رثاء المرحوم ابراهيم بن محمد الصقيهي

حَلَّ القضَا و الحُكْم بالعَدْل مكتوب=أَمْـرَ الله الغالِـب و حِـنَّـا نطِـيعـه
يـومٍ وراه العُـمْـر بـايـَّام مَـحْـسـوب=فيـه الدِّقَـايـق و الـثَّـوَاني سِريعـه
هـذا المـدا فـي تالي العمر منصـوب=يـطـول و الا العـمـر بـاول ربـيعـه
ديـن يحـل امـوكـل فـيــه مـنــدوب=مـنـدوب مـا يخـطي بـرد الـوديعـه
آجَالِنا من صُوب والعيش من صوب=نَفْطَـن و نَنْسَى بالحياه الوسِيـعـه
لـو كاشِفَتْنَـا كَـدَّرَتْ كِـل مَشْـروب=المـوت مـن هُـولِـه يشَيِّب رضيعـه
طُـولَ الحيـاة بْلَـذِّةَ العِيـش مرغـوب=و الخُـوف مـن يـومٍ تِحِلَّ القطيـعـه
يـومٍ يجِـي بـه وَافِـرَ العَقْـل منهـوب=عِلْـمٍ يـِهِـزَّ الـرَّاسـيـات المـنِـيـعـه
يُـومِ ارْبِعـا و مْغَالِـبَ الحـق مـغلـوب=يَـنْـعِي و الاخْبَـار الوِثيقه تِشيـعـه
كِنَّ الخَبر في داخل الصَّـدْر مشـبـوب=فَرْقَى ابراهيـم الصقيهي فجيعـه
ابـو محمـد من هَلَ العِرْف منسـوب=بـالحِلْـم مشهـورٍ بحِسْنَ الطِّبيعـه
مـوتِـه غـشَـا دِيرَةْ عنيزه تِقِـل ثـوب =وَ ارْكَـب ظَـلاَمـه فُوق جَوَّ البديعـه
مَنْشَاه في وَقْتِه على الطِّيب موهوب=مَـوَاقِـف الحَـدْرِه مـنَ اوَّل تـذِيـعــه
فـي بـاب سايـر مـا تَـعَـذَّر بمَـاجـوب=و الـيـوم لـه بـالحـق راسٍ رفـيـعــه
بالسُّـوق له قَلْبٍ مشَاهَد و محبـوب=ما يِخْتِـلِـف عـن داخِلِـيِّـه فِـزِيـعـه
لـه بالبدِيعـه وِدّ مِـدْرَك و مخـطـوب=بـَاهْـلَ المنَـايِـر مَـرْكَـزِه بـالطِّلِيعـه
بـالـدَّار نِعْـمَ الجـار مـا فيـه عِـذْروب=أَلْطَف من النَّسمه بعَدْلَ الشِّريعه
قَـلْبِـه لِكـلَّ الناس بالخير مَصْحـوب=و النـاس خَلْفِـه عنـد رَبِّه شِفِيعـه
مرحُوم يا مِنْ باَحْسَنَ الفِعْل منْتُوب=في طَـاعِـةَ الله ما يِضَيِّـع صِنِيعـه
بـالقَـبْر لـه رُوضٍ مـهَيـَّا و مجـلـوب=حِسْـنَ العَمَـل ما يِسْلِمِه للهَزِيمـه
فـي جَنِّـةٍ ما ذَارَهـا نَقْـص وِ عْـيُـوب=آمـين يـا مِـرْبِـح جِـزَا كِـل بِـيـعــه
أَعَــزِّيَ اولاده و انـا فـيــه مَـنْـكـوب=و اولادهـم و اَهْلَ القلوب الوِجيعـه
صــلاة رَبِّـي بـَاوِّلِــه وَ اخِـر الـنُّــوب=علـى نِبِـيَِّ مَـنْهَـجِـه مـا نِضِيعـه