ألفٍ : أولف من عجايب زماني = قافٍ يشوق مصرفين المعاني
ما دام لي شفٍ مثل بعيد وداني = ما جاء علي بالي نطق به لساني
البا : بديت القيل وأبديت ما أخفيت = أسباب مما شفت بالعين وأرّيت
يا ليتني مع سوق مستور ما جيت = رديت مقفي ما تعدى مكاني
التا : ترا ما جا على العبد مقسوم = خير وشره بين حجّاه مرسوم
لا شك ذا معطى وهاذاك محروم = وانا من التوفيق حظي رماني
الثا : ثبت عندي ولا به روايه = إن الهوى والحب سبّة عموايه
لا واعناي من الهوى واعنايه = بالصاحب اللي قل شوفه براني
الجا : جحدت الحب والحب غربال = جرحه غميقٍ وجارح الحب سلال
والناس ما يدرون وش علة الحال = وانا جروحي من صخيف المثاني
الحا : حرمني لذة النوم فرقاه = الصاحب اللي حملن حملٍ ما أقواه
يا ليت كلٍ ساكرٍ ماه بلزاه = ولا عنيت لصاحبٍ ما عناني
الخا : خفيف الدم قصده يجازين = عمّا مضى من عشرته يوم هو زين
واليوم يوم العين قرنت على العين = جازان بالسيّات عقب الحساني
الدا : دريت بغايته وش مرامه = عرفت مقصوده بلهجة كلامه
يبين أجر النوح مثل الحمامه = وأجاوب الورقا بجر الغواني
الذال : ذابحني بهمّه وكيده = همّه كبير وكل يومٍ يزيده
اللي طعونه بالضماير جديده = له مخطرٍ بالكبد حرّه كواني
الرا : ربيع القلب ذكره وشوفه = حتى أيش لو طالٍ من أجله كلوفه
أبا أتصبّر كودي أجلي الحسوفه = وأبرد غليلي من غصين اللياني
الزا :.... زريف الطول .... = لا بالقصير ولا دقاقٍ طويله
لا واعذابي من طويل الجديله = جدّد كوايا بالضلوع اىلمحاني
السا : سهوم الحب ما هي خقيّه = دايم صويب الحب عينه شقيّه
لو قلت ما به علته باطنيه = كنه عضيض الغلث والحيل واني
الشين : شوفي له عذابٍ بلا خير = حيّر قدم رجلي عن السير لاسير
والكبد عسكر به ثلاثة مسامير = ولا احدٍ يقول أخطيت يا مودماني
الصا : صواب الحب خطرٍ على الروح = جرحه جرح روحي وأنا قبل مجروح
يا قاتل المغرم ترا ما انت مسموح = تركض على ذبحي عيانٍ بياني
الضاد : ضدي ما يسوي سواياك = يرمي على همش الخبر بس منّاك
وإلا أنت جارحني بحبك وبلواك = ليت الولي في عشرتك ما بلاني
الطا : طويت الياس من شفت خلي = لا هوب جافيني ولا صافيٍ لي
وأنا اعتذرت من الدلع والتغلّي = يكفين من طرد الهوى ما وطاني
الظا : ظروف الوقت ترمي باهلها = طاوعت عينٍ مغرمه في عملها
ايام روحي داويه في جهلها = واليوم عنّيت الفرس بالعناني
العا : عذلت النفس من عشرة الناس = ما شفت من طرد المقفين نوماس
من لا يسيّس قصر حبه على ساس = لا بد ما ياقع رفيع المباني
الغين : غبت وغاب عني خياله = ما عاد يطري لي غلاه ودلاله
كلٍ يبي يمشي على شف باله = لا صار ما شانه يوافق لشاني
الفا : فضحني بالتردد ولا فاد = همي عليه الرجل سرداد مرداد
من عند بابه مير حتى ايش وش عاد = لا صار مالي من نمى البردقاني
القاف : قلت من التردد بلا فود = عيبٍ ومما يلحق الرجل منقود
واللي يعرف النقص ويثمن الزود = يصبر على حد القسا واللياني
الكا : كفاني ما فجاني وعنّان = من عشرة اللي عقب عرفه تناسان
خان الزمان وبدّل الود هجران = والعلم لو إن تجهله ما خفاني
اللام : لومي عقب ما أقفيت منّه = كاني على فرقاه جريت ونّه
يا لعن ابو قلبٍ الى اقفى يحنّه = لا من بني عمي ولا من عواني
الميم : مالي عقب شفت الممله = ارضى لنفسي بالعنا والمذله
لانصكّ بابٍ يفتح الله محله = لا أقفى شهر شعبان هلّ إرمضاني
النون : نامت وأسفهلت عيوني = طويت ياسي واستراحت أشطوني
ما قول واعزاه لا واغبوني = حقٍ علي أجفى وليفٍ جفاني
الوا : وسيع العرف ينكس الى شاف = صد وجفا ومظاهرة غير مجناف
يا قلبي اللي من عنا الوقت ينلاف = أصفح الى شفت الدهر قلّباني
الها : هني اللي مريحٍ ومبسوط = ولا عذاب الحب شوطٍ باثر شوط
دام الهوى يا هل الموده هوى نوط = ما ظنتي عشرة تشد الثماني
اليا : يعين الله على العدل والميل = عبدٍ عذر وأعذر من القول والقيل
يا رب حسن الخاتمه والتساهيل = وإنك على درب الصلاح تهداني
تمت وصلوا عد مختلف الازهار = على النبي الهاشمي سيد الابرار
وآله وصحبه عد ما هبّ وإندار = نسم الهوا شرق وشمال ويماني
2007, 07:00 PM
ألفية المغيولي 
العرض العادي
المواضيع المتشابهه 
