضل قلت يا هملالي = ياما بعيني لكن الكيس خالي
قالت نسلفك الجزا يا حلالي = واقطف من الغصن الوريق العناقيد
ادخل ترا ما منك شكه وريبه = قلت ادخلي قالت بدا ويش ابي به
انا لكم بالباب مثل الرقيبه = واثره تلفن بالشرك والمصاييد
قمت اتوخر باغ الانصرافه = واملق لها بين الرجا والمخافه
وهي تبطح لي بهرج ولطافه = واثره تبي مسكة شليلي بتجويد
تليـّت روحي غصب واقفيت ناير = ومقدم يمناي عن كل عاير
الموت هين والطمع بالستاير = شوفة ذحاح الموت وفراقها عيد
دخلت في بيتي تنافض عظامي = واصبحت ما مالحت لذة منامي
واظن مثلي لا هرب ما يلامي = عرّض عدوك بالنكد صحصح البيد
من ذل سلم الى كتب له سلامه = كم واحد يثني خلاف الجهامه
ولا عليه من المذله ملامه = لا عاد ما له نوح مضهود ووحيد
هذا جرى بيني وبين ام حردوب = شيبا تحدرج لي على غير ماجوب
والكل منا يعطي الهرج مقلوب = ما انقص عن اللي صار كلمه ولا زيد
وصلوا على من وضحّ الحق طه = ماهل واهمل رايح من سماها
او ما يجر الراعبي من غناها = جاله على لدنات الاغصان تغريد