ياهجوسـي والقوافـي توهـن اشبابـي . . اضربي عمق المحيـط وعـوّدي شاطيـه

النسيـم اللـي تحـرك وانفتح لـه بابـي=حرك سكون القصيد وطاب طرقـه ليـه
هزغصن القاف واشغل بالطرب دولابـي=ومابقى بالقلب غصن ما طـرب شاديـه
حاجه بالجاش هاجت واستحثـت مابـي=وابتدا نضح المعانـي دون سابـق نيـه
وياهجوسـي عاونينـي مبتـدا هندابـي=تـل سبقـك ياخيـال وعانـق القافيـه
وهات عن خافي خفوق عاش عمره غابي=مانكشف مابه ولابه مـن قنـص واديـه
ومن يحاول كشف سره جل جهده خابـي=تاه بافجوج الغموض وصيهـد السريـه
ياهجوسي عاونينـي زاد حمـل اتعابـي=لا متى والصمت بيـده مهجتـي ملويـه
لا متى والصبر حملي والرجا مشعابـي=والدروب لمثـل حالـي مابهـا ماويـه
ياهجوسي عاونيني شاب راسـي شابـي=لامتى وانـا انتظرهـا لحظـة العانيـه
عاونيني قبل ماأنـزل واخلـي المرقابـي=وان نزلت اموت يمكن قبل اجـي عاليـه
ان نزلت وغبت ترقا سربـة الأجنابـي=واول كسور الصحابـه نزلـت الراميـه
ومن تهاون في حقوقه ما هقـاه يثابـي=مالقاه من التهـاون غيـر حمـو الكيـه
وين الوذ بكل حجمي عن وجيه اصحابي=وعن ملام اللـي يلـوم بدافـع الغاريـه
ويش عذري لا سألوني كيف هـان النابـي=كيف اخلي راس رجمي وانزل الواطيـه
مرقبي وان ضقت يوم وذاق مرّ عتابـي=مانسيت سنين عمرٍ كنـت انـا خاويـه
وما اعتليته بالوساطه أو حباة محابـي=دافعٍ بـه سهـر ليـل وعمـر ذا تاليـه
ومرخصٍ له دم جوفي واحتراق اعصابـي=وناقلٍ له همّ يصْـلى ضامـري صاليـه
ومحتميه بسيف عمرو وهيبـة الخطابـي=ومقعدي له سرج غيدا ما تهـاب الهيـه
وان حصل دونه كسيره ما احتملت حصابي=ما احتملت كسور باسـي وانكسـار ايديـه
كيف أنا باقوى المواجه عقب كسر حرابي=ما على مثلـي مـلام ان هـام بالداويـه
وياهجوسـي والقوافـي توهـن اشبابـي=اضربي عمق المحيـط وعـوّدي شاطيـه
واشعلي نار القريحة فـي حـدود آدابـي=ما عقـب ذا الليـل ليـل ينجـم ساريـه
ويانديمي قوم دون مـا خطـر بكتابـي=والحق الموضوع علمٍ مستكـنّ اهنيـه
لو بغيت اخفيه ما اقوى واهجه يصلى بـي=محرقٍ معلـوق جوفٍ طايلـه لاظيـه
وما نويت ابديه لينه ضرنـي واسوى بـي=قلت ابوحه واستريح ولـو لحقنـي سيـه
ويانديمـي اكتبـه بالله وانـت ادرابـي=وانت عارف كل شاره بالهـوا مرميـه
وانت خابر كل ما رمي وين هو مضرابي=يا تجـي بالـراس والا بندقـي مثنـيـه
واكتب الله لا يبيحه ويش هـو سوابـي=الغرام اللي سجنـي فـي فضـا الحريـه
أول إليا غبت غبت ولو يطـول غيابـي=ما يجي ذكر الرجـوع ولا نبـي طاريـه
لين جا كفـي بكـف الجـادل الجذابـي=قمت أدوّر للرجوع أسبـاب لـو وهميـه
وان هطل هتان ذكره فاح طيـب ترابـي=وانتشر بفياض جوفـي شـاذي الحنيـه
واستجبت لداعيٍ بيـن الضلـوع ينابـي=وجيت مثل الطير طوع ان لاح له داعيـه
أو مجي اللـي جـواده بالمعـاره كابـي=ومقتفيه اللي معيـي عـن قبـول الديـه
استحث اركـاب شوقـي للقـا بأحبابـي=وما شغفني غير لين وشوفة البدريـه
لواصد شوي عنهـم لـب قلبـي ذابـي=والله انـي ما أتحمـل غيبتـي عصريـه
ومن يقول ان الغرام يموت قلـه هابـي!=مـا يمـوت الا غرامٍ ميـت راعيـه
او غرامٍ صاحبـه للمصلحـه حبابـي=لا خذا المطلـوب قفـا وانحـف ساقيـه
ولا سقا الله هب ريح هز غصن اسبابـي=انعسر غرياف قلبـي وانبحـث خافيـه
وان كشف سري وعدا عن حدود اقرابـي=وكل مخلوقٍ دري بالحاجـة المخفيـه
عقب ماني كنت اخفي ما معـي باثيابـي=قام يدري عن كنينـي قاصـي الطرقيـه