بروازها المستحيل ..!

لوحةٍ للشَّرَف بِرْوَازها المستحيل=من روايِع رجالٍ يفرضون النجاح
روضةٍ من مزَاياها النِّسيمَ العليل=مايِتِيهَ المطَالِع بالمسا والصباح
شَيِّدُوها بْحِلم اوعِلم وَاغْلَى حَصِيل=من مفَاخِر عنيزة تَبْعَثَ الإِنْشِراح
مَجْلسَ اهْلَ التُّراث اليوم ماله بِديل=في شِعارِه نُفُودَ السَّافِيِه والجناح
لوحةَ الشِّعر يَكْشِف نَوَّهَا المِسْتِخيل=دُوحِةٍ في نَوَاميها الكلامَ المباح
مَوْرِدٍ عَذْب من بِينَ الأَنامِل يسيل=ماشَرَق سَلْسَبِيلِه من هَبُوبَ الرِّياح
ماتركنا القصيد اللي عليه الدِّليل=غير وَقْتٍ لنا من دوُن ذِكرِه صلاح
وانتهى المَنْع ياَهْلَ الكِيل كِلٍّ يِكيل=في ذَرَا المَنْهَجَ المشروع بعد السِّماح
قَبْل ماننزلَ السَّاحِه بْوَقْتٍ فضيل=نَرْفَعَ التَّهنِيِه فُوَق الشِّفا والملاح
عيدكم بَعْد شَهْرَ الصوم ماله مثيل=عادِهَ الله على دَارَ السَّعَد والفلاح
يحفظ الله لكم بالخير عُمْرٍ طويل=للفَرَح فيه نور وللقُلوب انفتاح
بيننا للتَّحِيِّه والبِشَاشِه سبيل=بارِقَ التَّهنِيِه في هامِةَ النَّجم لاح
بَعْد هذا غَمرَتْونُي بْذِكْرٍ جِميل=يَرْفَعَ الطِّير لو هو مايِرُفَّ الجناح
اسْمِحوا لي بْكِلْمِه بين جِيلٍ وْجِيل=ساعةَ الجِدّ جِدُّ وساعِةٍ للمزاح
لاَجْل روُحَ التِّميمي للصَّراحه وِكِيل=من عَرَف رُوح والبادي كِسَب واستراح
اعْذرِوني وانا فيكم غريبٍ دخِيل=خايِفٍ مايِطِيقَ الصَّدر زَرْقَ الرِّماح
في موازين حِسْنَ الظَّن شُكْرِي جِزيل=وان تَعَذَّرْت مالي عن رِضاكم مراح
عن مجال الدِّعايِه كد نِفَضْتَ الشِّليل=مانَبِي نلتفت لِمْضَمدِّينَ الجِراح