قوموا عساكم ما تقومون دايم ( من روائعه)

قوموا عساكم ما تقومون دايم = ياللي لبستوا فاخرات الهضايم
قوموا عساكم ما تقومون بالرجا = ولا بالرجا منكم وفيكم غنايم
قوموا عساكم ما تقومون والسبب = الى صار ما ترجون عز وحشايم
تراالنوم نوم الذل والعجز والكسل = وانتم من اللي يصنعون العزايم
ترا النوم نوم الخبل والبزر والمره = والحر لو سلهم فلاهوب نايم
ترا النوم نوم الحظ وانتم احظوظكم = حشى يلحقه منا ومنكم تهايم
ترا الذل ذل النفس والعز عزها = وانتم من افخر لابسين العمايم
ترا المرجلة منكم وفيكم ومثلكم = والا البهايم روس ماله بهايم
ترا الوقت وقت الجد بالعلم والعمل = ماهوب وقت النقنقة والنمايم
وانتم تقل ما كن شي يهمكم = متفاوتين وموقع الربح هايم
وجدي على حي قضى الله نحبهم = يا ليت عنهم من يفك الحزايم
يشوفون وش صرنا او وش صار دربنا = اتلى القصيم وقبل روس وسنايم
امذيلين بالصحافة وغيرها = بالاسم والا الجسم ما هو ملايم
ترا الراس ما يرضا يوازن بالظهر = ولا الظهر يرضا يوازن قوايم
وانتم تخلفتوا وناخت اركابكم = والقافلة راحت حثيث همايم
صدر في جميع المدن صحف منوعه = عناوينها تعلن عليها الوسايم
الا صحيفتكم زما الهون دونها = ما كن للديره ارسوم وعلايم
أهعظايميب بالشبان وانخى اشيوخهم = اللي مزاياهم مزاي جسايم
يقومون بالواجب على ذي ومثلها = ولا خير باللي عن مباديه شايم
متى تصدر الفيحا تأيد مليكها = تنشر على صفحاتها له عظايم
متى تصدر الفيحا يعلق بها الامل = صحى الجو والا الجو ملبس وغايم
متى تصدر الفيحا وتثبت وجودها = تصير مثل سهيل بين النعايم
متى تصدر الفيحا يرفرف بها العلم = يطير من سامي سماها حمايم
متى تصدر الفيحا تداعي بحقها = تمد يمناً ما عليها لوايم
متى تصدر الفيحا تناصر خواتها = في كل درب يستحق الدعايم
متى تصدر الفيحا تفاخر بروحها = مع الشرق دون اهل الطغى والجرايم
متى تصدر الفيحا تفوز بشبابها = شباب له التوفيق والنصر دايم
كان انكم متقاعسين فانا لها = على صدري انشرها بعزم ولزايم
وتوج على راسي قرار امتيازها = افخر وسام من افحول الوسايم
وانا زارب فيكم وفيما يهمكم = بالرمز لا بالفلسفه والشتايم
وانا شاعر منكم وفيكم ولاجلكم = افخر بكم ماشي وقاعد وقايم
هذي تماثيلي وهذي ارسالتي = على النصر لا لا تقبلون الهزايم
واختامها بازكى صلاة على النبي = عدد ما فطر المفطروما صام صايم
والآل والاصحاب ما قلت باوله = قوموا عساكم ما تقومون دايم