رده على قصيدة رضا المشهوره

قال الذي ما يزمله شاهد الزور = والكامل الله واكبر الخلق مكبور
اهلا عدد ما طار طير بجنحان = وسار القلم يكتب الى نفخة الصور
او ما قرى القاري وما هلّ ودّان = واغلى من الياقوت واحسن من الحور
واخنّ وانوج من شمطري وريحان = واحلى من البارد على كبد ممرور
بكتاب نجّاب لفاني مسيان = امسيت به مسترّ واصبحت مسرور
خط الرفيق اللي لفا به زعيمان = امورّخ باول صفر عقب عاشور
يشكي من الفرقا مسافه وهجران = متذكر مع صاحبه وقت وعصور
عين الفتى تكفيه من غير ميزان = بالخص رمس ومارد الخمس مخطور
ساعة قريت الخط والعلم ما بان = دنيت له مصطورة بنت مصطور
الام حرّه واضربوها بظبيان = يمهر من النقره ليافا الى الطور
شيبا من الشيب الشلاهيب مقران = من كثر ما اقفت واقبلت تقل بابور
مرباعها بين الحنادر وببان = وما كفّته حزوى عن العرق بحدور
مقياظها بين النويّع وجمران = ولها ببو نبطه معازيب ونشور
لين استتم القيظ بدخول شعبان = وادنيتها واركبتها يمّة الهور
ومن الخميسيه الى هجر وعمان = تنشد عن اللي طرشهم غرس وقصور
ومطير واشباش العوازم وعجمان = ومن رملة المرّه لديرة بني ثور
والهاجري والخالدي وبن سفران = وحدود بن مرعي وردّت بخايور
وما كفّت الحره لدار بن رمان = وشمر وحرب وحدّرت لابن مشهور
واخلا عتيبه والشلاوا وقحطان = وكل الحجاز اخلاه من غير محذور
ومن الظفير الى الحدب وبن شعلان = والفت علي من الشقا تقل ظاطور
لا حصّلت راحه وهي ما قضت شان = والتيل طقّيناه ببرور وبحور
بغيت ربح وعوّد الربح خسران = وكلفتني وانت المكرّم عن الجور
وغديت عند الناس كني جليدان = لا فدت شي ولا اصبح القفر ماثور
واليوم طحت من الصلف تقل سكران = يالله عسى ما يفعل العبد ماجور
وتذكر لنا بين المحاني ومرّان = في عقلة الشباك والسعي مشكور
تارد على مدهالها مثل ما كان = مير اجنفت والعبد منهي ومامور
وانت الطبيب وخذ من الوقت ما زان = واقنع عن الواجد الى جاك ميسور
ترا غناة النفس تدعيك سلطان = ويغنيك عن ذيدان الاقراب همرور
وتراك منتب واريش العين بقران = يبعد وجرحه بالحشا تقل ناسور
والبيض مع من زان وقته وهو زان = ذكرت لك ذكر وهو قبل مذكور
لا ما حصل منهن موده وصفطان = غديت بين عيونهن تقل مجدور
والوقت غير الوقت والناس عدوان = حلوين الالسن والعمل غير مبرور
اما هل المعروف وارباب الاحسان = تلقى ذنانه مير بالكثر مقهور
وانا معك بالمال والفعل عوّان = الشاهد الله ما عن الخور مذخور
هذا وانا من حجة العام وجعان = مجروح من داخل ومن بر مجهور
وارسلت لي خط على غير ميدان = تطلب وعندك لي ملايين وكرور
والعلم هذا خابره يا كحيلان = من غاب غابت حجته وانت مافور
وصلوا على المختار من نسل عدنان = ما جنّ ليل وما اصبح له نور
والآل والاصحاب ما قلت شرهان = قال الذي ما يزمله شاهد الزور