يالايـمـي بالله لاتكـثـر الـلـوم=تراه ضايق منك بالي مـن اليـوم
وفّر كلامك فيه مـا نيـب ملـزوم=خله لمن يحتـاج توجيـه ورشـاد
مانيب في حاجـة كلامـك ولانـي=قاصر عليّ امـن المعانـي معانـي
ابـوي ربّـان وربانـي زمـانـي=كم عشت من تاريخ هجري وميـلاد
عُمِّرْت مـن عمـر الليالـي عتيّـا=مابين نقص وزود شخـصٍ سويّـا
أخطي وصيب اكيـد مادمـت حيّـا=وان مت للرحمه على درب الاجواد
لـولا الأثامـي وغتفـار الأثامـي=للخلـق لاستبدلـه رب الأنـامـي
هـذا كـلام الله ماهـو كـلامـي=حديـث متواتـر بتوثيـق وسنـاد
الديـن ديـن الله واضـح وبـيّـن=لو قلت أنـا رجـلٍ مطـوع وديّـن
لا تستغـل السانحـات اوتحـيّـن=مانتب وكيل الله على أمـة الضـاد
أركان دين الله وهي خمس الاركان=جوّد عليهـا بالنواجـذ والاسنـان
ولا يفتنك عن دربهـا كـل فتّـان=نفس الهوى يبغى لها حزم وجهـاد
شهادة التوحيـد واعظـم شهـاده=وقوّم عمود الدين وافضـل عبـاده
وصوم إرمضان وزك مال النفـاده=والحج بعد الأمن والرحـل والـزاد
وما استطعت امـن النوافـل تنفّـل=يشكر لك اللي فـي عبـاده تكفّـل
ولا تكـون إضعيـف ولا تطـفـل=نفسك على ما عتادته منـك تعتـاد
وياك ويـا الشـرك ضلمـا كبيـرا=من مات مشرك سوف يصلى سعيرا
في قعـر نـارٍ شرهـا مستطيـرا=ومادون ذا يُغفر إذا شـاء وإذا راد
والظلـم بعقـوق الولـد والدينـه=إلى تلاجوا لـه بعـد حـلّ دينـه
إما احتضنهـم بـرّ تبـت يدينـه=تبت يـداه وتـب سحقـاً وإبعـاد
الوالديـن إلهـم حقـوقٍ عظيمـه=تغانـم الفرصـه يمـال الغنيـمـه
قـدام تنـدم والندامـه وخيـمـه=العمر له ساعـه وللـزرع حصّـاد
إخفض جناح الذل لطـف وليانـي=وقل ربي إرحمهـم كمـا ربيانـي
ربـك عليـمٍ بالخفـاء والبيانـي=وهنيّ من قـدّم ويهنـيّ مـن زاد
وحذراك واموال اليتامـى وحـذراك=لاتاكل إسـراف وبـدارى بيمنـاك
والى ابلغوا سن الرشـاده والادراك=إدفع لهم أموالهـم وانـت منقـاد
وحذراك بضـروب الربـا لاترابـي=تعادي الله وانـت خاسـي وهابـي
تلقى المجازى في نهـار الحسابـي=تبعث كما اللي فيه مسّّ امن الأجهاد
وحذراك قذف المحصنات العفيفـات=الغافـلات الطـاهـرات النقـيـات
لا تحسب ان الأمر مفلـوتٍ إفـلات=لك عورة والألسن اطـوال وحـداد
وحذراك عن حلف اليمين الغموسي=اللي تغمسك فالجحيـم الضروسـي
في طول يـومٍ قمطريـراً عبوسـي=يفضحك خلاّقك على روس الاشهاد
وحذراك لا تشهد شهاده من الـزور=ولو زعل ناصر ولو زعل منصـور
نارٍ تَميّزلك مـن الغيـض وتفـور=دام السعه دوّر عن الضيق محيـاد
وحذراك لا ترتع بعـرض العبـادي=وتقـول ذا شـيٍ بسيـطٍ وعـادي
ويلك من الله فـي نهـار المعـادي=لابـد مـا تاقـف وللعلـم نشّـاد
والجار له حـق وحـدود ومحـارم=إكـرم قصيـرك ياسليـل الأكـارم
واشبح نظرك إبعيد لو كنت ضـارم=ما يدنع ابجاره سوى عفن الاجـداد
ولا تردّى مع نسيـبٍ وثـق فيـك=عطـاك بنتـه تستحلـه وترضيـك
إمـا وفيـت الله يبعـد حـراويـك=مانتب كفو حرمـه ولا كفـوالاولاد
وحافظ على بيتـك وعلِّـم عيالـك=أمانـةٍ عنـدك وربــك يسـالـك
قـدام لا تصفـق يمينـك شمالـك=كـم واحـدٍ قبلـك تنـدم ولا فـاد
عطه المعاني من نعومـة ظفـوره=يكبر وهي فـي ذاكرتـه امحفـوره
ولا تقول إصغيـر مـا حـلّ دوره=إلى كبر مـا عـاد ينفعـك ماعـاد
والى بلغ معك السعي فـي زمانـه=خلّك خـويٍ لـه ولا عـب عنانـه
وعطه الثقه وازرع بـه الإستعانـه=وفك السبوق وهد طيـرك ياهـدّاد
ياللي تعيّب وانت ما تعرف العيـب=العيب بالرجـال سهـج المواجيـب
وتصعير خده للخوي والاصاحيـب=والعيب قل الخاتمه لاطْـوَلْ المـاد
والعيب نكـران الجميـل وجحـوده=أرضٍ سبخ ما ينبت الوبـل عـوده
لو هل بـه مـزنٍ ثقيـلٍ رعـوده=مـازاده إلا رغـوةٍ تزبـد إزبـاد
والعيب ون لقّيت ضيفـك علابيـك=هبيت واقطع وخـس كـلٍ يهبيـك
لا رحم ابوك اللي عجـز لا يربيـك=صفرٍ يسار ولا تعد امـن الاعـداد
والعيب بافشـاء السـدود الوثيقـه=ما تقعـد الكلمـه ببطنـك دقيقـه
سبحان من قسّـم طبـوع الخليقـه=رجلٍ سداد ورجـل هـذّار وربـاد
ون كنت متميز بميزه عـن الغيـر=لاترخي الهامه بوجـه الأعاصيـر
إثبت ولو صكت عليـك الطوابيـر=ولاتلتفت لأقوال مبغـض وحسّـاد
وعامل جميع الناس حسب التعامـل=مافيه مخلوقٍ مـن الخلـق كامـل
لابد مـا تبلـى بصاقـط وهامـل=وبعض المواقف خلها نـار وزنـاد
الحلم له ساعـه وللجهـل ساعـه=حلمٍ بليـا جهـل بئـس البضاعـه
راعيـه بالدنيـا قصيـرٍ ذراعــه=تطمع به الرديان من حاضر وبـاد
ون كان ما يزمي على الكبد مـرّك=روّح مــراح امقـيـط لادرّ درّك
ما يرّجى خيـرك ولا دفـع ضـرّك=وش عاد وليا جيت ون رحت وشعاد
المؤمن الصـادق قـوي الشكيمـه=ماينظلـم ولا يـحـب الظليـمـه
الله ماسوّانـا ســواة البهيـمـه=اللي بدرب الضيم سـرداد مـرداد
أوجزت لك موجز ونبـذه بسيطـه=والعلم بحـرٍ ساحلـه مـا نحيطـه
تلاطـم امواجـه وقاعـه غويطـه=في كل يوم يبيّـن اعلـومٍ اجـداد
ولا الهوى العذري بهـار النشامـا=مـن خلقـة الله للسفـر والظلامـا
يامـا ويامـا بالليـالـي ويـامـا=من قلب مشغوفٍ ومن طرف سهّـاد
لاصار من تهواه يسـوى المهـاوا=تمسي عليه اضلوع جنبـك تعـاوا
لوكان جرحـك غايـرٍ مـا يـداوا=ألذّ واطعم لك من الشـرب والـزاد
ياحلو عنّاتـه إلـى جرهـد الليـل=وسرابك الهاجوس مسرا الجماميـل
وصافح خيالك نجمة الجدي وسهيل=تعيش في جوٍ خلـيّ مـن الانكـاد
هـذا كلامـي وانـت حـرٍ برايـك=والطبع مثل العضـو مالـه فكايـك
والمرجله دربـه عسيـرٍ وشايـك=ياحـادرٍ وادي وانـا حــادرٍ واد
2009, 04:13 PM
يالايمي بالله لاتكثر اللوم 
العرض العادي
المواضيع المتشابهه 
