سقى صوب الحي مِزنٍ تَهامَى === على قبـرٍ بتلعـات الحجـازي
يعط بها البختـري والخزامـى === وترتع فيه طفـلات الجـوازي
وغَنَّـى رَاعْبيّـات الحمـامـا === على ذيك المشاريف النّـوازي
صـلاة الله منـي و السّلامـا === على من فيه بالغفـران فـازي
عفيف الجيب ما داس الملامـا === ولا وقَّفْ على طرق المخـازي
عَذُولي به عنـودٍ مـا يرامـا === ثِقيلٍ مـن ثقيـلات المـرازي
أبو زرقا علـى خـده علامـا === تحلاهـا كمـا نقـشٍ بغـازي
عليـه قلـوب عشاقـه ترامـا === تكسر مثـل تكسيـر القـزازي
ألا يا ويل من جفنه علـى مـا === مضى له عن لذيذ النوم جازي
ومن قلبه إلـى هـب النعامـا === يجرونه على مثـل الخـزازي
تكـدر ماصفـى يامـا ويامـا === صفا لي من تدانيـه المجـازي
ليالي مشربي صفـو المُدامـا === وثوب الغَيْ مَنْقُوش الطِّـرازي
مضى بوصالها خمسة عوامـا === وعشرٍ كنهـن احـزاة حـازي
بفقدي له ووجـدي و الغرامـا === تعلمـت النياحـه و التعـازي
وصرت بوحشةٍ من ريم رامـا === ومن فرقـاه مثـل الخازبـازي
عذولي فـي هواهـا بالملامـا === يعزيني وأنـا مانيـب عـازي
وكل البيض عقبه لـو تسامـى === فلا والله تسوى اليـوم غـازي
سلينـا لا حـلال ولا حرامـا === عليهن الطـلاق بـلا جـوازي
وحياة الشـوق فيهـا والهيامـا === وقـدٍّ منـه يهتـز اهتـزازي
وخـدٍّ تـمّ بـه بـدر التمامـا === وجعدٍ فوق منبـوز العجـازي
فـلا بـي عقبهـا زاد ولامـا === وجزت من الغوى والغي جازي
وخضت ابحور ليعـاتٍ تطامـا === خلاف الانس ضاقت وين ابازي
نِكِيف الهم فـي قلبـي ترامـا === وجيش البين بالغزوان غـازي
اريده وانكسر كسـر السلامـا === بِسَيفٍ جَرّدَهْ ما هُـوب هـازي
علي بخت الدهر ليتـه تعامـا === وخلاهـا وليتـه مـا يـوازي
ياليتي ما حكيت بهـا وأنـا مـا === بكيت الها وفي قلبي حـزازي
أظـلّ مساقـمٍ دوم الـدوامـا === وهمومي فيه تتحـاز انحيـازي
الا يالله يـامــن بالـمـلامـا === يسلّم يـوم تـرزاه الـروازي
اسَلَّـمْ لـه ولا رَد السَّـلامـا === عَزيزٍ من عَزِيـزاتٍ عـزازي
وصـلاة الله منـيِّ والسَّلامـا === على من فيه بالغفـران فـازي