مراسلات ابن ثعلي مع ابو ماجد

يا ولد عثمان من فضلك تراك بها الوصاة معروف = الموجب انه علي من اللزوم اللي كبر قندهار
ترا التعب في شروط الواجبات بكل شي مخلوف = أخاف تلهي او تختصر السلام الى وصلت اختصار
الى وصلتوا عنيزه فاظهر الدفتر وفل الكشوف = وانشر سلام عمومي للطوال وللزقرت القصار
واللي نشد عن خصه بالسلام وقل يعيش ويشوف = منازل له ابقلبي ما يبن غير المواجه عمار
لو انها تسمح الدنيا لبو ماجد ببعض الظروف = زرته ولا شك أنا بام القرى مانيب طلق الشكار
اوقل لابن ثعلي محمد كان هو ماهوب يلقى صفوف = يمد رجله المكه نشبعه قلطات ليل ونهار
يشوف وشلون تجديع الصفاح ولون ضرب السيوف = الموجب ان الملاعب للقوي وللضعيف اختبار

وهذا رد ابن ثعلي :-

يا مرحبا حي مكتوب سمعته قبل عيني تشوف = أوحيت ما به يغنى بالمجالس ويش هالخط صار
صار ان مالي كتاب الا مثل غيري يمر ويطوف = ولا فنا بوش مالي عند بداع المعاني وقار
لو ان عنده وقار لي جحد ما به لما انه يشوف = يقرى علي الكتاب أعطيه رده ثم يفشى الخبار
لا شك قيلك كسد يا مسندي لا واسفا واحسوف = ما وصلن الا عقب ما فاه بالديره علينا ودار
بغيت أخسره ولكن قلت أبا شرب مثل شرب العيوف = الموجب ان الكتاب اللي يجيني كشف كسر اعتبار
والله لولا المجابر وانت ما لزيتني للحلوف = اني فلا أرد لو انك تشب النار وسط الحضار
من حال شرهان ولا القيل مقط ما حسبناه صوف = لا شك شره عليك ان كان تـِترضين عطني غيار
عطني غيار امزرف لا يجيني كشف ما به ازروف = وان كان جا كشف لا تشره الى من مدفع الحرب ثار
اوعساك تسلم وتنجم يا رفيقي من كثير الصدوف = بانت لك الشاره اللي بيننا ترث عمار ودمار

رد ابو ماجد :-

حي الله على صوط ولهس عزز مقام الحروف = ارسل كتاب لبيب إبحال ولا حال يقدح شرار
مدري عدم ذوق ولا مشتهن يضرب علي الدفوف = قريت خطه وقمت اكفخ من الشرهه يمين ويسار
بغيت اجازيه لكن قلت ابا صلي صلاة الكسوف = الموجب ان القمر يكشف ولكنه بغير اختيار
ماهيب كبدي رهيفه تنزعج من كف ملح او سفوف = انشد عن الدار والقوة قبل تضرب عليها الحصار
ليت المفاهم يجي بيني وبينك في محل امحفوف = من حال افاهمك ولا حال ابا طير عليك الغبار
وان كان من هالسلام اللي يعم ولا يخص امحروف = عساه تلقح مطية هالمفاهم بيننا بالعشار
انا من العام ناجح يوم الاكبد معتريها الحفوف = طمعت بالخطة اللي طق فيها للحروبات طار
وانت المخير ترا باب العتاب من الصواب امعطوف = لياك تصبر على شن تكرهه ترا المطامع كثار
ما يتفق عند بيع ومشتري الا حاملين الشفوف = وان كان كذبتني فانشد عن الواقع اكبار التجار
واسلم وسلم ولا تركب على غوج ماهوب امعسوف = جرب اخيالك كان ان الطمع شالك على هالمغار

رد ابن ثعلي :-

البارحه يا جماعه كن قلبي من حشاي امخطوف = ودي بشوفة رفيق حال ما بيني وبينه ديار
لو كان ما لي مصاليح ولكن بس اباجلى الحسوف = ابي المفاهم يصير بحضرة الخصمين والمستشار
إما تجي له على ما يشتهي في كل طرق ينوف = والا على اللي حقرني صار بي قوه وزود اقتدار
ولاهوب حق يجي من بيننا هرج الهمج والحتوف = ماطيع انا في رفيقي لو تعرى صرت انا له اوزار
وان طاع بي هرج عبدالله فلاني منه اداري واخوف = آخذ بزنديوخصمي منته بالطين ولا الفقار
وان عزني عز نفسه منته مني بكفل الخروف = وان ذلني تاه رشده وافهم ان الخصم ساسه هيار
مانيب زهاف أثمن للعواقب مير خصمي زهوف = موراً بروحه يحسب انه ابن هندي معف المهار
كلٍ على قدر حاله يا رفيقي لا تصير امهفوف = يا شين والله فلا انتب مرهفن لا شك انا اراه عار
اراه عار المعاتب بيننا كان انت حبر عروف = خل الطمع والطمع من مثلكم جعله يعود خسار
كان انت غازي فلا والله تعود جيش ربعي نكوف = إما لي الطايله والا حصل لي منك رود انعثار
لو كان ماهوب ودي مير شوفك للعداوه تحوف = وانت المفوض وشاور ثم لك عقب المشار الخيار
والاحسن إنا نخلي هالكلام المشتبه في قذوف = اخاف تعني اغصون الاجنبي لاسمعهن بالخضار