يالله ياللي عندك الرزق مكتوب = ياللي جعلت الرزق ما صكّ بابه
يا عالم النيات يا قاضي النوب = كل عطيته باب رزق شقى به
يا رازق جندٍ ضعيفٍ بلاهوب = وجندٍ عظيمٍ مشبعه قدّ نابه
ومن الغنم شي له اذناب وعصوب = واحرّ ما بالجوع جوع الذيابه
ومن الرجال اضعوف همات واسلوب = وكل على مسعاه رزقه هبابه
واحد مريح وفوقه الرزق مصبوب = واحد مشيح وكل رزقه نهابه
حزبك هو الغالب ولا هوب مغلوب = وانت الذي زبن الضعيف ان لجابه
يا مخرج من كربة الحزن يعقوب = وايوب عافيته على شدّ مابه
واللي ورا الصخره بهم ضنك وكروب = كل سمعت إلدعوته والطلابه
واعطيت نوح من احسن الفلك مركوب = وابنه تبرا منه والما غدابه
يا مجري الما من تراب بنبنوب = وكل من الدنيا عطيته حسابه
تفرج لقلب من هوى الزين متعوب = شعب العقيد اللي تواجف اركابه
قلبه رعاه الدوب والجسم مشعوب = جرح مخاون به من اول شبابه
ومن الولع يكفخ كما الطير مقضوب = والى طرى له طاري ما حكى به
بسباب طفل طحت انا منه مصيوب = ومزرّف بالقلب ما احد درى به
ترف القدم ملهوف والعنق مسلوب = تحفيه من تلّ الردايف ثيابه
والعين خرسا كنها عين يشبوب = سود هدبها ما عليها ضبابه
والخد برق بين ضبضاب ونصوب = ملابس ماه وطهاه وربابه
ومبيسم كن العسل فيه مذيوب = لولاني اخشى قلت يلقى الدوا به
ونهد كما الفنجال بالتبس مقلوب = ما فرّصه راع الهوى والتوى به
الا ولا بع غير ما قلت عذروب = الا اشقر كنّه ثعول السحابه
عسر مقامه ماه ماهوب مشروب = قلتة غدير ما تغيّر شرابه
جدّد بسيراته مواعيد عرقوب = وغديت له من عضّ غلث بنابه
والله لولا سالفة كل زاروب = اللي جزاهم للرفيق السبابه
اني لاطق الطار للناس مقلوب = واقول درب الود كل مشى به
راع الهوى قلبه عن العذل محجوب = والى نهيته عن طريق عدى به
مع ذا صبرت وراعي الصبر مثيوب = بالمتب راع الصبر يرجي ثوابه
وخلاف ذا يا راكب فوق مرعوب = حر الى انخاط الدجا ما يهابه
اسبق من اللي طالع النسر مجذوب = ما فوقه الا قربته مع زهابه
فوقه صبي يقطع الدو مندوب = قرم الى اوصل حامض العلم جابه
ملفاك من يبهش الى جاه ماجوب = عزّ الرفيق وحضرته بالطلابه
من روس قوم جاذبه كل مجذوب = ومهذب يفرز على ما تشابه
ماهوب خمع ولا بخيل ولاهوب = همّاز لمّاز ولا به طنابه
عبدالله بن اللي الى صرت مطلوب = حطّه على يمناك وامسك قضابه
قل له يابو تسعين حاسب ومحسوب = الحق عليه اثنين يكمل حسابه
سلّم عليه وقل نبي منك منجوب = وارفض الين انه يكمّل كتابه
ترا سراجه يصبح الصبح مشبوب = وسوالف تروى وفيها عجابه
وان سأل عني قل ترا العقل مسلوب = بان انسلابه يوم شيبه بدا به
كني على ما قيل ذيب بضاروب = شاف الطمع بالطعم والله رمى به
على الذي دونه نواطير وقضوب = كل يزهّب بندقه للحرابه
اول معرفتنا طرابات وعجوب = واتلاه جرح ما يداوى صوابه
غديت من فقده غدير ودغلوب = نشّ الغدير ولا بقى الا ترابه
ماهوب جافيني وانا منه منكوب = واحب ما حبّه محل وطا به
وافرح بشوفه فرحة الورع بالثوب = وهو يوريني سرور وطرابه
كنه سهيل الى ادبح النسر لغيوب = في ليلة ظلماه ما ينسرى به
ومنزّه ما به عذاريب وعيوب = ولا به من المنقود ما ينحكى به
هاذي تواصيفه وانا تقل منهوب = واسمه تعرفونه من اسم الربابه
ويش انت شايف يا ذرى كل مكروب = اللي الى ذّل الذليل ارتكا له
دوّر ترا للناس حاجات وذهوب = لا تذخر الجهده على كل جابه
تراه سنّد والخبر ليس مكذوب = عني وغيري غافل ما درا به
من فوق لا داج بالسوق مجلوب = حمرا قضبها بالصريمه قضابه
قلت الموادع قال منتب لنا صوب = وحنا لنا في كل دار قرابه
من كلمته كني على الخشم مضروب = ايّست من قربه وهذا جوابه
كني على ما قيل ما يسمع الطوب = والى انتبه ما جابت الورق جابه
واكمالته جرّة حليب الروب = اسمح ومثلك فاهم بالحرابه
صلاة ربي عد ما طار عيسوب = على الذي بلّغ عن الله كتابه
2007, 01:07 AM
يالله ياللي عندك الرزق مكتوب 
العرض العادي
المواضيع المتشابهه 
