قالوا بكيت وقلت ضيق وحماقه

قالوا بكيت وقلت ضيق وحماقه = ابكي وانادي بالبكا من غدالي
ابكي شره وابكي محبه وفاقه = وابكي هلع وابكي ولع من هبالي
ابكي وخوذوا من نظيري غلاقه = ماهوب ودي بس طاري طرالي
ابكي وانا للدمع ما بي لياقه = مليت منديلي وثوبي وشالي
ابكي على حي ٍ صعيب ٍ فراقه = الاول التالي شريدة عيالي
ماجد ترا امك ما خذيته عشاقه = اخذتها من شان تربة خوالي
ابيك تعرف بالوفا والطلاقه = تاقف اقبال امك وتاقف اقبالي
ماجد تراك أدعيت قلبي إحراقه= وانا احسبنك بالوفا راس مالي
خدعتني وانا لحمتي رقاقه = ليتك كبير انساك لو انت غالي
تركتني في هالظروف الدقاقه = ما كن لك في مهبط الوحي والي
ما يمكن ارضى انك تقص العلاقه = قدام يظهر من شعرك الموالي
اخشى على عقلك بسن الرهاقه = توك بسن ٍ ما ينفه حبالي
حاربتني من شان عشق السواقه = يالله عسى حظك بها مثل مالي
خف من جليل الملك يا هاشفاقه = يكفين منك اني بمكه لحالي
ارسلت لك خط ٍ والاخر الحاقه = والثالث اللي جاك بالزرف خالي
ابيك تزعل كان عندك حذاقه = تكتب بدال الزرف خط ٍ هلالي
خط ٍ يجيني منك كبر البطاقه = يسوى جميع اللي معي من حلالي
ما جاك مني شي يضر الصداقه = أسألك عن حالك وأبلغك حالي
هذا وانا يا بوك ما نيب عاقه = الحمد للمولى طوال ٍ إحبالي
لا شك ما ودي تتم انفهاقه = ما اظن تلقى والد ٍ لك بدالي
درع ٍ حصين موثقاتٍ احلاقه = ياقف بصفك عند طامن وعالي
إن طعت شوري خل عندك لباقه = لأمك تراها من بنات الرجالي
وأعرف ترا حقك بمتنك وساقه = ولا ينطح الثقلات غير الجمالي
اكتب ردود الخط وابرق ابراقه = ترا الورق والحبر ماهوب غالي