الف ولفت العشق باول شبابي = وجروح قلبي والهوى قد مضى بي
من جور مابي ما اتحمل ثيابي = بيح بسدي واحدٍ ما اقدر اسميه
البا بلاني يوم اولف كلامي = باسباب حبه بالياتٍ عظامي
مع كل طيرٍ صرت اودع سلامي = لاشك ما رده ولا قال قاريه
التا تراني طول ليلي بحاله = وما والله اذكر غاب عني خياله
يا ناس انا والله ما ارضى بداله = يا شيب عيني من حفاه وتغليه
الثا ثبت بالقلب يا ناس حبه = ازريت ادور يا هل العرف طبه
حسبي على اللي صار للهجر سبه = لو طالت الايام مانيب ناسيه
الجيم جار الوقت يا سيد الاحباب = الناس مرتاحه وانا منك منصاب
مير ارجي اللي من ترجاه ما خاب = يصخرك لي والسر ما ودي ابديه
الحا حبيبي باعني في زماني = بارخص ثمن يوم ان حظي رماني
يا اهل الوفا ما يتعب المودماني = يا كود شيٍ للشقاوة يعنّيه
الخا خذيت العقل مني وقفيت = ادعيتني لا نيب حي ولا ميت
اطلب من الله كل ما الفرض صليت = يلم شملٍ فرّق البعد غاليه
الدال دامي يا جماعه لحالي = فانا خطير من المرض والهبالي
بين الرجا والياس يا هملالي = يصبح على الصبح والليل ممسيه
الذال ذاب الحال بفراق سيدي = قالوا لي اصبر والصبر ما يفيدي
متى نشوفك يالغزال الفريدي = ونعيد وقتٍ فات ما احلى لياليه
الرا رجيت الله يحقق مرادي = مع لذة الدنيا مظنة فوادي
انا بوادي والخلايق بوادي = يفز قلبي كل ما حل طاريه
الزا زريف الطول زين التواصيف = ياما خذا قلبي بحلو السواليف
بيني وبينه يا عرب يطرب الكيف = ليته يجي واللي وعد فيه يوفيه
السين سم الحال في رمش عينه = ياما حلى يا ناس طلعة جبينه
ايضا ومع هذا معه خف طينه = انا اشهد ان الله بالزين كاسيه
الشين شوري يا جماعة عليكم = درب الهوى خلوه لا يبتليكم
واللي حصل لي واعسى ما يجيكم = كم ليلةٍ دمعي على الوجه غاشيه
الصاد صدوا لا لقيتوا مزايين = نراهم اخطر من لهيب السكاكين
مسكين راعي الحب يا ناس مسكين = يروح عمره ما تحقق مناويه
الضاد ضاع العمر والفكر مشغول = قالوا لي انسه قلت ماهوب معقول
الموجب انه ما بعد شيف له زول = مصيون ما كلٍ يحلي حراويه
الطا طعامي يا عرب والمناما = ما طاب لي سبة ظبي العداما
ان ما لحقتوني يزيد الهياما = يا من يجيب العلم يا من يوديه
الظا ظنيني صد عني وخلان = هرجة قفا لفلان وفلان وفلان
يابو عيونٍ كنها عيون غزلان = ارحم عليل ما لقا من يداويه
العين عفت النوم مما حصل لي = يا روح روحي يا بعد كل من لي
سلّيت حالي يا اتلع الجيد سلي = جسمي نحلم ما باقي الا تواليه
الغين غروٍ زاهي العود ما احلاه = انا اشهد انه منوة اللي تمناه
وحياة رب صوره لين سواه = انه خشير العقل ماحدٍ يوازيه
الفا فراقه من عظيم البلاوي = الموت عندي والحياة متساوي
لو اتمنى ما تفيد المناوي = ما زل يوم الا تجدد مكاويه
القا قوامه كنه الخيزرانه = من شاف زوله ما تعدا مكانه
انا اشهد انه من عجايب زمانه = ابيع انا غيره من الناس واشريه
الكاف كلٍ لامني في عشيري = قلت اسكتوا كل بحاله بصيري
هذا هوى قلبي وهذا مصيري = من بد كل الناس يا ناس ناقيه
اللام ليت صويحبي يلتفت لي = يقطعك دنيا عمرها ما صفت لي
نوى حبيب الروح بالصد قتلي = من حبني له لا زعل لازم ارضيه
الميم ما كلٍ يداوي جروحي = الا انت يا خلي كثير المزوحي
يابو جديلٍ فوق متنك يلوحي = بالمسك والعنبر على الطول غاذيه
النون نومي يا جماعه تخافيق = حملتني يا صاحبي فوق ما اطيق
ارحم رحمك الله رب المخاليق = ماهوب حق اللي شقا فيك تصخيه
الها همومي في هواي اشغلتني = شيـّب بي الهوجاس من قبل حتني
وام الهوايل بالهوى ولعتني = من شانها ناديت لبيه لبيه
الواو وصـّفته ولا اوفيت الاوصاف = وبينت عن شوقي لمياس الاعطاف
ما له شبيه بالمدينه والارياف = الله يزيده ولشبابه يخليه
اليا يعين الله على ذا الحياتي = ما اظن فيه احد يسوي سواتي
واللي كتب ربي على العبد ياتي = وحنا بدبرة خالق الكون بيديه
وختامها صلوا عدد وبل الامطار = على محمد صفوة الخلق الابرار
شفيعنا يوم الحشر واف الاذكار = آمين ياللي يابس العشب تحييه
2007, 12:44 AM
الفية ابو محمد 
العرض العادي
المواضيع المتشابهه 
