رد علي مرثية الشاعر عبد الرحمنالهقاص لوالدي

الشِّعر نَشَّـتْ بالشِّفايـا حْرُوفِـه=الشِّعر صَابِـه سَكْتِـةٍ بالفُـوَادي
الشِّعر يَرْثِى حالتِه مـن يِحُوفِـه=يِقول وِيِنـك يالزِّعيـمَ الرِّيـادي
اليوم حالِـه تِسْتِحِـقَّ المْرُوفِـه=حادِيه عن مَلْعَب نَواديـه حـادي
مِثْلَ الشَّلَل صَابه وبَعْثَر كْشُوفِـه=النَّاس في وادي وهَمِّـه بْـوَادي
مَحافِـلَ الشِّعَّـار تِقْـلِ امْعَيُوفِـه=عِقْبه عنيزه غارِقِـه بالسَّـوادي
علـمٍ فِجَانـي كَدَّرَتْنِـي ظْرُوفِـه=بَعْدَ الزَّعامِه والفَـرح بالنَّـوادي
علم ولا بالحلـم تِذْهِـل وْصُوِفـه=ياشِينِ الى جَتْكَ المصِيبه تْنَـادي
بينَ المْصَـدِّق والمْكَـذِّب ألُوفِـه=بِدِيتَ اجَاهِد فيه نفسـي جْهَـادي
أحِسّ من كَبْدِي بْرِيقـي نِشُوفِـه=حتى تَرَاجَع لي صوابـي وعـادي
قالوا رَحَل من جَنِّةَ الشِّعر شُوِفـه=ابوحَمد عبدالعزيـز ابـن بـادي
في حادِثٍ تَفْجَع نَوايِـب صْدُوفِـه=وِمْسَاعَدَ الغِـزِّي حكيـمٍ سيـادي
ابوحَمد مالِه عن الحَـقّ شُُوفِـه=للدِّين فيِ كلَّ الظُّـروفِ انْقِيـادي
مِكَانِتِه عنـد الجِميـع امْعَرُوفِـه=شاعِر عنيـزه ثابِـتَ الإعْتِقـادي
مِثْلِه تْطَاوِلْنـا عليـهَ الحْسُوفـه=هو في صِمِيمَ المِجْتِمَع غِير عادي
أيَّـام شِـدَّاتَ الزِّمـانِ امْخَلوفِـه=عنده لْفَنَّ الشِّعـر عَقْـلٍ حِيـادي
الى بِدا القَلْطِه وقامَـت صْفُوفِـه=تَلْقَى عنيـزه بالمشاعِـر تْـرَادي
مرحوم يامن عِزِّنـا فـي وُقُوفِـه=في ليلةٍ بالشِّعـر فيهـا عْنَـادي
مرحوم ياشيـخٍ تِعِـزِّه ضْيُوفِـه=الى قِصَـر عنهـم رِدِيَّ المِبـادي
في جَنِّةٍ مـادُون شُوفَـه كِلُوفِـه=من رَحْمِةَ المُولَى مَعَ اهْلَ الرَّشَادي
صَلُّوا عَدَد من سَبَّـحَ الله بْخُوفِـه=على نِبٍّـي لامِّـةَ الخيـر هَـادي

وهذا ردي علي الشاعر عبد الرحمن الهقاص.. ابو زياد ..


صح لسانك ولا هنت .. ياشاعرنا وأديبنا واستاذنا

والوفاء ما يصدر الا من وفي

حي الجواب وحي نفسٍ عروفـه=وحي البيوت اللي بناها الستادي
وحي الوفاء اللي واجبه ما يطوفه=ما يسهج الماجوب غير الربـادي
وحي الثقافـه والأدب والأنوفـه=وحي الشداد وحي راع الشـدادي
حيه عدد وبـلٍ تسـاوق قنوفـه=متداخلٍ لونه بيـاض وسـوادي
ترحـبـةٍ مثنـيـةٍ ومعطـوفـه=تقبٌل الـراس وتبـوس الأيـادي
من هاجسٍ ينبض غلاكم بجوفـه=من يوم هو قطعة لحم بالمهـادي
الوقت ذا وضعه وهذي صروفـه=ما تم من زرع اقتفاه الحصـادي
ومن لا ذكر بالخير تربت كفوفـه=هذا الكلام اللي عليـه الوكـادي
والحمد لله مـا قطعنـا شفوفـه=الجمر حـي ولا تحـول رمـادي
وحنا لنا جلسة قصيد امحفوفـه=جلسة رجالٍ ماتجيـب الـدوادي
فيها النفوس مروضه ومعسوفـه=مابه تنعصر بين حضر وبـوادي
ذي دعوةٍ لك باللحون امعزوفـه=ان كان لك شفٍ ياغايـة مـرادي
تشريفكم يضفـي علينـا كنوفـه=المسك والعنبر وريـح الزبـادي
ويسلم لنا راسك وتسلـم كتوفـه=ياخال يابن الخال يابـو زيـادي