يقولون الطويل إن كان عديته يهيض الجاش=وأنا ذالي ثمان شهور أجي ولا هاض جاشي
نصيته بالنهار وليل وجيته حزة المغباش=ولا قدر متاهاة الطريق وطول مغباشي
ولا ادري هو صحيح العلم ولا قالها غشاش=رماها كلمة منها حفت رجلي وأنا ماشي
أجي عاني أدور فيه راحة راسي المنداش=وبالمخلاص من ذيب يسمى الهم نهاشي
نهش لب الخفوق وحط له بين الضلوع فراش=وعلى غالي قطيع آمال روح الروح مهتاشي
معي ذاله زمن ينهش بجوفي لين مابقاش=تهاوت له معاليق خوت يبّاس وعطاشي
ولا زمني مثل ما لازم الملقاط للمنقاش=وأنا وشلون أبلقى لي طريق عنه وانحاشي
إلي مني بغيت اسج عنه شوي هاج وشاش=تعدى بي حدود ماهقيت ْتطال وتناشي
ولا من هاج ما كنه سوى موج بعرض الطاش=تلاطم بالضلوع اللي غدت باسبابه هشاشي
ونزلت من الطويل وما معي ماينقش النقاش=ولا ني معتليه إن دمت أحوّل منه ببلاشي
أبي لا جيت أهيض به عن اللي في ضميري جاش=عساي أرتاح من مابي ويلقى قلبي إنعاشي
وتطيب جروح قلب ما يضمدها الطبيب بشاش=دواها مرقبي والليل ونوض البرق بالباشي
إلي من جابها الغربي وجا للبرق فيه رهاش=ترزم له خفوق من عنى ما فيه من خاشي
وجذبت من أعمق عدود المعاني دلو للعطاش=نهل منها الحكيم وفات مظمنه على اللاشي
وقطفت أزكي ثمر لفظ يقوت ناوي المطراش=ويشيله راس مال انفك درج العرف لنقاشي
وحوّش له طرايد شرد بالضعف ماتنحاش=أمد لها عصى موسى وتاتي لي وتنحاشي
ولا منه سمعه المرمس اللي مبطي ماناش=مسامعه القصيد يصير فيه إرهاش ورعاشي
وأنا يوم أقطع من الحيد وانظم ما قطعت إبلاش=دفعت إله الثمن عمري وأخذ حلي ومطراشي
وأخذ حق السنين اللي بقت لي من حياتي كاش=ولا خلى لي إلا نار باقصى الجاش تهتاشي
يسامرها مهب الريح لا جاء من نحا البلاش=نحايا صاحب لي غاب واشعل واهج إبلاشي
على غير العوايد غاب واشعل خافق من خاش=أخاف أنه سمع بي قول من قالوا له الواشي
وأخاف يطول الغيبة ووجداني عليه نشاش= وتدمي غيبته بي جرح من يومين متلاشي
وأنا عظام الصبر فيني عقب بعده غدن هشاش = لو إني قلت أبصبر يوم ذبت وطحت منداشي
يذكرني سواد الليل مجدوله وزود وحاش = وشروق الشمس يطري لي محيا هش بشاشي
ولا مني ذكرت العين وجيش رموشه العكاش = شهدت وكل مافيني على أن العشق بطاشي
بطش بي لين ما خلى لغيره بالضمير عراش = رعى جوفي غلاه وشد وتقل مابي سوّاشي
والي من جاب هب الريح لي ريحه يجين خراش = تطلّق عقل وجداني ويطرق راسي اخراشي
وأجي لك بالطويل إن كان بك راحة وفيك نعاش = أمانه لا تخليني وأحوّل منك ببلاشي
2007, 10:30 AM
بطش بي لين ما خلى لغيره بالضمير عراش 
العرض العادي
