بين المحرق والمنامة

يقول الخال يوم إنه تمنّى=وهو بين المحرق والمنامه
بجسر والبحر منّا ومنّا=ألا ياالله طالبك السلامه
شقي القلب مثلي ما تهنا=بحلو النوم سهرٍ في منامه
قصور الهم في قلبي تبنّى=ولوّعني زماني بالندامه
ألا ياويل من مثلي معنّى=يطوّح ونته مثل الحمامه
بلا مصلوح أغني يوم غنى=طرقني ما طرق ولد النعامه
على غروٍ عجوبيٍّ فتنّا=يجر القلب من زايد غرامه
وزين الروح بصدوده محنّا=ولا له حق يوفين ابتسامه
تعداني بليعاته مثنّى=هزيلٍ ما يشيلنّه عظامه
بدرب البيض إلى راحن وجنّا=وفيهن شارةٍ من ريم رامه
إلى جت بينهن ما يجفلنّا=وهي من بينهن فيها علامه
طويلة عنق بالممشى توَنّا=تباهى رافعٍ ربي مقامه
هواها قتل مفتونٍ تغنّى=بزينات اللحون أظهر كلامه
وبيّح ما بقلبه مستكنّا=ولا فيها على مثلي ملامه
يذكّرن الليال اللي مضنّا=وزوّد ما بقلبي من هيامه
سقى الله دار أهل مدري* وحنّا=سحاب بارقه يجلي ظلامه
على شان القلوب يربّعنّا=وكلٍّ بالهوى يلحق مرامه