يا طيب حالي لا توجهت للشام

يا طيب حالي لا توجهت للشام=أوجس عظامي عن وهنها نشيطه
وإلا فأنا طول الليالي والأيام=ذاوي وثاوي مثل ما قيل زيطه
الله يعين اللي من الشوق منضام=ضاقت عليه من الهموم البسيطه
ما غير سجات التمني والأحلام=هذا الجدا مثل البحور الغويطه
وين أنت يالغادي على سوق الأوهام=بعت الغلا من دون قيد وشريطه
مشكور ذا رد الجميله والإكرام=تجرح وأنا اللي ما بجرحي غبيطه
أحسبك مثلي صادق الود مريام=واللي يحيطك بالموده تحيطه
عندك خبر يا ما لك احفيت الأقدام=كنّ القدم يمّك تجرّه بخيطه
تامر وأطيعك وأحتمل تقل خدّام=ذي حال روحٍ بالمودة وريطه
وأثرك معي ما غير بأطراف الإبهام=مهفي ومقفي والنويّه خليطه
ما صرت لا شاري ولا صرت سوّام=لو هي عليّ الكايدة والبسيطه
خَلّك لما تقصاك الأيام قدام=غصبٍ عليك اللي فريته تخيطه
ما طاب لك من زاهي الوقت مادام=الزود ينقص والليالي شطيطه
زامك يروح ويمّ غيرك يجي زام=ما هيب هبّات السعد لك ربيطه