وقال الوداع . .وحارت العين بالعين!!

قلت الوعد يا مشغل البال الاثنين=قال الثلاثا قلت مانيب طايق
طال انتظاري وأنت باكر وبعدين=كنك مع أيامي تزيد العقايق
قال ابتديت المشكلة . . ول! ياشين=وش بك نثرت الشوك وسط الحدايق
قلت العفو . . عندي رسالة بسطرين=كتبتها لك في جميل البطايق
أبيك تقراها وبالذات حرفين=فيهن مشاعر صدق. . فيهن حقايق
قال الحكي واجد ومثلك كثيرين=قالوا . . وقالوا . . والنهاية بوايق
قلت انتظر ماني من الناس الاقصين=بيني وبينك يشهد الله وثايق
من يوم كنا باول الوقت طفلين=تمضي بنا الساعات مثل الدقايق
بسويقنا الضيق . . وببيوتنا الطين=نلعب . . لنا باللعب فن وطرايق
يحفنا نور السعادة بريين=كل له الثاني مناسب ولايق
قال الزمان اللي ذكرته غدا وين=أقفى بحلوه ما بقى له لحايق
صرنا كبار . . وعن بعضنا بعيدين=وظروفنا ما بين طارد . . وعايق
قلت الوفا واجب على شايل الدين=ما هقوتي يبقى للاعذار سايق
حنا غدينا يا هوى البال حرين=وطيورنا باوسع فضاهن طلايق
ودي بلم الشمل باغفاية البين=دامي شفوق لك بعد . . وأنت شايق
قال استمعني يا نظيف المضامين=الحال واحد . . والمشاعر حرايق
واجد بهالدنيا قلوب ومحبين=واحوال مختلفة . . ونايم . .وفايق
وأنا أبيك أمس(ن) وباكر وهالحين=والبال مع طرياك هايم ورايق
والقلب شرع لك من الحب بابين=لو هو على غيرك من الناس ضايق
بس انتبه ما يقبل البيت شطرين=وطروقهن متخالفات النسايق
يا صاحبي لا تدعي النار نارين=ارفق ترى مثلي ومثلك خلايق
وقال الوداع . . وحارت العين بالعين!=كل بنا من علقم الياس ذايق