عطنـي سبوقـي

متى يقول الطيـر عطنـي سبوقـي=واعطيه اناالمطلوب مـن دون منـّه
ويقفـي وكنـه مقفـي بمعلـوقـي=ومحـذا عيونـي بالسمـاء يرقبنـه
بارضٍ ثراها مـا وطـاه مخلوقـي=بـس الحبـاري بالأثـر زخرفـنـه
ويبقى على السـواق دور اللحوقـي=ونطـرد نخـاف أبصارنـا يفقدنـه
حرٍّ علـى غيـره بفعلـه يفوقـي=وصفه شياهين البحـر مـا حونّـه
تشيب من وصفه جميـع الطروقـي=وينهي قـواف القـول مـا وصفّنـه
الله جعـل فيـه المزايـا طبـوقـي=جمـّل تقاطيعـه وهــن جمّلـنـه
من حد مخلابه الى الـراس فوقـي=ما فيه ما ينقـال ليـت ولـو انـه
اشقر صفي اللون مـا بـه دقوقـي=صدره عريض وراقي الـراس عنـه
ومناخره والعيـن ماهيـب ضوقـي=وبـوزٍ لطفقـات الحبـاري يسنّـه
متبكـر القرنـاس قـول وثـوقـي=تـوه بكـار ومـا تخمنـت سـنـه
هـادي ركـود وللمفاقـع لحوقـي=واقشر ملاويع السمك مـا افختنـه
ودايم وطلعـه ياكـد انـه حقوقـي=ما مـرةٍ راعيـه بـه خـاب ظنـه
وطلعه على اللي ريشهن به بروقـي=لا أقبـل عليهـن كوبـرن وكشفنـه
وصارن سوات الشمس عند الشروقي=منظر جمـال الطيـر هـن كملنـه
واحدث بهن من قـوّ ضربـه فتوقـي=وطارن يبـن خبـتٍ لهـن يزبننـه
واردم ورا اللـي منتويهـا بعوقـي=وعلـم المنيـه بالمخالـب يكـنـه
وتهايفت تبـي الوعـر والشقوقـي=وحوّل بهـا قبـل الوعـر ياصلـنـه
لحظه بهـا بـال المولـع يروقـي=ينسـى همـوم بالضميـر اتعبـنـه
الطير ناجـح والمخـاوي صدوقـي=قطْع الصحاري البيـد مـا يزملنـه
رجل اديب وله مع العـرف سوقـي=وامـور مـا تعنيـه مـا يشغلنـه