رثاء المرحوم عبدالعزيز بن حمد السليم

الصَّبر من ربِّي بِشيرَ الهدايِه=والْمَرْجِعَ الله عند غاراتَ الاَهوال
سبحان من فضله لنا بالعنايِه=بِهْدَايِتِة نَرْضَى على كِلَّ الاَحوال
بالصَّبر نِدْرِك بالرِّضَا كل غايِه=ميزان عقلَ المهِتِدي عَدْل مامال
ماللبَشَر عن ماقِضَى الله وِقايِه=والموت مايَرْضَى عنَ النَّفس بالمال
واليوم مايَنْفَع كِثِيرَ الشِّكايِه=الموت حَقُّ وْعندنا فيهَ الاَمثال
وَقْتَ الأجَل مرسوم عند النِّهايِه=ماقَدِّمِه رَغْبة ولا وَخَّرِه فال
السَّبت خَلاَّ ثابِتَ الفِكر تايِه=يومٍ عليه الهَمّ والضِّيق تِفصال
قالوا طَلَبْكَ الحِل عَدْلَ الهْوَايِه=عبدالعزيز بِن حمَد نِعْم رَجَّال
اِبْنَ السليم اللِّي رفيعٍ ابْرَايِه=رَجْلَ الوفا والطِّيب والحقّ يِنقال
لِين المْعَاشَر سِيرِتِه بالبِدايه=وَافْضَل صفاتَ المسلم بْخِيرَ الاَعْمَال
انشد وتلقى له معَ النَّاس رايِه=مِيثاقَها بِقْلُوبَ الاَحباب مازال
قلبه كِتَب له في حياتِه حمايِه=عن الزَّلَل ياتِيه بالخير مِرسال
من قَلبه الصَّافي بْوَجْهِه امْرَايِه=تِشوف فيه الصِّدق تَقْدير وِاجْلاَل
مايَجْحَد الاَّ من خَذَتْه الغْوَايِه=والحق مثلَ الشَّمس عن فَيّ وِظْلاَل
يارَحْمِةَ الله وَثِّقِي له وِصَايِه=بُشْرَاه من رَبِّه بلا ريِب وِاشْكَال
مرحوم يامِن له بْعُمْرِه رِعايِه=ماصَال في دِنْيَا السَّخافِه ولا جال
مرحوم ياحَيٍّ لِطِيفَ الحْكَايِه=مرحوم يامِيتٍ بِه القَبْر يِخْتَال
مِثْلِك عَزاه اليوم مِثْلَ الدِّعايِه=ياكِيف نَنْسى طَيِّبَ العَمّ والخال
لاِبْنِه مَعِ اخْوَانِه رْجَالَ الوِلايِه=والوالده لِهْمَ العَزَا في سَعَةْ بال
مَعَ البناتُ اْو هَمِّهِن بالِكفايِه=مَعْ والَدْتِهن بالهَدَاوِه والاِمْهَال
بالصَّبْر والسِّلوان عن كِلّ سايِه=عَسَى لِهِن في فَرْحِةَ العُمْر مِنزال
صلاة ربي في خَوَاتِم نِدايِه=على النِّبي مايَدْرِجَ الشَّهْر بِهْلاَل