تحيه للجميع .. هذه قصيده للشاعر سليمان بن شريم .. رحمه الله .

وكان رحمه الله مشهور بعزه نفسه لدرجه كبيره جدا .. لذلك هو كثير الزعل والتشره

والقصيده تشرح القصه :-

يا أهل الركايب اللي قربهم مطواه = من الفيحا ناصين ديار ورانا
تحملوا مني لأهل السيف بوصاة = عند العوازم ربعنا واقصرانا
أهل السوالف والبيوت المبناه = ومجالس تفرح قلوب الحزانا
تلفون ربع ملفين على ماه = قولوا لابن جامع يعرف اخويانا
لا صار يجهلنا ترانا عرفناه = ولا هيب سيرة الرجال تخفانا
اللي قصيره ما تسوى سوياه = عفن القرى من قربته ما سقانا
الخرفشي يوم حنا خطرناه = بتنا القوي لولاه معنا عشانا
ليته نصانا ببلادنا قبل ننصاه = حتى يميز طيبنا من ردانا
أما حقرنا كان حنا حقرناه = والا عطانا قدرنا وامعنانا
ياطول ليلة بايت الجوع طولاه = عند الكديش اللي بفعله تدانا
ليل صبرنا به وليل سريناه = من خوفتي ناكل صغار أردفانا
ليت العوازم مقطعين مخصاه = لياه تكثر رجعته بحلفانا
لو هو مع الجربا قطع كف يمناه = لياه ياطا غيرنا ما وطانا
ياللي تعرف السب وشلون معناه =باللي نسوي قدام بيته عشانا
هو يستحق السب وإلا مدحناه = ولا صار هذي سيرته وش ترانا
إن كان عقب هالجرب ما طليناه = باكر يروحون العوازم صيانا
هذا جزاه وراعي الطيب نجزاه = بالطيب لأجل أنه بطيبه جزانا

سرى البارق اللي له زمانين ما سرى = صدوق المخايل بارقه يجذب الساري
على فرعة الوادي وسيله تحدّرا = وغنت طيور الما على حاير الجاري
مرامي غزال عقب عرفه تنكرا = عليه الله اكبر كل ما حل له طاري
برى الجرح منه , ومني الجرح ما برا = وهو يحسب انه يوم طال المدى باري
نطحني بجزّ الثوب حدر المشجرا = جميل المحاسن لا ضخيم ولا عاري
ابو لبة مثل القمر ضاح واسفرا = والى غابت القمرا تقدى به الساري
تراى سلبة العاتق الى صدّ ما درا = كما سلبة العرجون في صفحة الذاري
صويب الهوى مسكين مشيه على ورا = ترى النقص فيه وحيله اقوى من الضاري

يا غـزال نطحنـي قايـد للجميلـه =نمره أول من أول ما بعد صار تالـي
كل ما جيت ابا قف له وديره بحيلـه = استدار الهوى عقب الجنوب الشمالي
خابر انه ربيب بلاد ما ينحبـي لـه = واثر ما زاد من ولفي يزيده جفالـي
يا حلي ّ العنود اللي عيونه كحيلـه =علنّي من شهد ريق شربته لحالـي
ليتني وانت يالغالي سنيـن طويلـه = لين تمحى من البيدا رسوم الجبالـي
كلما جيت أبد له عن طويل الجديلـه = يشفع الحب الاول ثم ينسـاح بالـي
يا محمد قصير الهرج يقطع طويلـه = والله اني فلا اسلى عنه دبّ الليالـي
ان بغى يضفي الحسنى ويرضي قبيله = يستبيحه ويدمح له الى صار غالـي
سالفة قولة ابا انساه والقـى بديلـه = مثل من يرخص النيره ويغلي الريالي
كن في عينه اليمنى سيوف صقيلـه = شرّفوها هل العادات يـوم القتالـي
كن في عينه اليسرى غروس ظليلـه = زاهيه مع طلوع الشمس ري وعدالي

يا حمامه تغرد فوق خضر الجريد = هيضتني وشاني مفختٍ شانها
جعلها الله لراعي شوزنيٍ مجيد = يكسر النايفه من روس جنحانها
الحمامه لها بالناس كيدٍ شديد = كل حيٍ شكى من قوّ شيطانها
ذكرتني هوى اللي مثل عنق الفريد = قبل تدهكني الايام باثفانها
لا سقى الله على قلبي نهار الشديد = يوم فرقا العيون بشوف حيانها
كل ما قلت طاب الجرح عوّد جديد = يوم فارقت منزلها وسكانها
الهوى طالبه لامات كنه شهيد = والمحبه كثير الناس ما صانها
منوتي والتمني خابره ما يفيد = من قضب سلعةٍ من عقب جحدانها
كل من جت له الدنيا على ما يريد = بدلّت له طرابتها بحقرانها
لذة العمر تنقص والليالي تزيد = سنة الله بجاهلها وسلطانها

أرى الدار يا خلاف عافت نزيلها = ولا عاد يرغب جالها من يجي لها
عفت عقب حيٍ ولّف الشمل بينهم = عليهم طهاة العز يسحب شليلها
جفت سكنها واللي بقى منه سكنها = جميعٍ وفرّخ بومها في نثيلها
وساد الثعل فيها وطالت مخالبه = وابا الحاس والواوي تورّث مقيلها
وصراخةٍ بالليل تلعي بركنها = على خربة شتّت نياها نزيلها
جفا العز جانبها وباتت بذلها = وهي قبل من بعد المدى ينعني لها
وذي حالة الدنيا كفى الله شرها = الى خاصمت ملزوم تفلج قبيلها
تضحك بوجهه ضحكةٍ يستسرها = وهي علةٍ ما هوب يكمل جميلها
خذتني وانا في غفلةٍ ما حسبتها = سحابة عذاب من تحتها رفي لها
واصبح نظيم العقد في كل ديره = وانا واقف ما كني الا هبيلها
أدير النواظر والمسامع ولم ارى = من الربع والخلان ما نلتجي لها
كثير المعارف والطوارف على الرخا = الى بدا اللازم لحاجه بدي لها
ارى الناس والدنيا وهلها ومن بها = كما حلم ليلٍ خاب من يرتجي لها
تجدد منازلها وترفع نشورها = وفي حزة المنزل سريع رحيلها
اقوله وانا نفسي من الخوف والرجا = تجاذب قزت من رقيها واتحويلها
وجسمٍ نحل كله جميع ولا بقى = على رمته من حاله الا قليلها
سقى الله صروف الوقت مني ولا سقى = لذاتها وسرورها وتعليلها
اتبيّن عدوي من صديقي الى حكم = زماني بنقلاتٍ ثقيل مشيلها
يصير القريب بعيد ما يسمع الندا = ولو يسمع الصيحات ما يرعوي لها
خليل الطرب ومساير الوقت بالرخا = كما مزنةٍ غرا بعيدٍ مخيلها
تغرك مخايلها وترجي وترتجي = وعلى دربها تخلي الطراقي صميلها
وانا اسباب مابي من عذابي وعلتي = من احبار سّوٍ ضيّع الله دليلها
تبث الردى بالطيب والطيب بالردى = وضحاها تشابه من عماها بليلها
وش خانة الدنيا الى عاد ما بها = صديقٍ وثيقٍ حيلته ينشكي لها
وهي كلها مثل الغمامه وتنجلي = كما ضحكة الجاهل غضبها يزيلها
وانا في زمان اربع طعش قرن حسبتي = وترا كل نفس فعلها فعل جيلها
احذّر بها نفسي و ورّخ زمانها = ترا الجيم ناش الغين واخلف نزيلها
واصلي واسلم عد ما هبت الصبا = على سيد الكونين حتى خليلها